Samwere gokuhova 19:1-24
19 Konyima, Sauru ta tantere munendi Jonatana ntani novakareli vendi navenye asi ana hara kudipaga Ndafita.
2 Mokumona asi munendi Jonatana kwa here unene Ndafita, Jonatana ta tantere Ndafita asi: “Otate vana hara kukudipaga. Ngo takamese mungura ngurangura ntani ngo ze o ka vande kevango oku nava dira kukugwana.
3 Ame ngani za ni ka sikame notate kevango eli ngo kara. Makura ngani ka uyunga nawo kukuhamena, ano nkenye eyi ngava uyunga ngani ya yi ku tantera.”
4 Jonatana kwa tanterere oguhwe Sauru yininke yoyiwa kuhamena Ndafita. Age kwa tente asi: “Hompa kapisi a rugane yoyidona* mukareli gwendi Ndafita, yeeyi nayimwe si ga mu zona ntani eyi ga mu ruganena kwa mu retera uwa.
5 Age kwa tulire eparu lyendi mosiponga apa ga rwisire Golyata,* makura Jehova yipo ga vaterere Vaisraeli va funde. One mwa yi mwene ntani mwa hefe unene. Yisinke nye nomu tulira nzo pokudipaga Ndafita? Age kapi ga rugana yininke yoyidona. Nsene nomu yi rugana, one nomu tjisanga honde zomuntu ga hana unzoni.”
6 Sauru ta purakene kwaJonatana, makura ta gana asi: “Ame tani gana kwaJehova Karunga goMunamwenyo asi kapi ngani mu dipaga.”
7 Konyima Jonatana ta zigida Ndafita, ta mu tantere yininke eyi nayinye ntani Jonatana ta twara Ndafita kwaSauru, makura Ndafita ta twikire kuruganena Sauru ngwendi pomuhowo.
8 Konyima yita ta yi tameke hena, ano Ndafita ta zi a ka rwe noVafilisiti, ta ka dipaga Vafilisiti wovanzi. Ano ava ga dilire kudipaga tava duka.
9 Ezuva limwe, apa ga hingilire Sauru monzugo age ana kwaterere egonga lyendi, Jehova ta mu ninki a kare nomagazaro gomadona,* age Ndafita kuna kusika siumba.
10 Sauru ta tanda Ndafita egonga, nye Ndafita ta li tembe, makura ta li ka litoona mekuma. Ndafita ta tjwayuka masiku ogo.
11 Konyima, Sauru ta tumu vantu va ze va ka nomene embo lyaNdafita yipo va ka mu dipage ngurangura, nye Mikali mukadaNdafita ta mu tantere asi: “Nsene kapi no tjwayuka masiku ganaina, mungura ngava kudipaga.”
12 Makura Mikali ta vatere Ndafita a pitire pekende yipo a tjwayuke.
13 Age ta gusa sikarunga,* ta si tura pombete ntani ta tura komutwe gwaso nohuki dosikombo, makura ta si kudumike nosikoverero.
14 Sauru ta tantere vantu va ka simbe Ndafita, nye Mikali ta va tantere asi: “Ndafita ta vere.”
15 Makura Sauru ta tumu vantu kwaNdafita va ka mu tare, ta va tantere asi: “Ka mu reteni ngorooro age pombete zendi ni ya mu dipage.”
16 Apa va hwililire monzugo, tava mono sikarunga* pombete nonohuki dosikombo komutwe gwaso apa ngano ga saterere Ndafita.
17 Makura Sauru ta pura Mikali asi: “Yisinke ono kumbagerere nge nokuninka nkore zange zi tjwayuke?” Mikali ta limburura Sauru asi: “Age ka tanterere nge asi ta dipaga nge nsene kapi nani mu siga a ze!”
18 Ndafita kwa tjwayukire a ze kwaSamwere koRama. Age kwa ka mu tanterere nayinye eyi ga mu rugene Sauru. Makura tava zi kumwe, tava ka kara moNayoto.
19 Konyima Sauru kwa mu tanterere asi: “Ndafita mweli moNayoto, moRama.”
20 Makura Sauru ta tumu vantu va ka kwate Ndafita. Apa va ka mwene vaporofete wovakurupe kuna kuporofeta ntani Samwere ana sikama a va pitisire, mpepo zaKarunga tazi gwana vantu ava ga tumine Sauru, makura nawo tava tameke kuporofeta.
21 Apa va ka yi tanterere Sauru, age ta tumu ko hena vantu vapeke makura nawo tava tameke hena kuporofeta. Sauru ta tumu ko hena mbunga zautatu, ano nawo tava tameke hena kuporofeta.
22 Konyima, Sauru nage ta zi koRama. Apa ga ka sikire petope lyenene eli lya kara moSeku, ta pura vantu asi: “Kupi ko Samwere naNdafita?” Makura awo tava mu limburura asi: “Moveli moNayoto moRama.”
23 Apa ga gendere a ze koNayoto, mpepo zaKarunga nage tazi mu gwana makura ta gendi oku ta porofeta dogoro ta ka sika moNayoto.
24 Sauru nage ta taura yikoverero yendi ntani nage ta porofeta komeho zaSamwere ntani age kwa rere pevhu muherehere ezuva nalinye nomasiku mudima. Eyi yiyo ava uyungire asi: “Nani Sauru nage muporofete?”
Nonkango dokonhi
^ MoRuhebeli asi “a zonene.”
^ MoRuhebeli asi “Mufilisiti.”
^ MoRuhebeli asi “nompepo zondona.”
^ MoRuhebeli asi “teraphim.”
^ MoRuhebeli asi “teraphim.”
