Samwere gokuhova 1:1-28
1 Pwa kere mugara ogu ga tungire momukunda gonondundu gwaEfurayimi moRamatayimu-sofimu.* Edina lyendi Elikana. Age kwa kere munaJerohamu mutekurwaElihu zaTohu zaSufu. Age kwa kere Muefurayimi.*
2 Elikana kwa kwere vakadi vavali, madina gawo Hana naPenina. Penina kwa kere novana, nye Hana kapi ga kere novana.
3 Mugara ogo nga zi nkenye mvhura koSiro a ka karere* Jehova Mupitisili govakwayita vemeguru ntani a ka gave nzambo kwendi. Oko yiko va kere vana vaEli vavali wovagara, Hofini naPinehasa ntani awo ngava ruganene Jehova ngovapristeli.
4 Ezuva limwe apa ga geve Elikana nzambo, age kwa geve nyama zimwe kwaPenina ntani kovana vendi wovagara nava wovakadi,
5 nye age kwa geve nyama zongwa po kwaHana, morwa age kwa mu here unene. Nampili ngoso, Jehova kapi ga pere Hana vana.*
6 Ntani hena musupakadi zendi nga mu ninkagura yipo a mu handukise, morwa Jehova kapi ga pere Hana vana.
7 Eyi yiyo nga rugana Penina nkenye mvhura. Nkenye apa nga zi Hana konzugo zaJehova, musupakadi zendi nga mu ninkagura unene dogoro ta lilire mo nokunyoka kulya.
8 Nye mugara gwendi Elikana ta mu pura asi: “Morwasinke ono kulilira neyi ono kudilira kulya? Ntani morwasinke ono guvire unene? Nani ame kapi na pitakana vana wovagara murongo?”
9 Apa va mene kulya nokunwa moSiro, Hana ta katuka a ze. Posiruwo oso, mupristeli Eli kwa hingilire posipundi esi sa kere pevero lyontembeli* zaJehova.
10 Hana kwa guvire unene, makura ta kanderere kwaJehova oku ta lili unene.
11 Makura ta gana kwaKarunga asi: “Jehova Mupitisili govakwayita vemeguru, tara omu nina kuhepa. Nsene no diworoka nge ame mukareli goge, o pe nge munona gomumati, ame ngani mu gava koge Jehova eparu lyendi nalinye ntani kapi ngava kurura nohuki dendi.”
12 Apa ga kanderere Hana kwaJehova siruwo sosire, Eli kwa mu tarwilire kokana.
13 Hana kwa kanderere momutjima, nye nomurungu dendi kwa ligumagwire ntani kwato ogu ga zuvhire ezwi lyendi. Eli kwa gazarere asi Hana kuna korwa.
14 Eli ta mu pura asi: “Siruwoke ngo siga unkorwe woge? Hageka kunwa.”
15 Makura Hana ta mu limburura asi: “Hawe hompa gwange! Ame kapi nina nu vhinyu ndi nkenye marovhu. Ame kuna kupita moudigu wounene, yiyo nina kutantera Jehova nayinye eyi yina kara komutjima gwange.
16 Wa ha gazara asi ame mukadi gokudira nondunge. Ame kuna kukanderera, morwa nina kara noudigu ntani nina guwu unene.”
17 Makura Eli ta mu limburura asi: “Zende mombili, Karunga gwaIsraeli ngano a ku pe eyi ono mu hundire.”
18 Ano Hana ta tanta asi: “Ngano o hafere mukareli goge.” Makura Hana ta zi, ta ka lya, kutunda opo kapi ga guvire hena.
19 Ezuva eli lya kweme ko, tava pinduka ngurangura zonene, tava karere Jehova, ano konyima tava tengura kembo lyawo koRama. Elikana kwa ligwanekerere panyama namukadendi Hana, makura Jehova ta diworoka Hana.
20 Momvhura zoozo,* Hana ta kara nezimo, ta hampuruka munona gomumati, makura ta mu ruku Samwere,* yeeyi age kwa tente asi: “Ame kwa mu hundira kwaJehova.”
21 Konyima zosiruwo, Elikana kwa zire nepata lyendi nalinye va ka gave nzambo zankenye mvhura kwaJehova ntani nonzambo zokusikisa mo mugano gwendi.
22 Nye Hana kapi ga zire kumwe nawo. Age kwa tanterere mugara gwendi asi: “Apa nga tova mumati, ngani mu twara a ka moneke komeho zaJehova yipo a ka kare kooko.”
23 Elikana ta tantere Hana asi: “Rugana eyi ono kumona asi yiwa. Kuvhura o kare pembo dogoro apa nga tova mumati. Jehova ngano a sikise mo eyi wa mu tantera.” Makura Hana ta kara pembo a zamweke munendi, dogoro paapa ga tovere mumati.
24 Apa ga tovere mumati, Hana ta mu twara koSiro. Age kwa pitwire ntwedu zonomvhura ntatu nousura wonokilograma 11* ntani nokavaza kokanene omu mwa kere vhinyu. Age kwa zire konzugo zaJehova koSiro kumwe namunendi gomumati.
25 Makura tava dipaga ntwedu ozo ntani tava twara mumati kwaEli.
26 Makura Hana ta tanta asi: “Gusira nge po hompa gwange! Tani gana asi, nyame gwina mukadi ga sikeme pepi nove pevango eli ni kanderere kwaJehova.
27 Ame kwa kanderere kwaKarunga a pe nge mumati ogu, ano Jehova ga pa nge eyi na mu hundira.
28 Ano ngesi tani mu gava kwaJehova. Age nga kara gwaJehova eparu lyendi mudima.”
Makura age* ta karere Jehova kevango olyo.
Nonkango dokonhi
^ Ndi “moRama, Musufu.”
^ Elikana kwa tungire moEfurayimi, nye age kwa kere Murevhi. Tara 1 Ehistoli 16:19 ntani velise 22 dogoro 28.
^ Ndi “a ka nyongamene.”
^ MoRuhebeli asi “Jehova kwa pete mukoga gwendi.”
^ Kwa tamba nkongoronzugo.
^ Ndi nampo asi “Apa sa sikire mo siruwo.”
^ Kutanta asi “Edina lyaKarunga.”
^ MoRuhebeli asi “woephah zimwe.” Tara App. B14.
^ Kumoneka asi kwa tamba Elikana.
