Samwere gokuhova 15:1-35
15 Makura Samwere ta tantere Sauru asi: “Jehova kwa tumine nge ni ka ku gwaveke o kare hompa govantu vendi Vaisraeli. Ngesi purakena eyi ana kukutantera Jehova.
2 Jehova Mupitisili govakwayita vemeguru kuna kutanta asi: ‘Ame ngani tengeka Vaamareki kweyi va hepekere Vaisraeli apa va tundire moEgipite.
3 Yipo nye, zende o ka dipage Vaamareki ntani ka zonagure yininke yawo nayinye. Kapisi o ka va fire nkenda; wa hepa kukadipaga vagara, vakadi, vanona, vakeke, nontwedu, nonzwi, nongameru ntani noyindongi.’”
4 Makura Sauru ta zigida vantu, tava varura moTeremu: Sivaro sovakwayita kwa kere 200 000, ano sivaro sovagara womorudi rwaJuda kwa kere 10 000.
5 Sauru ta zi kumwe novakwayita vendi dogoro kositata soVaamareki, makura tava ka vandera Vaamareki momuramba.
6 Sauru ta tantere Vakeni asi: “Tundeni mo mokatji koVaamareki, yipo ni dire kumuzonagura po kumwe nawo, yeeyi one kwa likida Vaisraeli eharo lyanarunye apa va tundire moEgipite.” Makura Vakeni tava tundu mo mokatji koVaamareki.
7 Konyima, Sauru ta dipaga Vaamareki kutundilira koHavhira dogoro koSuru pepi naEgipite.
8 Age ta kwata Agaga hompa goVaamareki, nye vantu navenye wokuhupa ko tava dipaga norufuro.
9 Nye Sauru novakwayita vendi kwa fililire nkenda Agaga nononzwi noyikombo nonongombe donongwa po noyimuna yimwe yokuneta po ntani noyininke nayinye yoyiwa. Awo kapi va here va yi zonagure po. Nye yininke yokudira mulyo neyi va dilire kuhara, kwa yi zonagwire.
10 Makura Jehova ta tantere Samwere asi:
11 “Ame kuna kulivera* kweyi na tura Sauru a kare hompa, yeeyi age kapi ga limburukwa nge ntani kapi ga sikisa mo eyi na mu tantera.” Samwere ta guwu unene ntani ta likwambere kwaJehova masiku nagenye.
12 Apa ga pindukire Samwere ngurangura zonene a ze kwaSauru, tava ka mu tantera asi: “Sauru ka zire koKarumeli a ka lidikire ngundi yipo va mu diworokere po, konyima yiyo ka zire koGiligali.”
13 Apa ga ya sikire Samwere kwaSauru, Sauru ta tanta asi: “Jehova ngano a ku tungike. Ame na sikisa mo nompangera daJehova.”
14 Nye Samwere ta mu pura asi: “Yisinke nye nina kuzuvhira nonzwi noyikombo nonongombe dina kukumba?”
15 Sauru ta tanta asi: “Ose kwa ka simba nonzwi noyikombo ntani nonongombe koVaamareki. Vakwayita kapi va ka dipaga nonzwi noyikombo ntani nonongombe donongwa po, yipo va ya yi gave ngonzambo kwaKarunga goge Jehova; nye ose kwa ka zonagura po nayinye yokuhupa ko.”
16 Makura Samwere ta tantere Sauru asi: “Hageka kuuyunga ni ku tantere eyi ka tanterere nge Jehova masiku.” Age ta limburura asi: “Tantera nge!”
17 Samwere ta tanta asi: “Nani ove kapi wa limwene asi ove kwato mulyo apa ga ku gwavekere Jehova o kare hompa gomarudi goVaisraeli ndi?
18 Konyima, Jehova kwa ku tumine, ta ku tantere asi: ‘Zende o ka dipage Vaamareki ava ava rugana yininke yoyidona. Ka va rwise dogoro o ka va zonagure po navenye.’
