Samwere gokuhova 14:1-52
14 Ezuva limwe, Jonatana munaSauru ta tantere mukareli gwendi ogu ga mu simbilire yirwiso asi: “Tu ze kokamba zoVafilisiti kesinya kwina.” Nye age kapi ga yi tanterere oguhwe.
2 Sauru kwa kere ponze zositata saGibeya mositji sopomegaranate moMigironi. Age kwa kere kumwe novagara 600.
3 (Ano Ahiya kwa simbire sikoverero sopomapepe. Age kwa kere munaAhitubu mutekurwaPinehasa zaEli, mupristeli gwaJehova moSiro. Ahitubu kwa kere mukurwaIkabodi.) Vakwayita kapi va yi divire asi Jonatana ana tundu po.
4 Monzira ezi ga here kupita Jonatana a ze kokamba zoVafilisiti kwa kere mo mamanya gavali gokufana ngwendi mazego. Emanya limwe kwa kere kesinya oku ano ekwawo kesinya kwina; limwe kwa li rukire Bosesi, ano ekwawo Sene.
5 Emanya limwe kwa kere koMuzogo. Alyo kwa li sikamekere ngwendi ngundi ntani kwa pirukilire koMikimasi, ano ekwawo kwa kere koMbindakano ntani kwa pirukilire koGeba.
6 Makura Jonatana ta tantere mukareli gwendi asi: “Tu ze kokamba zovagara ava va dira kurugana yovamba, nampo Jehova na ka tu rwira po, yeeyi kwato eyi nayi kondera Jehova mokutuvatera, yi kare asi tuvanzi ndi tuvasesu.”
7 Ano mukareli gwendi ta mu tantere asi: “Rugana nkenye eyi ono hara ntani zende nkenye oku ono hara, ame nani kukwama nkenye oku ono hara kuza.”
8 Makura Jonatana ta tanta asi: “Tu ze kovagara vena kesinya kwina yipo va ka tu mone.
9 Nsene nava ka tu tantera asi: ‘Sikameni poopo tu wize kweni!’ Twa hepa kukasikama poopo ntani kapisi tu ka va zire.
10 Nye nsene nava ka tanta asi: ‘Wizeni tu ya rwe.’ Ose natu ka za tu ka va rwise, yeeyi aso kuna kara sidiviso asi Jehova ana va gava momawoko getu.”
11 Makura Jonatana nomukareli gwendi tava zi kokamba zoVafilisiti, ano Vafilisiti tava tanta asi: “Tareni, Vahebeli kuna kutunda momakero omu va vanda!”
12 Vagara ava va kere mokamba tava tantere Jonatana nomukareli gwendi asi: “Wizeni tu ya mu tengeke ose vakweni!” Makura Jonatana ta tantere mukareli gwendi asi: “Kwama nge, yeeyi Jehova nava gava momawoko goVaisraeli.”
13 Makura Jonatana ta rondo kemanya, ano mukareli gwendi nage ta rondo a mu kwame. Jonatana ta rwisa Vafilisiti, ano mukareli gwendi ta dipaga Vafilisiti ava ga dilire kudipaga Jonatana.
14 Jonatana nomukareli gwendi kwa dipagere vakwayita wokusika koyiha 20 apa va hovere kurwisa Vafilisiti, ano pevango apa va va dipagerere kwa hulire posinano sosisupi.*
15 Vakwayita ava va kere mokamba ntani nava va kere mokamba zapeke nava va va homokerere kwa kere nowoma. Evhu kwa kankamene, ano Karunga ta ninki Vafilisiti va tukuke.
16 Vakwayita ava va takamesere Sauru moGibeya mositata sorudi rwaMbenyameni, kwa mwene omu vakwayita vana piyagana mokamba zononkore dawo.
17 Sauru ta tantere vakwayita ava ga kere nawo asi: “Varureni mu tare asi yilye ogu ana tundu po.” Apa va varwire, tava mono asi Jonatana nomukareli gwendi pwato.
