Samwere gokuhova 12:1-25
12 Konyima, Samwere ta tantere Vaisraeli navenye asi: “Ame na rugana* nayinye eyi mwa tantera nge ntani na mu horowera hompa ogu na mu pangera.
2 Ano ogu yige hompa ogu na mu pitisira.* Ame ngesi nina kurupa ntani nina kara nonomvhi. Nye vana vange wovagara kumwe none vana kara, ame kwa mu pitisira kutunda unona wange dogoro ngesi.
3 Nyame ogu nina sikama komeho zaJehova ntani komeho zahompa ogu ga horowora.* Tantereni nge asi: Ntwedu ndi sindongi salye na gusa? Yilye ogu na vaka ndi ni mu rugane yoyidona ntani yilye ga pa nge uhwi,* yipo ni dire kupangura mouhunga? Nsene na yi rugana, ngano tani yi tengwida.”
4 Nye awo tava limburura asi: “Ove kapi wa tu vaka ndi o tu rugane yoyidona ntani kapi wa tambura uhwi kwankenye ogu.”
5 Makura age ta va tantere asi: “Jehova nahompa ogu ga horowora* kuna kara nombangi pokatji ketu mezuva lyaneina asi kwato unzoni ou muna gwana nge.”* Awo tava limburura asi: “Yige mbangi zetu.”
6 Makura Samwere ta tantere vantu asi: “Jehova ogu ga horowere Mosesa naArona ntani ogu ga gusire ozinyakurweni mosirongo saEgipite, kuna kara mbangi zetu.
7 Yipo nye, hedeni komeho ni mu pangure komeho zaJehova ntani ni mu diworokese yininke yoyiwa eyi ga mu ruganena Jehova kumwe nozinyakurweni.
8 “Jakopo kwa zire koEgipite, ano konyima ozinyakurweni kwa hepere, tava likwambere kwaJehova a va vatere, makura Jehova yipo ga tumine Mosesa naArona va ka guse ozinyakurweni moEgipite, yipo va ya tunge mosirongo esi.
9 Nye awo kwa divarere Karunga gwawo Jehova, makura age ta va gava momawoko gaSisera mukurona govakwayita vaHasoro ntani momawoko goVafilisiti nahompa gwaMowaba, makura tava va rwisa.
10 Awo kwa likwamberere kwaJehova a va vatere, tava tanta asi: ‘Ose twa zona, yeeyi ose twa siga Jehova tu karere mafano gaBara naga gaAsitarete; yipo nye, tu popera momawoko gononkore detu yipo ngatu ku karere.’
11 Makura Jehova yipo ga tumine Jerubara, Bedani, Jefuta naSamwere. Age kwa mu poperere kononkore deni edi da mu kundurukida, yipo mu paruke mombili.
12 Apa mwa mwene asi Nahasi hompa goVaamoni ana wiza a ya mu rwise, one kwa tanterere nge asi: ‘Ose tuna hara kukara nahompa a tu pangere!’ nampili ngomu mwa yi diva asi Jehova yige Hompa gweni.
13 Hompa ogu mwa here ntani ogu mwa horowora, gogu. Jehova ga mu horowera hompa ogu na mu pangera.
14 None nahompa ogu nga mu pangera nsene mu kwama Karunga gweni Jehova ntani mu tjire Jehova mu mu karere nokumulimburukwa, one hena mu dire kurwanesa eyi ana kumupangera Jehova, ngano nawa.
15 Nye nsene mu dira kulimburukwa Jehova ntani mu rwanese eyi ana kumupangera Jehova, Jehova ngano nga mu tengeka kumwe novaguhya veni.
16 Yipo nye, hedeni pepi mu mone yininke yokutetukisa eyi ana kurugana Jehova komeho zeni.
17 Nani one kapi muna kupongaika rukokotwa naina? Ame tani tantere Jehova yipo a rete mvhura nomaruvadi, makura mu yi dive asi one kwa rugana yininke yoyidona kosipara saJehova apa mwa tente asi muna hara kukara nahompa.”
18 Makura Samwere ta kanderere kwaJehova, ano Jehova ta rokesa mvhura zomaruvadi. Ano eyi kwa ninkisire vantu va tjire unene Jehova naSamwere.
19 Makura vantu navenye tava tantere Samwere asi: “Kanderera po vakareli woge kwaKarunga goge Jehova, ose kapi tuna hara kufa, yeeyi apa tuna hundire va tu pe hompa, ose tuna gwederere ko kononzo detu.”
20 Makura Samwere ta tantere vantu asi: “Mwa ha tjira, nampili ngomu muna rugana yininke yoyidona, mwa ha siga Jehova ntani karereni Jehova nomutjima gweni nagunye.
21 Mwa ha mu siga mu ka kwame yininke yomawoko-woko, ayo kapi ta yi vhuru kumuvatera ndi yi mu popere, morwa ayo kutupu sikwafo.
22 Jehova kapi nga siga vantu vendi morwa edina lyendi lyenene ntani morwa Jehova yige mwene ga mu horowora mu kare vantu vendi.
23 Nye ame kapi tani hageke kumukanderera po morwa nsene ni hageka, ame ngani zona kwaJehova. Ame ngani twikira kumuronga omu nomu paruka monkedi zongwa ntani zouhunga.
24 Nye one tjireni tupu Jehova mu mu karere noulimburukwi* ntani nomutjima nagunye, yeeyi age kwa mu ruganena yininke yoyiwa.
25 Nye nsene mu twikira kurugana yininke yoyidona, one ngomu ligwanekera nomaudigu kumwe nahompa gweni.”
Nonkango dokonhi
^ MoRuhebeli asi “purakena.”
^ MoRuhebeli asi “na genda komeho zeni.”
^ MoRuhebeli asi “ogu ga gwaveka.”
^ Ndi “yimaliwa.”
^ MoRuhebeli asi “ogu ga gwaveka.”
^ MoRuhebeli asi “kwato eyi muna gwana mewoko lyange.”
^ Ndi “mousili.”
