Samwere gokuhova 2:1-36
2 Makura Hana ta kanderere asi:
“Ame nina hafa morwa Jehova;Jehova ga zerura ruvinga rwange.*
Ame nina zahura kana kange ni limburure nonkore dange nouradi,yeeyi ame kuhafera monkedi omu o popere.
2 Kwato ogu ga pongoka ngwendi Jehova,kwato ogu ga kufanantani kwato emanya eli lya fana ngwendi Karunga gwetu.
3 Hagekeni kulinenepeka;mwa ha uyunga nonkango donondona,yeeyi Jehova Karunga ga diva nayinyentani age kupangura mouhunga yirugana yovantu.
4 Age kutezagura yikutji yovagara wononkondo,nye age kugava nonkondo kwava va dira nonkondo.*
5 Ava ngava li nawa, va hepa kuruganena vantu yipo va gwane nondya,nye wonzara kapi hena ngava fa nzara.
Mukadi gonganze ana reta vana wovagara ntambali,nye mukadi ogu ga kara novana wovanzi wovagara kuna kufa komukuma.
6 Jehova kudipaga ntani kuparura;*age kutwara muntu mEyendo* ntani kupindura muntu koufe.
7 Jehova kuretera muntu ruhepo ntani kungawopeka;age kununupika ntani kunenepeka.
8 Age kugusa vantu wokudira mulyo mombundu;age kukatura vantu woruhepo menoto,*ava ninke va hingire novahompa,ava pe yipundi yoyinene.
Etateko lyouzuni kwa kara momawoko gaJehova,makura yiyo ga tura po evhu.
9 Age kutakamesa vantu ava ava mu limburukwa,nye vantu wovadona ngava zonagura momundema,yeeyi muntu kapi a parukire mononkondo danyamwendi.
10 Jehova nga zonagura vantu ava ava mu rwanesa;*age ngava handukira ngwendi sindundumo somvhura kutundilira meguru.
Jehova nga pangura dogoro oku wa ka twa uzuni.Age nga pa nonkondo hompa ogu ga horoworantani nga zerura ruvinga* romuntu ogu ga gwaveka.”
11 Makura Elikana ta tengura kembo lyendi koRama, nye mumati kwa kere kumwe nomupristeli Eli, a ruganene* Jehova.
12 Vana vaEli kwa kere vantu wovadona ntani awo kapi va fumadekere Jehova.
13 Mevango lyokugusa eyi ya tumbukira vapristeli pononzambo edi ngava reta vantu, eyi yiyo ngava rugana: Apa nga gava muntu nzambo, mukareli gomupristeli nga wiza norutugo rononyara ntatu kokayiga aka vana kuterekera nyama,
14 ta ru tu mwankenye kayiga aka vana kuterekera, ano nkenye eyi naru ka twa ngayi gusa mupristeli. Eyi yiyo ngava rugana koVaisraeli navenye ava ngava wiza koSiro.
15 Ntani komeho muntu a hwike magadi gokonzambo, mukareli gomupristeli nga wiza a ya tante asi: “Gava nyama komupristeli azi dose. Age kapi ana hara nyama zokutereka, nye age kuna hara nyama zokudira kutereka.”
16 Nsene muntu ogo a tanta asi: “Va hove tanko kuhwika magadi, konyima ntani no gusa po nkenye eyi ono hara,” mukareli ogo nga tanta asi: “Hawe, zi pa nge ngesi, ngano tani zi ku hakana.”
17 Vakareli kwa zonene unene kwaJehova, yeeyi awo kapi va fumadekere nonzambo daJehova.
18 Samwere nga ruganene Jehova nampili ngomu ga kere simpe munona ntani age nga dwara sikoverero sopomapepe.
19 Ntani ozina ngava mu honzere hema zomawoko gomasupi nkenye mvhura ntani ngava zi mu twarere apa ngava zi namugara gwawo va ka gave nzambo zankenye mvhura.
20 Makura Eli ta tungike Elikana namukadendi. Age kwa tanterere Elikana asi: “Jehova ngano a ku pe munona kupitira momukadi ogu, yipo a pinganene po munona ogu mwa gava kwaJehova.” Makura awo tava tengura kembo.
21 Konyima, Jehova ta diworoka Hana, makura ta reta hena vanona wovamati vatatu ano wovakadona vavali. Samwere kwa twikilire kukarera Jehova ngomu ga kulire.
