Samwere gokuhova 20:1-42
-
Jonatana ta likida eharo lyenene Ndafita (1-42)
20 Makura Ndafita ta tjwayuka mo moNayoto moRama. Ta zi kwaJonatana, ta ka mu pura asi: “Yisinke eyi na zona? Yisinke eyi na rugana oguho, eyi vana harere kudipaga nge?”
2 Makura Jonatana ta mu tantere asi: “Kapi ngayi horoka. Kwato ogu nga ku dipaga. Otate kapi ava rugana yuma va hana kuyitantera nge, yi kare asi yoyinene ndi yoyinunu. Morwasinke nye nava dilira kutantera nge yininke eyi? Kapi tayi horoka.”
3 Nye Ndafita ta gana, ta tanta asi: “Oguho va yi diva asi ove kwa hara nge. Yipo nye, awo nampo kapi vana hara kukutantera yininke eyi morwa kapi vana hara kukuguvisa. Nye tani gana kwaJehova Karunga goMunamwenyo ntani koge asi ame ntaantani ni fe!”
4 Makura Jonatana ta tantere Ndafita asi: “Ame nani kuruganena nkenye eyi no tanta.”
5 Ndafita ta tantere Jonatana asi: “Mungura ngasi kara sipito sokwedi kokupe ntani ngava ndindira nge ni ka lye kumwe nahompa. Siga nge ni ze ni ka vande ponze zositata dogoro kongurova mezuva lyautatu.
6 Nsene ngava papara nge oguho, ngo va tantere asi: ‘Ndafita ka pulire nge ni mu pulisire a ze usimbu kembo lyawo koBeterehema, yipo a ka gave nzambo zankenye mvhura kumwe nepata lyawo.’
7 Nsene ngava limburura asi: ‘Nawa tupu,’ ngoso kulikida asi kapisi hepero ni tjire yuma. Nye nsene ngava handuka, ove ngo diva asi awo vana tokomene kudipaga nge.
8 Yipo nye, likida mukareli goge eharo lyanarunye, yeeyi ove kwa tura po egwanekero* kumwe name komeho zaJehova. Nye nsene koyili eyi na zona, dipaga nge nyamoge. Morwasinke no gavera nge koguho?”
9 Makura Jonatana ta tanta asi: “Wa ha gazara yininke oyo! Nsene nani zuvha asi otate vana hara kukudipaga, ame ngani yi kutantera.”
10 Ndafita ta pura Jonatana asi: “Yilye ogu nga tantera nge nsene oguho ngava kuhandukira?”
11 Jonatana ta tantere Ndafita asi: “Tu ze ponze zositata.” Makura navenye tava zi ponze zositata.
12 Jonatana ta tantere Ndafita asi: “Jehova Karunga goVaisraeli a kare mbangi pokatji ketu asi ame ngani tantera otate yininke eyi mungura posiruwo esi ndi mezuva lyautatu. Ame ngani ku tantera nsene ngava kuhafera.
13 Nye nsene otate ngava hara kukudipaga, ngano Jehova a tengeke nge nsene kapi ngani yi ku tantera, ni ku sige o ze mombili. Jehova ngano a kare nove ngwendi moomu ga kere notate.
14 Ano ngano o likide nge eharo lyaJehova lyanarunye siruwo esi nina kuparuka ntani konyima zonomfa dange.
15 Kapisi ngo hageke kulikida eharo lyanarunye kepata lyange, nampili apa nga zonagura po Jehova nonkore doge nadinye pevhu.”
16 Makura Jonatana ta tulisa po egwanekero kumwe nepata lyaNdafita pokutanta asi: “Jehova nga tengeka nonkore nadinye daNdafita.”
17 Jonatana ta ninki Ndafita a gane hena asi ga mu hara, yeeyi Jonatana kwa here unene Ndafita ngwendi moomu ga lihara mwene.*
18 Jonatana makura ta tantere Ndafita asi: “Mungura nga si kara sipito sokwedi kokupe ntani ngatu ku rongora, yeeyi posipundi soge kwato ogu nga hingira po.
19 Mezuva lyautatu ngatu ku rongora unene. Ngo ze kevango oku wa vende ezuva lina, o ka kare pepi nemanya eli.
20 Ame ngani ponya yikutji yitatu koruha rumwe rwemanya ngwendi gogu ana kuponya yuma.
21 Apa ngani tuma mukareli gwange, ngani mu tantera asi: ‘Zende o ka simbe yikutji.’ Nsene ngani mu tantera asi: ‘Yikutji koyili koruha roge, zende o ka yi simbe,’ ngoso kulikida asi kuvhura o wize. Ame tani gana kwaJehova Karunga goMunamwenyo asi ove kapi wa hepa kutjira yuma ntani kapisi mosiponga ono kara.