18 Sauru ta tantere Ahiya asi: “Reta sikesa saKarunga gousili!” (Yeeyi sikesa saKarunga gousili kwa kere noVaisraeli posiruwo oso.*)
19 Apa ga uyungire Sauru nomupristeli, vakwayita kwa piyaganene unene mokamba zoVafilisiti. Makura Sauru ta tantere mupristeli asi: “Hageka eyi ono kurugana.”
20 Makura Sauru novakwayita ava ga kere nawo tava pongo va ze koyita. Awo tava ka gwana Vafilisiti kuna kulirwanesa vene navene nonomfuro ntani vana piyagana unene.
21 Ntani Vahebeli ava ngava kwatesa ko Vafilisiti posiruwo oso, ava va kere mokamba zoVafilisiti, kwa zire koVaisraeli ava ga pitisilire Sauru naJonatana.
22 Vakwayita navenye woVaisraeli ava va vende momukunda gonondundu goVaefurayimi tava zuvhu asi Vafilisiti vana duka, makura tava ka lipakerera kumwe noVaisraeli vakwawo va rwise Vafilisiti.
23 Jehova kwa poperere Vaisraeli ezuva olyo, ano awo tava twikire kurwa dogoro koBete-aveni.
24 Nye vakwayita woVaisraeli kwa rorokere unene ezuva olyo, yeeyi Sauru kwa gene asi: “Nkenye mukwayita ogu na lya nondya* komeho li ka toke ezuva ame na hana kufunda nonkore dange, va mu finge!” Yipo nye, kwato mukwayita ogu ga lire nondya.
25 Makura vakwayita navenye* tava zi momusitu, tava gwana usi pevhu.
26 Apa va ya sikire vakwayita momusitu, tava mono usi kuna kundjororoka, nye kwato ogu ga lire usi owo morwa awo kwa tjilire mugano gwaSauru.
27 Nye Jonatana kapi ga zuvhire mugano ogu va tulire po oguhwe, ta gusa mpango zendi ta zi dowo mousi. Apa ga lire usi makura ta kara hena nononkondo.
28 Makura gumwe ta tanta asi: “Oguho kwa gana asi: ‘Nkenye mukwayita ogu na lya nondya neina, va mu finge!’ Eyi yiyo vana rorokere vakwayita.”
29 Nye Jonatana ta tanta asi: “Otate vana reta udigu wounene mosirongo. Tareni omu nina gwana nonkondo morwa nina li usi.
30 Ngano vakwayita neina kuna li nondya dononkore dawo edi vana gwana, ngano vana dipaga Vafilisiti wovanzi.”
31 Ezuva olyo, awo kwa dipagere Vafilisiti kutundilira koMikimasi dogoro koAiyaroni, ano vakwayita kwa rorokere unene.
32 Makura vakwayita tava lihakanene yininke eyi va ka gwene. Awo kwa gusire nonzwi, nongombe ntani noyitana, tava yi dipaga tava li nyama zohonde.
33 Sauru kwa mu tanterere asi: “Vakwayita kuna kuzona kwaJehova pokulya nyama zohonde.” Makura Sauru ta tanta asi: “One kapi muna limburukwa. Retereni nge usimbu emanya lyenene.”
34 Sauru ta tanta asi: “Zendeni mu ka tantere vakwayita asi: ‘Nkenye gumwe gweni a rete ntwedu ntani nonzwi a ya yi dipagere pemanya eli, makura mu ya yi lye. Mwa ha zona kwaJehova pokulya nyama zohonde.’” Makura masiku ogo nkenye ogu ta twara ntwedu, tazi dipagere pemanya olyo.
35 Ano Sauru ta dikire Jehova sizambero. Esi kwa kere sizambero sokuhova esi ga dikilire Jehova.
36 Konyima, Sauru ta tanta asi: “Tu zeni tu sikure Vafilisiti masiku, tu ka va hakane emona lyawo dogoro ngurangura. Tatu ka va dipaga navenye.” Makura vantu tava tanta asi: “Rugana nkenye eyi ono kumona asi yiwa.” Ano mupristeli ta tanta asi: “Tu pureni ko Karunga gousili kuhamena yininke eyi.”
