Samwere gokuhova 18:1-30
18 Apa ga mene kuuyunga Ndafita naSauru, Jonatana ta tulisa po ukaume wounene naNdafita. Ano Jonatana ta tameke kuhara unene Ndafita ngwendi moomu ga lihara mwene.*
2 Kutunda ezuva olyo, Ndafita ta kara kumwe naSauru ntani kapi ga mu pulisilire a tengure kembo lyoguhwe.
3 Makura Jonatana naNdafita tava tura po egwanekero,* yeeyi Jonatana kwa here Ndafita ngwendi moomu ga lihara mwene.*
4 Jonatana ta hutura sikoverero sendi somawoko gomasupi, ta gusa rufuro rwendi, uta wendi wonkanza ntani noliva, makura ta yi gava kwaNdafita.
5 Ndafita ta tameke kuza koyita ntani nga yi mu tompoka* nkenye oku nga mu tumu Sauru. Makura Sauru ta mu horowora a kare mupitisili govakwayita, ano eyi kwa hafesere vantu navenye novakareli vaSauru.
6 Apa nga tundu Ndafita novakwawo koyita eyi nga ru noVafilisiti, vakadi ngava tundu moyitata nayinye yoVaisraeli, awo kuna kudimba oku tava dana nokusika nongomagona noyikitara yomarugodi gatatu va gwanekere nahompa Sauru.
7 Vakadi ava ngava va hamberere ngava dimbi asi:
“Sauru kwa dipaga vantu mayovi,ano Ndafita kwa dipaga vantu mayovi nomurongo.”
8 Eyi kwa handukisire unene Sauru ntani kapi ga haferere rusumo oro, yeeyi age kwa tente asi: “Awo kuna kutanta asi Ndafita kwa dipaga vantu mayovi nomurongo, nye ame vantu mayovi tupu. Age ntaantani va mu ture a kare hompa!”
9 Kutunda ezuva olyo, Sauru kapi ga huguvarere hena Ndafita.
10 Ezuva lyokukwama ko, magazaro gomadona* taga gwana Sauru makura ta tameke kuporofeta monzugo, age Ndafita kuna kusika siumba ngwendi moomu ga hwa kuyirugana. Ano Sauru kwa kwatererere egonga,
11 makura ta tanda egonga oku ta litantere asi: ‘Tani wurura Ndafita negonga.’ Nye Ndafita kwa mu hendukire yikando yivali.
12 Makura Sauru ta tjira Ndafita morwa Jehova kwa kere nage, nye Karunga kapi ga kere naSauru.
13 Makura Sauru ta ninki Ndafita a ze, ta mu tura a kare mupitisili govantu eyovi. Ndafita nga pitisire vakwayita moyita.
14 Ndafita nga yi mu tompoka nkenye eyi nga rugana ntani Jehova kwa kere kumwe nage.
15 Apa ga mwene Sauru asi Ndafita kuna kumutompoka, ta mu tjira.
16 Nye Vaisraeli navenye ntani novantu womorudi rwaJuda kwa here Ndafita, morwa age nga va pitisire moyita.
17 Konyima Sauru ta tantere Ndafita asi: “Ame tani ku pe munange gomukadona gomukondi Merabu, o mu kware. Nye wa hepa kutwikira kuruganena nge ngomukwayita gouradi ntani wa hepa kurwira po Jehova.” Yeeyi Sauru kwa tente asi: ‘Ame kapi nani dipaga Ndafita, nye Vafilisiti yiwo nava mu dipaga.’
18 Makura Ndafita ta tantere Sauru asi: “Name nepata lyotate kwato mulyo moIsraeli. Ngapi nye omu nani kara tamweyi zahompa?”
19 Nye apa sa sikire siruwo a gave Sauru munendi Merabu kwaNdafita, age opo Sauru nare ga mu gava kwaAdiliyeli gomoMehora* a mu kware.
20 MunaSauru Mikali kwa here Ndafita. Apa ga yi zuvhire Sauru, ta yi hafere.
21 Makura Sauru ta tanta asi: “Tani gava munange Mikali kwaNdafita yipo ngani gwane mpito zongwa zokumukwata, ngava mu dipage Vafilisiti.” Sauru ta tantere hena Ndafita asi: “Ninka o kare tamweyi zange naina.”
22 Sauru ta tantere hena vakareli vendi asi: “Ka tantereni Ndafita mokahorehore asi: ‘Hompa novakareli vendi navenye vana ku hafere. Kara tamweyi zahompa.’”
23 Vakareli vaSauru apa va yi tanterere Ndafita, age ta tanta asi: “One kuna kugazara asi ayo ureru kukwara munahompa, mokumona asi ame ruhepo ntani kwato mulyo?”
24 Makura vakareli vaSauru tava ka tantera Sauru eyi ga va tanterere Ndafita.
25 Makura Sauru ta tanta asi: “Ka tantereni Ndafita asi: ‘Hompa kapi ana hara yigondwa yapeke, age kuna hara yipapa yokougara 100 yoVafilisiti yipo a tengeke nonkore dendi.’” Sauru kwa here a gende Ndafita konhi yipo va mu dipage Vafilisiti.
26 Makura vakareli vaSauru tava yi tantere Ndafita, ano Ndafita ta yi hafere a kare tamweyi zahompa. Komeho si sike mo siruwo sokufuta hompa,
27 Ndafita kwa zire novakwayita vendi, tava ka dipaga Vafilisiti 200, makura ta twara kwahompa yipapa nayinye yokougara yipo a kare tamweyi zendi. Makura Sauru ta gava munendi Mikali kwaNdafita a mu kware.
28 Sauru ta dimburura asi Jehova kwa kara naNdafita ntani munendi Mikali kwa here Ndafita.
29 Eyi kwa ninkisire Sauru a tjire unene Ndafita, makura Sauru ta kara nkore zaNdafita eparu lyendi nalinye.
30 Vahompa woVafilisiti apa ngava zi va ka rwe yita noVaisraeli, Ndafita nga yi mu tompoka* nkenye apa kupitakana vakareli vaSauru, ano age kwa mu fumadekere unene.
Nonkango dokonhi
^ Ndi “ga hara mwenyo gwendi.”
^ Ndi “elizuvhasano.”
^ Ndi “ga hara mwenyo gwendi.”
^ Ndi “nga ruganesa nondunge.”
^ MoRuhebeli asi “mpepo zondona.”
^ Kumoneka asi kwa tamba Abeli-mehora.
^ Ndi “nga ruganesa nondunge.”
