Mbilive zokuhova zaPeturusa 4:1-19
4 Mokumona asi Kristusa kwa hepere parutu, none liwapaikireni mokugazara ngwendi yige, morwa muntu ogu ga hepa parutu kwa hageka nonzo,
2 yipo a ruganese eparu lyendi mokusikisa mo mpango zaKarunga, nye kapisi mokuhafesa madowo gendi.
3 Yeeyi yirugana yonomuhoko dapeke eyi ngomu rugana nare ngano ya gwana nye. One ngomu paruka nonkareso zokunyata,* nokudowokera kurugana yininke yoyidona, nomakurunwa nomoyipito yoyidona* nomomarumbasano gokunwa ntani nokukarera yikarunga yoyimpempa.
4 Awo yina va tetura kweyi muna kudira kulihameka hena nawo mokuparuka eparu lyedona, eyi yiyo vana kumuswawira.
5 Vantu ava ngava ka va pangura kuliza noyirugana yawo, ogu a pangura vanamwenyo novafe.
6 Eyi yiyo mbudi zongwa va zi udisira kovafe, yipo ngava parukire megendeso lyompepo zaKarunga, nampili ngomu ava va pangura ngwendi moomu ava pangura vantu.
7 Nye uhura woyininke nayinye, una hedere pepi. Yipo nye, kareni nonondunge ntani liwapaikireni kukanderera nkenye apa.
8 Mwanayinye lihareni unene, yeeyi eharo kudongwenesa po nonzo dononzi.
9 Litambura-tambureni mwa hana kusivana.
10 Mokumona asi one vakareli vaKarunga wovawa, one kwa gwana uhwi kupitira monkenda zaKarunga zonene ezi a zi lihorora mononkedi dokulisiga-siga, u ruganeseni mokulikwafa-kwafa.
11 Nsene gumwe kuna kuuyunga, a uyunge mbudi zokutunda kwaKarunga; nsene gumwe kuna kuvatera wopeke, a huguvare mononkondo daKarunga, yipo Karunga va mu fumadekere po mwanayinye kupitira mwaJesus Kristusa. Uyerere nononkondo yendi narunye nanarunye. Amen.
12 Vakwetu wokuhara, walye a u mu tetura upyu womaheteko* aga muna kuligwanekera nago, ngwendi asi kapi mwa yi mona rumwe.
13 Nye hafeni unene kweyi vana kumuhepeka ngwendi moomu va hepekere Kristusa, yipo ngomu hafe unene apa nga horoka mouyerere wendi.
14 One vanerago nsene kuna kumuuyunga momudona* morwa edina lyaKristusa, eyi kulikida asi muna kara nompepo zouyerere, kutanta asi mpepo zaKarunga.
15 Nye mokatji keni mwa ha kara ogu ana kuhepa morwa kudipaga ndi kuvaka ndi morwa kurugana yoyidona ndi kulitura moyininke yovantu.
16 Nsene pweli ogu ana kuhepa morwa kukara Mukriste, ga ha li fa nomuga, nye a twikire kufumadeka Karunga pokuparuka ngoMukriste.
17 Esi yiso siruwo yipo epanguro litamekere membo lyaKarunga, yeeyi nsene litameka nose, yitundwamo musinke nye nga yi kara kowo ava dili kulimburukwa kombudi zongwa zaKarunga?
18 Yeeyi etjangwa kwa tanta asi “nsene asi muhungami kuna kumuparura noudigu, yinke nye nga yi horokera mudinikarunga nomunanzo?”
19 Yipo nye, ava vana kuhepa morwa kulimburukwa Karunga, va twikire kurugana uwa nokuligava vene momawoko goMusiti gwawo ntani ose kuvhura kumuhuguvara.
Nonkango dokonhi
^ Kwa tamba koyipito omu ava lizumbilire kurugana udona.
^ Ndi “maheteko gomanene.”
^ Ndi “kumuswaura.”
