Samwere gokuhova 13:1-23
13 Sauru kwa kere nonomvhura . . .* apa ga kere hompa. Konyima zokupangera moIsraeli nomvhura mbali,
2 age kwa horowere vagara 3 000 moIsraeli va kare vakwayita vendi. Age kwa kere kumwe novakwayita 2 000 moMikimasi ntani momukunda gonondundu gwaBeteli. Ano Jonatana kwa kere novakwayita 1 000 wokuhupa ko momukunda gorudi rwaMbenyameni mositata saGibeya. Sauru kwa ninkire vakwayita wokuhupa ko va tengure konotende dawo.
3 Konyima, Jonatana ta fundu vakwayita woVafilisiti moGeba, ano Vafilisiti tava yi zuvhu. Makura Sauru ta ninki vantu va fude ruvinga mosirongo nasinye ntani va divise asi: “Vahebeli navenye va yi zuvhe!”
4 Vaisraeli navenye tava zuvhu asi Sauru ana fundu vakwayita vamwe woVafilisiti, ano Vafilisiti vana nyenge Vaisraeli. Makura tava zigida vantu va ka lipakerere kumwe naSauru koGiligali.
5 Vafilisiti nawo tava pongaike vantu va ze va ka rwise Vaisraeli. Awo kwa zire nomatemba goyita 30 000 novarondi wononkambe 6 000 ntani novakwayita wovanzi ngwendi muheke gokonontere defuta. Awo kwa dikilire kamba zawo moMikimasi koUpumezuva waBete-aveni.
6 Vaisraeli tava dimburura asi moudigu wounene vana kara, makura vantu tava vanda momakombombo, momakero, momamanya ntani momatope.
7 Vahebeli vamwe kwa rutire mukuro gwaJorodana va ze mosirongo saGada ntani saGiliyata, nye Sauru kwa kere moGiligali. Ano vantu ava ga kere nawo kwa kankamene.
8 Age kwa ndindilire mazuva ntambali dogoro apa sa sikire mo siruwo esi ga mu tanterere Samwere, nye Samwere kapi ga zire koGiligali, makura vakwayita tava tameke kusiga Sauru.
9 Konyima, Sauru ta tanta asi: “Retereni nge nzambo zeswakerero nononzambo dombili.” Makura Sauru ta gava nzambo zeswakerero.
10 Nye tupu ga mene kugava nzambo zeswakerero, Samwere ta ya siki, makura Sauru ta zi a ka gwanekere nage ntani ta mu tungike.
11 Samwere ta mu pura asi: “Morwasinke ono ruganene yininke eyi?” Sauru ta limburura asi: “Yeeyi ame kuna mono vantu kuna kusiga nge ntani ove kapi ono wiza posiruwo esi wa tanterere nge, ano Vafilisiti vana pongo moMikimasi.
12 Yipo nina litantere asi: ‘Ngesi Vafilisiti tava wiza va ya rwanese nge moGiligali, ano ame kapi nina pura Jehova a vatere nge.’ Yiyo nina tokora kugava nzambo zeswakerero.”
13 Makura Samwere ta tantere Sauru asi: “Ugova ono rugana. Ove kapi ono limburukwa nompangera edi ga kupa Karunga goge Jehova. Ngano ko limburukwa, Jehova ngano nga ku ninka nove noruvharo roge ngomu pangere moIsraeli dogoro narunye.
14 Nye ngesi upangeli woge kapi ngau karerera. Jehova nga papara mugara ogu ga mu za komutjima ntani Jehova nga mu ninka a pitisire vantu vendi, yeeyi ove kapi ono limburukwa eyi ga kutantera Jehova.”
15 Makura Samwere ta katuka a ze koGiligali, a ze kositata sorudi rwaMbenyameni koGibeya. Sauru ta varura vakwayita, ano sivaro sovakwayita ava va kere nage kwa sikire koyiha yovagara 600.
16 Sauru namunendi Jonatana ntani novakwayita ava va kere kumwe nawo, kwa kere moGeba sitata sorudi rwaMbenyameni. Ano Vafilisiti kwa dikire kamba zawo moMikimasi.
17 Vafilisiti kwa homokerere Vaisraeli monombunga ntatu. Mbunga zimwe kwa vyukire konzira zokuza koOfura momukunda gwaSuwali.
18 Mbunga zauvali, kwa vyukire konzira zokuza koBete-horoni, ano mbunga zautatu kwa vyukire konzira ezi zaza dogoro komururani ogu gwa livyuka nomuramba gwaSeboyimu koyiha yomburundu.
19 MoIsraeli kapi mwa kere muntu ogu nga hambura yivera yeeyi Vafilisiti kwa tente asi: “Kapi tuna hara Vahebeli ngava rugane rufuro ndi egonga.”
20 Vaisraeli navenye ngava zi koVafilisiti yipo va ka rore yipururu, nombike, makuva ntani nombere dokutetesa wayi.
21 Awo ngava futu nograma ntantatu dosiliveli* yipo va rore yipururu, nombike, noforoko dononyara ntatu, makuva ntani yipo va wapekese yininke yokusingisa nongombe.
22 Apa va zire koyita, Sauru namunendi Jonatana velike va kere noyirwiso. Vakwayita vapeke ava va zire kumwe nawo kapi va kere negonga ndi rufuro.
23 Makura vakwayita vamwe woVafilisiti, tava zi va pite momurambagona gwaMikimasi.
Nonkango dokonhi
^ Sivaro sonomvhura dendi kapi sa moneka momatjango goRuhebeli.
^ MoRuhebeli asi “pim.” Kwa tamba kosimeteso esi ngava ruganesa posiruwo sanare. Tara App. B14.