37 Makura Sauru ta pura Karunga asi: “Ni ze ni ka rwise Vafilisiti ndi? Ove no ka va gava momawoko goVaisraeli ndi?” Nye Karunga kapi ga mu limbwilire ezuva olyo.
38 Makura Sauru yipo ga tente asi: “Masimbi nagenye govantu ga wize ga ya papare unzoni ou vana rugana vantu naina.
39 Ame tani gana kwaJehova Karunga goMunamwenyo ogu ga popera Vaisraeli asi nampili munange Jonatana yige ana zono, va hepa kumudipaga.” Nye kwato ogu ga mu limbwilire.
40 Makura ta tantere Vaisraeli asi: “One tomu kara koruha rumwe, ano name namunange Jonatana tatu kara koruha rwapeke.” Vakwayita tava tantere Sauru asi: “Rugana nkenye eyi ono kumona asi yiwa.”
41 Sauru ta tantere Jehova asi: “Karunga goVaisraeli, tu limburura kupitira moTumimu.” Makura tazi horowora Jonatana naSauru, ano vantu tava ka za, morwa awo kapi va va gwene unzoni.
42 Sauru ta tanta asi: “Ruganeni fungu-fungu pokatji kange namunange Jonatana, yipo tu dive asi yilye ogu ana zono.” Makura tazi horowora po Jonatana.
43 Sauru ta pura Jonatana asi: “Tantera nge asi yisinke eyi ono rugana?” Makura Jonatana ta tanta asi: “Ame kuna li usi kompango zange. Nyame ogu, dipageni nge tupu!”
44 Makura Sauru ta tanta asi: “Karunga ngano a tengeke nge nsene o dira kufa.”
45 Nye vakwayita tava tantere Sauru asi: “Ngapi omu na fa Jonatana mokumona asi yige ana pe Vaisraeli efundo? Nokuwapa si! Ngano Jehova Karunga goMunamwenyo kapisi a pulisire nampili ruhuki rwendi rumwe ru gwire pevhu, yeeyi yige ana vatere Jonatana.” Ngesi yimo vakwayita va poperere Jonatana ntani kapi va mu dipagere.
46 Makura Sauru ta hageke kutjida Vafilisiti, ano Vafilisiti tava tengura kosirongo sawo.
47 Hompa Sauru kwa kere nononkondo moIsraeli. Age kwa rwisire nonkore nadinye edi dava kundurukidire kukwatera mo Vamowaba, Vaamoni, Vaedomu, vahompa vaSoba ntani noVafilisiti. Age nga fundu nkenye oku nga zi.
48 Age nga ru nouradi ntani kwa fundire Vaamareki ntani kwa poperere Vaisraeli kononkore dawo.
49 Vana vaSauru wovagara kwa kere: Jonatana, Isivhi ntani Malikisuwa. Age kwa kere novana vavali wovakadi; gomukondi po Merabu ano gomunona Mikali.
50 MukadaSauru kwa kere Ahinoamu munaAhimasi. Edina lyomukurona govakwayita vendi kwa kere Abineli munaNere. Abineli kwa kere mumbya goguhwe vaSauru.
51 Kisi kwa kere oguhwe vaSauru, ano Nere oguhwe vaAbineli, kwa kere munaAbiyeli.
52 Sauru noVafilisiti ngava ru yita siruwo nasinye esi nga pangere Sauru. Apa nga mono Sauru mugara gononkondo ndi gouradi, age nga mu ninki a kare mukwayita gwendi.
Nonkango dokonhi
^ Ndi “poharufa zosinano esi nadi vhura kupurura nohove mbali mezuva limwe.”
^ MoRuhebeli asi “ezuva olyo.”
^ MoRuhebeli asi “mboroto.”
^ MoRuhebeli asi “sirongo nasinye.”
