Samwere gokuhova 11:1-15
11 Makura Nahasi goMuamoni, ta dike kamba zendi a homone doropa zaJabesi momukunda gwaGiliyata. Vagara navenye womoJabesi kwa tanterere Nahasi asi: “Ninka tu ture po egwanekero* nove yipo ngatu ku ruganene.”
2 Nahasi ta va limburura asi: “Ame ngani tulisa po egwanekero kumwe none nsene namuvenye mu korora mo meho geni gokorulyo. Ame kuna hara kuyirugana eyi, yipo ni swaukise Vaisraeli.”
3 Masimbi gomoJabesi taga mu limburura asi: “Tu pa ko mazuva ntambali, yipo tu tume vantu va tware mbudi mosirongo saIsraeli. Ano nsene kwato ogu nga wiza a ya tu popere, ose ngatu ligava koge.”
4 Konyima, vantu ava va tumine tava ka sika mositata saGibeya zaSauru, makura tava ka tantera vantu mbudi ezi va tumine, ano vantu apa va zi zuvhire tava lili unene.
5 Sauru kwa tundire komapya age kuna kusinga nongombe, ta pura asi: “Yisinke yina horoka? Morwasinke vana kulilira vantu?” Makura tava mu tantere eyi va uyungire vagara womoJabesi.
6 Apa ga yi zuvhire Sauru, mpepo zaKarunga tazi mu tumangeda, makura ta handuka.
7 Ta gusa nontwedu mbali, ta di tetagura momaruha, ta gava maruha ogo kovantu va ga tware mosirongo nasinye saIsraeli. Vantu ava ga tumine kwa ka tente asi: “Eyi yiyo ngava rugana nongombe domuntu ogu nga dira kukwama Samwere naSauru!” Makura vantu tava tjira Jehova, tava lizuvhu va ze koyita nositambo simwe.
8 Makura tava va varura moBeseki. Vagara womorudi rwaJuda kwa kere 30 000, ano womomarudi gokuhupa ko goVaisraeli kwa kere 300 000.
9 Tava tantere vantu ava va tumine asi: “Ka tantereni vagara womoJabesi moGiliyata asi: ‘Mungura koyiha yometaha,* one ngava mu popera.’” Makura vagara owo tava zi, tava ka tantera vagara womoJabesi. Apa va yi zuvhire, tava hafa unene.
10 Vagara womoJabesi tava tantere Nahasi asi: “Mungura ngatu ligava koge, yipo o tu rugane nkenye eyi ono hara.”
11 Ezuva lyokukwama ko, Sauru ta gaununa vantu monombunga ntatu makura tava zi ngurangura zonene* pokatji kokamba. Tava ka dipaga Vaamoni dogoro metaha, ano ava va hupire po kwa dukire, tava lihana nkenye ogu pwagelike.
12 Makura vantu tava tantere Samwere asi: “Yilye ogu ga tente asi Sauru kapi ta vhuru kukara hompa gwetu? Mu reteni tu mu dipage.”
13 Nye Sauru ta tanta asi: “Kwato muntu ogu nava dipaga naina, yeeyi Jehova ana popere Vaisraeli.”
14 Konyima, Samwere ta tantere vantu asi: “Tu zeni koGiligali tu ka divise hena vantu asi Sauru yige hompa.”
15 Makura vantu navenye tava zi koGiligali, tava ka tura Sauru a kare hompa komeho zaJehova. Konyima, tava gava nonzambo dombili kwaJehova, ano Sauru noVaisraeli navenye tava hafa unene.
Nonkango dokonhi
^ Ndi “elizuvhasano.”
^ MoRuhebeli asi “apa ngali pyapyara ezuva.”
^ Kwa tamba koyiha yovili zauvali ngurangura dogoro koyiha yovili zauntazimwe ngurangura.
