Samwere gokuhova 10:1-27
10 Makura Samwere ta gusa sipako somagadi, ta tjire magadi pomutwe gwaSauru, konyima Samwere ta ncumita Sauru, ta mu tantere asi: “Jehova ana ku gwaveke o pitisire vantu vendi.*
2 Apa no za, no ka gwana vagara vavali pepi nontoko zaRakera momukunda gwaMbenyameni moSelisa. Awo nava ka kutantera asi: ‘Yindongi eyi muna kupapara vana yi gwana, nye oguho vana yi divara ntani vana kara nosinka kukuhamena. Awo kuna kutanta asi: “Munange kapi ana ka tengura, yisinke nani rugana?”’
3 Kutunda opo, ka ze dogoro kositji sosinene moTaboro omu no ka gwana vagara vatatu vana kuza koBeteli kwaKarunga gousili. Gumwe kuna simbi yikombogona yitatu, ano gumwe kuna simbi nomuhwi ntatu domboroto ntani gwautatu kuna simbi kavaza kokanene kovhinyu.
4 Awo nava ka ku pura omu ono karere ntani nava ka ku pa nomboroto mbali. Wa hepa kukaditambura.
5 Ano konyima, ka ze kondundu zaKarunga gousili oku no ka gwana vakwayita woVafilisiti. Apa no ka hwilira mositata, no ka gwana mbunga zovaporofete kuna kutunda kondundu* oku tava porofeta, ano vantu ava vana kara komeho zawo kuna kusika yiumba, tungomagona ntani nonsiva.
6 Mpepo zaJehova nazi ka kunkondopeka. Ove no ka porofeta kumwe nawo ntani no ka litjindja o kare ngwendi muntu gwapeke.
7 Apa nayi ka horoka yininke eyi, ka rugane nkenye eyi yipo o sikise mo sirugana soge morwa Karunga gousili kumwe nove ana kara.
8 Ka hove kuza koGiligali, ame ngani ka ku gwana kooko yipo ni ka gave nonzambo deswakerero nononzambo dombili. Wa hepa kukandindira nge mazuva ntambali, makura ame ngani ka ku tantera eyi ngo rugana.”
9 Sauru apa ga sigire Samwere, Karunga ta tjindji mutjima gwaSauru gu kare ngwendi gomuntu gwapeke. Ano nayinye eyi ga mu tanterere Samwere ta yi siki mo ezuva lyoolyo.
10 Kutunda opo, tava zi kondundu, tava gwanekere nombunga zovaporofete. Mpepo zaKarunga tazi tumangeda Sauru a tameke kuporofeta.
11 Apa va mu mwene vantu ava va mu divire kuna kuporofeta kumwe novaporofete, tava tanta asi: “Yisinke yina horokere munaKisi? Nani Sauru nage muporofete?”
12 Makura gumwe gwawo ta tanta asi: “Nye ava vaporofete vamwe yilye guhyawo?” Yipo sa tunda sisewe esi asi: “Nani Sauru nage muporofete?”
13 Apa ga mene Sauru kuporofeta, ta zi kondundu.
14 Gumwe gekoro lyoguhwe ta pura Sauru nomukareli gwendi asi: “Kupi mwa za?” Makura Sauru ta limburura asi: “Ose kwa zire tu ka papare yindongi nye kapi twa ka yi gwene, makura yiyo ka tu zire kwaSamwere.”
15 Ta va pura hena asi: “Yisinke ka mu tanterere Samwere?”
16 Sauru ta mu limburura asi: “Age ka tu tanterere asi yindongi vana yi gwana nare.” Nye Sauru kapi ga tanterere mugara ogo eyi ga mu tanterere Samwere asi nga kara hompa.
17 Makura Samwere ta zigida vantu va ya ponge komeho zaJehova moMisipa,
18 ta tantere Vaisraeli asi: “Jehova Karunga goVaisraeli kuna tanta asi: ‘Ame kwa mu gusire moEgipite noku mu popera koVaegipite ntani kovahompa ava ngava mu hepeke.
19 Nye naina one muna nyoka Karunga gweni ogu ga mu poperere komaudigu nagenye nokomahepeko ntani one kwa tente asi: “Tu horowera hompa ogu natu pangera.” Yipo nye, sikameni komeho zaJehova kuliza nomarudi geni ntani nomapata geni.’”
20 Makura Samwere ta tantere marudi nagenye goVaisraeli ga hedere pepi, ano rudi rwaMbenyameni tava ru horowora.
21 Age ta ninki rudi rwaMbenyameni ru hedere komeho kuliza nomapata gawo. Epata lyaMatili, tava li horowora. Ano Sauru munaKisi tava mu horowora, nye apa va zire va ka mu papare, kapi va ka mu gwene.
22 Makura tava pura Jehova asi: “Sauru kapi ana ya siki simpe ndi?” Jehova ta va limburura asi: “Gogwina ana vanda monomurongero.”
23 Awo tava duka va ka mu simbe. Apa ga sikeme mokatji kovantu, age kwa kere mure kupitakana vantu navenye. Vantu navenye kwa hulire pomapepe gendi.
24 Samwere ta tantere vantu navenye asi: “Tareni muntu ogu ga horowora Jehova. Age kapi ga lifana novantu navenye.” Makura vantu tava zigire asi: “Hompa a kare nomwenyo gomure!”
25 Samwere ta tantere vantu eyi hompa ngava pura va rugane makura ta yi tjanga mobuke, tazi tura monkongoronzugo zaJehova. Ano konyima, Samwere ta tantere vantu va tengure komambo gawo.
26 Makura Sauru nage ta tengura kembo lyendi koGibeya. Age kwa zire kumwe novakwayita ava ga tumangedere Jehova.
27 Nye vagara vamwe wovadona tava tanta asi: “Ogu yige nga tu popera nye?” Awo kapi va mu here ntani kapi va mu pere uhwi. Nye age kapi ga kumbwilire ko.