22 Nye nsene ngani tantera mumati asi: ‘Yikutji koyili komeho zoge,’ ove wa hepa kuza, yeeyi Jehova yige ana kukuninka o ze.
23 Ano kuhamena yininke eyi twa litumbwidira, ngano Jehova a kare pokatji ketu dogoro narunye.”
24 Makura Ndafita ta ka vanda ponze zositata. Apa sa sikire sipito sokwedi kokupe, hompa ta ka hingira posipundi sendi a lye.
25 Age kwa hingilire pepi nekuma posipundi esi nga hingire nkenye apa. Jonatana kwa livyukire nage, ano Abineli kwa hingilire pepi naSauru, nye kwato ogu ga hingilire posipundi esi nga hingire Ndafita.
26 Sauru kapi ga uyungire yuma ezuva olyo, yeeyi age kwa litanterere asi: ‘Nampo koyili yina horoka eyi yina mu nyateke. Age ana nyata.’
27 Ezuva eli lya kweme ko,* posipundi esi nga hingire Ndafita simpe kapi pwa kere muntu. Makura Sauru ta pura munendi Jonatana asi: “Morwasinke munaIsayi ka dilire kuwiza nkera nanaina a ya lye?”
28 Jonatana ta limburura Sauru asi: “Ndafita ka pulire nge ni mu pulisire a ze koBeterehema.
29 Age ka tente asi: ‘Pulisira nge ni ze morwa nina hara kukagava nzambo mositata kumwe nepata lyetu ntani mukurwange yige ana zigida nge. Nsene wa hafera nge, pulisira nge ni hene ni ka tare vakuru vange.’ Eyi yiyo ana dilire kuwiza kositafura sahompa.”
30 Makura Sauru ta handukire unene Jonatana, ta mu tantere asi: “Ove muna gomurwanesi, ove kuna kugazara asi ame kapi na yi diva asi ove kuna kukwatesa ko munaIsayi? Eyi ngayi ku retera nomuga kumwe nonyoko.
31 Uhompa woge kapi ngau karerera nsene munaIsayi a twikira kuparuka. Yipo nye, tuma muntu a ka mu simbe yipo ni ya mu dipage.”
32 Nye Jonatana ta tantere oguhwe Sauru asi: “Morwasinke nomu mu dipagera? Yisinke ga zona?”
33 Makura Sauru ta tanda Jonatana egonga yipo a mu dipage. Jonatana ta dimburura asi oguhwe vana tokora kudipaga Ndafita.
34 Jonatana ta katuka usimbu positafura age ana handuka unene. Age kapi ga lire nondya ezuva olyo, yeeyi age kwa handukire kweyi oguhwe va here kurugana Ndafita ntani kweyi va mu swaukisire oguhwe.
35 Ngurangura Jonatana nomukareli gwendi tava zi ponze zositata, yipo va ka gwanekere naNdafita ngwendi moomu va lizuvhire.
36 Jonatana ta tantere mukareli gwendi asi: “Duka o ka simbe yikutji eyi nani ponya.” Mukareli gwendi ta duka, ano Jonatana ta ponyo sikutji, ta si ka gwira komeho zendi.
37 Apa ga ka sikire mukareli gwendi oku sa gwililire sikutji esi ga ponyene Jonatana, Jonatana ta zigire mukareli gwendi asi: “Sikutji komeho zoge sina kara!”
38 Jonatana ta zigire hena mukareli gwendi asi: “Zende usimbu, wa ha liranga!” Makura mukareli gwaJonatana ta damuna yikutji, ta ka tengura kwaJonatana.
39 Mukareli kapi ga kwete egano eyi ya horokere, Jonatana naNdafita velike va yi divire eyi ya tente.
40 Makura Jonatana ta gava yirwiso yendi komukareli gwendi, ta mu tantere asi: “Zende o yi tware mositata.”
41 Apa ga tundire po mukareli gwendi, Ndafita ta tundu kevango eli lya kere koMbindakano. Makura ta tu nongoro, ta linyongamene yikando yitatu ntani tava lincumita naJonatana, makura navenye tava lili, nye Ndafita yige ga lilire po unene.
42 Jonatana ta tantere Ndafita asi: “Zende mombili, mokumona asi natuvenye kwa gana medina lyaJehova asi: ‘Ngano Jehova a kare pokatji ketu ntani pokatji koruvharo* rwetu dogoro narunye.’”
Makura Ndafita ta ka za, ano Jonatana ta tengura mositata.
Nonkango dokonhi
^ Ndi “elizuvhasano.”
^ Ndi “ga hara mwenyo gwendi.”
^ MoRuhebeli asi “Konyima zosipito sokwedi kokupe, mezuva lyauvali.”
^ MoRuhebeli asi “mbuto.”