19 Morwasinke wa dilira kulimburukwa Jehova? Ove kwa ka gusa emona nampili ngomu wa yi divire asi nayi guvisa Jehova.”
20 Nye Sauru ta tantere Samwere asi: “Ame kwa limburukwa Jehova! Ame kwa za oku ga tumine nge Jehova ntani kwa ka simba Agaga hompa goVaamareki ntani kwa ka dipagere Vaamareki navenye.
21 Nye vakwayita vange kwa ka gusa nonzwi nonongombe donongwa po poyininke eyi va tente asi tu yi zonagure, yipo va yi gave ngonzambo kwaKarunga goge Jehova koGiligali.”
22 Makura Samwere ta tanta asi: “Ngoso Jehova kwa hara unene nonzambo deswakerero nononzambo dapeke kupitakana kumulimburukwa ndi? Kulimburukwa Jehova mulyo unene kupitakana nonzambo ntani kupurakena mulyo unene kupitakana magadi gononzwi donongara.
23 Yeeyi muntu ogu a dili kulimburukwa kwa lifana nomuntu ogu a zono pokuzanekeda, ano muntu gokulinenepeka kwa lifana nomuntu ogu a rugana umpure ntani ogu a karere yikarunga yoyimpempa.* Mokumona asi ove kapi wa limburukwa Jehova, age kapi ana hara o twikire kukara hompa.”
24 Makura Sauru ta tantere Samwere asi: “Ame na zona, yeeyi kapi na limburukwa nompangera daJehova neyi wa tanterere nge. Ame kwa tjilire vantu yiyo na rugene eyi va tanterere nge.
25 Yipo nye, gusira nge po ntani tengura kumwe name yipo ni ka karere Jehova.”
26 Nye Samwere ta tantere Sauru asi: “Ame kapi tani zi nove, yeeyi ove kapi wa limburukwa eyi ga ku tantera Jehova ntani Jehova kapi ana hara o twikire kukara hompa goVaisraeli.”
27 Apa ga pirukire Samwere a ze, Sauru ta kwata kohema zaSamwere zomawoko gomasupi, nye tazi tauka.
28 Makura Samwere ta mu tantere asi: “Neina Jehova ana kugusa uhompa ntani ngau gava kwagumwe ogu ga kupitakana.
29 Ntani hena, Karunga goVaisraeli ogu ga fumana, kapi a tanta yimpempa ndi a rundurure magano gendi,* yeeyi age kapi ga fana ngwendi muntu ogu a rundurura magano gendi.”*
30 Makura Sauru ta tanta asi: “Ame na zona, nye fumadeka nge komeho zomasimbi goVaisraeli ntani komeho zoVaisraeli. Tengura kumwe name, ni ka karere Karunga goge Jehova.”
31 Makura Samwere ta tengura kumwe naSauru, ano Sauru ta ka karera Jehova.
32 Samwere ta tanta asi: “Retereni nge Agaga hompa goVaamareki.” Makura Agaga ta zi kwaSamwere nowoma,* yeeyi age kwa litanterere asi: ‘Nampo kapi nava dipaga nge hena.’
33 Nye Samwere ta mu tantere asi: “Ngwendi moomu wa ninkisa vakadi va guve morwa ove kwa dipaga vana vawo norufuro, onyoko nawo ngava guva unene kupitakana vakadi ava va fisa vana vawo.” Makura Samwere ta dipaga Agaga norufuro komeho zaJehova moGiligali.
34 Kutunda opo, Samwere ta zi koRama, ano Sauru ta zi kembo lyendi koGibeya zaSauru.
35 Kutunda opo, Samwere ga lifililire kapi ga mwene hena Sauru, yeeyi Samwere kwa guvire unene morwa Sauru. Ano Jehova kwa liverere kweyi ga tulire Sauru a kare hompa goVaisraeli.
Nonkango dokonhi
^ Ndi “Ame nina guwu.”
^ MoRuhebeli asi “teraphim.”
^ Ndi “a livere.”
^ Ndi “a livere.”
^ Ndi nampo asi “ga hana woma.”
