Samwere gokuhova 17:1-58
17 Makura Vafilisiti tava pongaike vakwayita* vawo va ka rwe yita. Awo kwa pongere moSoko, sitata sorudi rwaJuda ntani kwa dikire kamba zawo moEfesi-damimu, pokatji kaSoko naAseka.
2 Sauru noVaisraeli nawo tava pongo ntani tava dike kamba zawo moMuramba gwaEra, makura tava liwapaikire va ka rwe yita noVafilisiti.
3 Vafilisiti kwa kere kondundu zimwe, ano Vaisraeli kwa kere kondundu zapeke ntani pokatji kawo kwa kere po muramba.
4 Mokamba zoVafilisiti ta mu tundu mugara gononkondo, edina lyendi Golyata. Age kwa tungire moGata, ano musika gwendi kwa hulire koyiha yonometa ntatu.*
5 Age kwa dwere ekoli lyosivera songoporo komutwe gwendi nosikoverero soukwayita esi sa kere noyininke yokufana ngwendi nongande. Mukumo gwaso gokusika koyiha yonokilograma 57.*
6 Age kwa dwere yivera yongoporo monomupindi dendi ntani kwa simbire egonga lyesupi lyongoporo komugongo gwendi.
7 Sitji sekegonga lyendi lyere kwa fene ngwendi nkambo ezi ava honzere ntani sivera sekegonga lyendi kwa kere nomukumo gokusika koyiha yonokilograma ntambali.* Ano muntu ogu ga mu simbilire silikandwiso sendi kwa pitire komeho zendi.
8 Makura Golyata ta sikama, ta zigire vakwayita woVaisraeli asi: “Morwasinke muna wizire mu ya tu rwise? Ngoso kapi mwa yi diva asi ame kwa fumana mokatji koVafilisiti ndi? Nani one kapisi vakareli vaSauru? Horoworeni mugara gumwe ni ya rwe nage.
9 Nsene na ya rwa name makura a dipage nge, ose ngatu kara vakareli veni. Nye nsene nani mu funda ni mu dipage, one ngomu kara vakareli vetu ntani ngomu tu ruganena.”
10 Golyata* ta swaura Vaisraeli, ta tanta asi: “Ninkeni mugara ogu muna horowora tu ya rwe!”
11 Apa ga zuvhire Sauru noVaisraeli eyi ga uyungire Golyata,* tava tukuka ntani tava kara nowoma.
12 MoEfurata ndi Beterehema zomoJuda, mwa kere mumati gedina Ndafita munalsayi. Isayi kwa kere novana wovagara ntantatu ntani kwa kurupire posiruwo esi ga pangerere Sauru.
13 Vana valsayi vatatu wovakondi po kwa zire naSauru koyita. Madina gawo kuna kara: mbeli Eliyaba, sikwamambeli Abinadaba ntani gwautatu Sama.
14 Ndafita yige ga kere gomunona po, ano vakuru vendi vatatu kwa zire kumwe naSauru.
15 Poyiruwo yimwe Ndafita nga sigi Sauru a ze a ka lise nonzwi doguhwe moBeterehema.
16 Posiruwo oso, Golyata* nga wiza nkenye ngurangura nongurova a ya sikame komeho zoVaisraeli. Age kwa yi rugene mazuva 40.
17 Makura lsayi ta tantere munendi Ndafita asi: “Gusa sikumba* esi sina kara nombuto zokukanga ntani nonomuhwi donomboroto murongo, o yi twarere usimbu vakuru woge mokamba.
18 Ntani gusa nokasa* murongo o di twarere mupitisili govakwayita eyovi; ka tare hena omu vana karere vakuru woge ntani ka piture ko sininke esi sina kulikida asi vawaawa.”
19 Vakuru vendi kwa kere kumwe naSauru ntani novakwayita woVaisraeli moMuramba gwaEra, va rwise Vafilisiti.
20 Ndafita ta pinduka ngurangura zonene, ta ninki gumwe a takamese nonzwi, makura ta rongere ta zi ngwendi moomu va mu tanterere oguhwe lsayi. Apa ga ka sikire mokamba, ta ka gwana vakwayita kuna kuza oku ava rwire yita oku tava zigire.
21 Vaisraeli noVafilisiti, navenye kwa sikeme pomavango gawo ntani kwa livyukire.
22 Ndafita ta sigi murongero gwendi komuntu ogu a takamesa nomurongero, makura ta dukire oku va kere vakwayita. Apa ga ka sikire, ta pura omu vana karere vakuru vendi.
23 Apa ga uyungire nawo, mugara gononkondo gedina Golyata goMufilisiti ogu ga tungire moGata, ta wiza a tunde oku va kere vakwayita woVafilisiti. Age kwa rugurukire nonkango edi ga uyungire pomuhowo, makura Ndafita ta zuvhu eyi ga uyungire.