22 Eli kwa kurupire unene, nye nga zuvhu nayinye eyi ngava rugana vana vendi koVaisraeli nomu ngava ligwanekere panyama novakadi ava ngava rugana pevero lyonkongoronzugo.*
23 Age ngava pura asi: “Morwasinke omu ruganene yininke eyi? Yeeyi ame kuna kumuzuvhira yininke yoyidona kovantu.
24 Hagekeni vana vange, yininke eyi yina kuzuvhaika mokatji kovantu vaJehova yidona.
25 Nsene muntu a zonena mukwawo, gumwe kuvhura a mu likwamberere po kwaJehova;* nye nsene muntu a zonena Jehova, yilye ogu na mu likwamberera po?” Nye awo kapi ngava purakene kwaguhyawo, ano Jehova kwa here ava dipage.
26 Ngomu ga kulire Samwere, Jehova novantu kwa twikilire kumuhara.
27 Muporofete gwaKarunga ta zi kwaEli, ta mu tantere asi: “Jehova kuna tanta asi: ‘Nani kapi na lidivisire konyokokuru noruvharo rwawo apa va kere moEgipite ngovapika vaFarawo?*
28 Awo kwa va horowere mokatji komarudi goVaisraeli nagenye va ruganene nge ngovapristeli ntani va ze kosizambero va ka gave nonzambo, yitutumikidiso yedumba lyewa* ntani va dware sikoverero sopomapepe komeho zange. Ntani ame kwa geve nonzambo nadinye doVaisraeli* dokuhwika konyokokuru noruvharo rwawo.
29 Morwasinke omu dilire kufumadeka nonzambo dange* edi na mu pangera mu zambe mevango eli na tunga? Morwasinke wa fumadekera vana woge kupitakana nge? One kuna kulineteka nyamweni pokulya maruha gomawa po gononzambo edi ava gava vantu vange Vaisraeli.
30 “‘Eyi yiyo ana kuuyungira Jehova Karunga goVaisraeli asi: “Nampili ngomu na tente asi ruvharo roge noru ronyokokuru nga ru ruganena nge ngovapristeli,” nye Jehova ngesi kuna kutanta asi: “Ame kapi ngani yi pulisira yi horoke, morwa ame kufumadeka ava ava fumadeke nge ntani ame kapi ani hafere ava ava dili kufumadeka nge.”
31 Mazuva ntaantani ga sike apa ngani gusa nonkondo doge* nedi doruvharo ronyokokuru. Kutunda opo, kwato gemepata lyoge ogu nga sika koukurupe.
32 Posiruwo oso, ame ngani ruganena Vaisraeli yininke yoyiwa. Ano ove ngo mona nkore mevango eli ava karere nge ntani moruvharo roge kapi nga mu kara mukurupe.
33 Mugara gomoruvharo roge ogu ngani dira kuhagekesa kurugana kosizambero, nga ninkisa meho goge ga dire kumona nawa ntani nga ku retera ruguwo,* nye sinzi sovantu womoruvharo roge ngava va dipaga norufuro.
34 Eyi yiyo ngani rugana vana woge, Hofini naPinehasa, yipo o dive asi eyi nina uyunga usili: Awo ngava fa ezuva limwe tupu.
35 Makura ame ngani horowora mupristeli gomulimburukwi. Age nga sikisa mo eyi ya kara momutjima gwange ntani ame ngani ninka womoruvharo rwendi va ruganene nge ngovapristeli. Age nga ruganena muntu ogu ngani gwaveka.
36 Ano nkenye ogu nga hupa po moruvharo roge, nga wiza a ya likwambere kwendi a mu fute yimaliwa ntani a mu pe mboroto. Age nga tanta asi: “Tura nge ni kare mupristeli, yipo ni lye mboroto.”’”
Nonkango dokonhi
^ Ndi “ga pa nge nonkondo.” Tara koMauzera.
^ Ndi “kovantu ava vana kupunduka.”
^ Ndi “kutengwidira muntu eparu.”
^ Ndi “Seyoli,” kwa tamba koukaro wovafe. Tara koMauzera.
^ Ndi nampo asi “moyihando.”
^ Ndi nampo asi “Vantu ava ava rwanesa Jehova ngava tukuka.”
^ Ndi “nga pa nonkondo.” Tara koMauzera.
^ Ndi “a karere.”
^ MoRuhebeli asi “tende zokupongera.”
^ Ndi nampo asi “Karunga nga mu pangura.”
^ MoRuhebeli asi “ngovapika vemembo lyaFarawo.”
^ Ndi nampo asi “va ka gave nonzambo, yipo musi gu tutumukire meguru.”
^ MoRuhebeli asi “vana vaIsraeli wovagara.”
^ MoRuhebeli asi “omu sangere nonzambo dange.”
^ MoRuhebeli asi “kuwoko koge.”
^ Ndi “nga kuninkisa o tongame.”
