Samwere gokuhova 16:1-23
16 Konyima, Jehova ta tantere Samwere asi: “Siruwoke ngo hageka kuguva morwa na nyoka Sauru a twikire kukara hompa goVaisraeli? Tura magadi moruvinga roge. Ame tani ku tumu kwaIsayi gomoBeterehema, yeeyi ame nina horowora munendi gumwe a kare hompa.”
2 Nye Samwere ta tanta asi: “Nsene nani za, apa nga yi zuvha Sauru, nga dipaga nge.” Jehova ta mu limburura asi: “Gusa ndema o ze nazo, makura ka tante asi: ‘Ame kuna wiza ni ya gave nzambo kwaJehova.’
3 Ngo zigide Isayi apa ngo ka gava nzambo makura ame ngani kutantera eyi ngo rugana. Wa hepa kugwaveka muntu ogu ngani kulikida.”
4 Samwere ta rugana eyi ga mu tanterere Jehova. Apa ga ka sikire moBeterehema, masimbi gomositata oso kwa kankamene apa ga gwanekerere nage, tava mu pura asi: “Ove kuna wizire yoyiwa ndi?”
5 Samwere ta limburura asi: “Nhi, ame kuna wizire yoyiwa. Ame kuna wiza ni ya gave nzambo kwaJehova. Likuhureni tu ze kumwe ni ka gave nzambo.” Makura ta kuhura Isayi novana vendi wovagara, ano konyima tava zigida va ka gave nzambo.
6 Apa va ya sikire, Samwere ta mono Eliyaba, makura ta litantere mwene asi: “Ogu yige ga gwaveka Jehova.”
7 Nye Jehova ta tantere Samwere asi: “Wa ha demenena kemoneko lyendi noure wendi, yeeyi kapisi yige nina horowora. Ame kapi ani tara eyi ava tara vantu, yeeyi vantu kudemenena kweyi ava mono, nye ame Jehova kumona eyi ya kara momutjima.”
8 Makura Isayi ta tantere Abinadaba a pite komeho zaSamwere, nye Samwere ta tanta asi: “Jehova kapi ana mu horowora nage.”
9 Konyima Isayi ta tantere Sama a pite komeho, nye Samwere ta tanta asi: “Jehova kapi ana mu horowora nage.”
10 Isayi kwa ninkire vana vendi ntambali va ze komeho zaSamwere, nye Samwere ta tantere Isayi asi: “Jehova kwato ogu ana horowora po pokatji kawo.”
11 Konyima, Samwere ta pura Isayi asi: “Ava yiwo velike vana woge wovagara ndi?” Age ta limburura asi: “Na kara nagumwe gomunona, nye ana tundu po. Age ana zi a ka lise nonzwi.” Makura Samwere ta tantere Isayi asi: “Tuma ko gumwe a ka mu zigide, yeeyi kapi natu lya dogoro a ya sike.”
12 Makura ta tumu muntu a ka mu zigide. Age kwa kere gomugeha, gomeho gomawa ntani gomuwa mosipa. Makura Jehova ta tanta asi: “Katuka o mu gwaveke, yeeyi yige nina horowora!”
13 Samwere ta gusa ruvinga omu mwa kere magadi, ta mu gwaveke komeho zovakuru vendi. Mpepo zaJehova kwa nkondopekere Ndafita kutunda ezuva olyo. Konyima, Samwere ta katuka, ta zi koRama.
14 Jehova kwa gusire nonkondo dendi kwaSauru, makura Jehova ta ninki magazaro gomadona* ga mu hepeke.
15 Vakareli vaSauru tava mu tantere asi: “Karunga ana kuninka magazaro gomadona ga ku hepeke.
16 Hompa, tantera vakareli woge ava vana kara komeho zoge va papare muntu ogu ga diva nawa kusika siumba. Apa ngaga ku gwana magazaro gomadona, age nga kusikira siumba yipo ngo lizuvhe ko hansa.”
17 Makura Sauru ta tantere vakareli vendi asi: “Paparereni nge mugara ogu ga diva kusika nawa siumba mu ka mu rete kwange.”
18 Mukareli gwendi gumwe ta tanta asi: “Ame na mona munaIsayi gomoBeterehema omu a siki nawa siumba. Age mukwayita gononkondo gouradi. Age ga diva kuuyunga nawa, muwa mosipa ntani Jehova nage ga kara.”
19 Makura Sauru ta tumu vantu kwaIsayi, va ka mu tantere asi: “Tantera munoge Ndafita ogu ana kulisa nonzwi a wize kwange.”
20 Isayi ta tura mboroto nompunda* zovhinyu posindongi ntani nosikombogona, makura ta yi gava kwaNdafita a yi tware kwaSauru.
21 Ndafita kwa zire kwaSauru, ta ka tameka kumuruganena. Sauru kwa mu here unene ntani kwa mu ninkire a mu simbire yirwiso yendi.
22 Sauru ta tumu mbudi kwaIsayi, ta mu tantere asi: “Pulisira Ndafita a twikire kuruganena nge, yeeyi ame kwa mu hara.”
23 Nkenye apa ngaga mu gwana Sauru magazaro gomadona, Ndafita nga mu sikire siumba makura Sauru ta litura ntani ta lizuvhu ko hansa, ano magazaro gomadona taga mu tundu.
Nonkango dokonhi
^ MoRuhebeli asi “mpepo zondona.” Kwa moneka hena movelise 15, 16 ntani 23.
^ Nondjato va ruganesa koyipapa yoyikorama. Tara koMauzera.