24 Apa va mu mwene vakwayita woVaisraeli, tava tukuka makura tava duka.
25 Vakwayita woVaisraeli tava tanta asi: “Tareni mugara ogu ana kuwiza! Age kuwiza nkenye apa a ya swaure Vaisraeli. Nkenye ogu nga mu dipaga, hompa nga mu pa emona lyenzi ntani nga mu pa munendi gomukadi a kware. Age nga ninka epata lyoguhwe li dire kufuta mutero ntani li dire kulihameka moyirugana yimwe.”
26 Ndafita ta pura vakwayita ava va sikeme pepi nendi asi: “Yisinke ngava pa mugara ogu nga dipaga Mufilisiti ogo, yipo a guse Vaisraeli eswau? Mufilisiti musinke gokudira kukuhuka* ana kuswaura vakwayita vaKarunga goMunamwenyo?”
27 Makura vantu tava mu tantere yininke eyi va mu tanterere pomuhowo, kuhamena eyi ngava ruganena mugara ogu nga mu dipaga.
28 Apa ga mu zuvhire mukurwendi Eliyaba kuna kuuyunga novakwayita, ta handukire Ndafita, ta tanta asi: “Yisinke ono ya hara ko oku ntani yilye ogu ono sigire nonzwi dononsesu momburundu? Ove wa yi lideka sili ntani na diva sitambo seyi ono wizire; ove kuna wiza tupu o ya tare omu vana kurwa yita.”
29 Makura Ndafita ta tanta asi: “Yisinke nye nina zono? Ame kuna pura tupu.”
30 Makura ta piruka, ta pura muntu gwapeke yininke yokulifana, ano vantu kwa mu limbwilire ngwendi moomu va mu limbwilire vakwawo.
31 Vantu kwa zuvhire eyi ga uyungire Ndafita, makura tava ka yi tantera Sauru. Sauru ta tumu vantu va ka mu zigide.
32 Ndafita ta tantere Sauru asi: “Vantu woge kapisi hepero va kare nowoma. Mukareli goge na za a ka rwise Mufilisiti ogo.”
33 Nye Sauru ta tantere Ndafita asi: “Ove kapi to vhuru kuza o ka rwe noMufilisiti ogo, yeeyi ove o munona, ano age kwa kara mukwayita kutunda unona wendi.”
34 Makura Ndafita ta tantere Sauru asi: “Apa ga lisire mukareli goge nonzwi doguhwe, nyime yipo ga wizire, ta ya kwata po nzwi zimwe. Ano sikando simwe erundu kwa wizire tali ya kwata po nzwi zimwe.
35 Ame kwa tjidire yikasama oyo tani yi toona, makura tani popere nonzwi. Apa ya homokerere nge, tani yi kwata konohuki dayo,* makura tani yi dipaga.
36 Mukareli goge kwa dipagere nyime nerundu. Ano Mufilisiti ogu va dira kurugana yovamba nage yimo nani mu dipaga ngwendi yikasama yina, yeeyi age kuna kuswaura vakwayita vaKarunga goMunamwenyo.”
37 Ndafita ta tanta hena asi: “Jehova ogu ga popera nge kwanyime ntani kerundu, yige nga popera nge momawoko goMufilisiti ogu.” Makura Sauru ta tantere Ndafita asi: “Zende, ngano Jehova a kare nove.”
38 Sauru ta pe Ndafita yikoverero yendi. Ta mu dwareke ekoli lyosivera songoporo komutwe ntani nosikoverero soukwayita.
39 Makura Ndafita ta zweke rufuro rwendi mosikoverero. Apa ga ninkire asi a ze, kapi ga vhulire kugenda, yeeyi kapi ga yi yika. Ndafita ta tantere Sauru asi: “Ame kapi nina kuvhura kugenda, yeeyi kapi na yi yika.” Makura Ndafita ta yi hutura.
40 Ndafita ta gusa mpango zendi ntani ta tora tumanya tutano tokuliudinga momuramba, makura ta tu tura momalimba gondjato zendi ezi a simbi apa a lisa nonzwi. Ano age kwa kwatererere sizugumiso makura ta hedere Golyata.*
41 Golyata* kwa hederere pepi naNdafita, ano ogu ga mu simbilire silikandwiso sendi kwa kere komeho zendi.
42 Golyata* apa ga mwene Ndafita, ta mu sense morwa age kwa kere mumati, age hena mugeha ntani muwa mosipa.
43 Golyata* ta tantere Ndafita asi: “Ngoso ame mbwa nye o wizire nge noyitji ndi?” Makura Golyata ta fingi Ndafita medina lyoyikarunga yendi.
44 Golyata* ta tantere Ndafita asi: “Wiza kwange ni ya gave nyama zoge koyidira ntani koyikasama yi ya ku lye.”
45 Ndafita ta tantere Golyata* asi: “Ove kuna kuwiza kwange norufuro negonga lyere neli lyesupi, nye ame tani wiza koge medina lyaJehova Karunga govakwayita woVaisraeli ogu ono swaura, ogu a pitisire vakwayita vemeguru.
46 Neina Jehova na ku gava momawoko gange ntani tani kudipaga ni ku tete mutwe. Ano yimpu yoVafilisiti, tani yi gava koyidira nokoyikasama va yi lye. Vantu navenye ngava yi diva asi Vaisraeli kwa kara naKarunga gousili.
47 Navenye ava vana kara apa nava yi diva asi Jehova kapi a popere norufuro ndi negonga, yeeyi Jehova yige a tokora asi yilye na funda moyita ntani age na mu gava namuvenye momawoko getu.”
48 Makura Golyata* ta tameke kugenda a hedere pepi naNdafita, nye Ndafita ta duka usimbu a ze oku va kere Vafilisiti a ka gwane Golyata.
49 Ndafita ta gusa emanya mondjato zendi ta li zuguma, makura ta li ka toona Golyata* mosipara. Ano emanya ta li tomona sipara sendi, ta gwire pevhu.
50 Yipo nye, Ndafita kwa fundire Golyata* nosizugumiso ntani nemanya. Age kwa dipagere Golyata nampili ngomu ga dilire kukara norufuro.
51 Ndafita ta duka, ta ka sikama pepi nage, ta gusa rufuro rwaGolyata* mosiraro saro, ta tete ko mutwe gwendi yipo a divilise asi ana fu. Apa va mwene Vafilisiti asi mukwayita gwawo gononkondo ana fu, tava duka.
52 Vakwayita woVaisraeli ntani womorudi rwaJuda tava zigire, makura tava tjida Vafilisiti kutundilira momuramba dogoro pomavero gaEkironi. Ano yimpu yoVafilisiti kwa kere monzira kutundilira koSarayimu dogoro koGata ntani koEkironi.
53 Apa va hagekere Vaisraeli kutjida Vafilisiti, tava tengura va ka guse yininke eyi ya kere mokamba zoVafilisiti.
54 Ndafita ta gusa mutwe gwaGolyata* tagu twara koJerusarema, nye ta tura yirwiso yaGolyata motende zendi.
55 Sauru apa ga mwene Ndafita kuna kuza a ka rwe naGolyata,* ta pura Abineli mukurona govakwayita asi: “Abineli, ogo mumati muna yilye?” Abineli ta mu limburura asi: “Tani gana koge asi name kapi tani diva hompa.”
56 Hompa ta tanta asi: “Ka pure asi muna yilye ogu.”
57 Konyima zapa Ndafita ga dipagere Golyata,* Abineli ta twara Ndafita kwaSauru age ana kwaterere mutwe gwaGolyata mokuwoko kwendi.
58 Sauru ta mu pura asi: “Ove muna yilye?” Ndafita ta mu limburura asi: “Ame muna gomukareli goge lsayi gomoBeterehema.”
Nonkango dokonhi
^ MoRuhebeli asi “nokamba.”
^ MoRuhebeli asi “ponocubit 6 nounene wewoko.” Tara App. B14.
^ MoRuhebeli asi “noshekel 5 000.” Tara App. B14.
^ MoRuhebeli asi “noshekel 600.” Tara App. B14.
^ MoRuhebeli asi “Mufilisiti.”
^ MoRuhebeli asi “Mufilisiti.”
^ MoRuhebeli asi “Mufilisiti.”
^ MoRuhebeli asi “ephah zimwe.” Tara App. B14.
^ MoRuingilisa asi cheese.
^ MoRuhebeli asi “va dira kurugana yovamba.”
^ Ndi “konompanda dayo.” MoRuhebeli asi “kononzwedu dayo.”
^ MoRuhebeli asi “Mufilisiti.”
^ MoRuhebeli asi “Mufilisiti.”
^ MoRuhebeli asi “Mufilisiti.”
^ MoRuhebeli asi “Mufilisiti.”
^ MoRuhebeli asi “Mufilisiti.”
^ MoRuhebeli asi “Mufilisiti.”
^ MoRuhebeli asi “Mufilisiti.”
^ MoRuhebeli asi “Mufilisiti.”
^ MoRuhebeli asi “Mufilisiti.”
^ MoRuhebeli asi “Mufilisiti.”
^ MoRuhebeli asi “Mufilisiti.”
^ MoRuhebeli asi “Mufilisiti.”
^ MoRuhebeli asi “Mufilisiti.”
