Samwere gokuhova 21:1-15
21 Konyima, Ndafita ta zi koNobo komupristeli Ahimereki. Apa ga ligwene Ahimereki naNdafita, Ahimereki ta tameke kukankama, ta mu pura asi: “Morwasinke ono wizire oku nyovelike?”
2 Ndafita ta limburura mupristeli Ahimereki asi: “Hompa kwa tantere nge ni rugane yuma, nye age kuna tanta asi: ‘Wa ha tantera nkenye ogu oku nina kukutuma nomavyukiso aga nina kukutantera.’ Ame nina lizuvhu novakareli vange tu ka ligwane kevango limwe.
3 Pe nge ko nomuhwi ntano donomboroto ndi nkenye eyi ono kara nayo.”
4 Nye mupristeli ta limburura Ndafita asi: “Ame kuna kara tupu nonomboroto dokupongoka. Vakareli woge kuvhura va ka di lye nsene kapi va ligwanekera panyama novakadi mazuva gana ka pita.”
5 Ndafita ta limburura mupristeli asi: “Ose kapi twa ligwanekera panyama novakadi ngwendi moomu atu yi rugana nsene kuna kuza koyita. Mokumona asi vakareli vange kapi ava linyateke apa atu dili kuza koyita, eyi kulikida asi awo kapi vana nyata neina!”
6 Makura mupristeli ta mu pe nomboroto dokupongoka morwa kapi ga kere nonomboroto dapeke. Ezuva olyo ado kwa di gusire komeho zaJehova, va di pinganesere po nonomboroto donompe delikido.
7 Mezuva olyo, mukareli gwaSauru yipo ga kere. Age kwa mu ninkire a kare komeho zaJehova. Edina lyendi kwa kere Doyegi goMuedomu, age kwa kere mukurona govasita wononzwi daSauru.
8 Ndafita ta pura Ahimereki asi: “Kapi ono kara ko negonga ndi norufuro? Ame kapi nina pitura rufuro rwange ndi nkenye yirwiso, morwa hompa kuna tumu nge pangenderera.”
9 Makura mupristeli ta tanta asi: “Rufuro rwaGolyata goMufilisiti ogu wa dipagere moMuramba gwaEra roru vana dingire pekehe, konyima zosikoverero sopomapepe. Ru gusa tupu nsene ono hara, morwa yiro rwelike runa kara po.” Ndafita ta tanta asi: “Ru retera nge, yeeyi kwato hena rufuro rokufana ngwendi yiro.”
10 Ezuva olyo, Ndafita ta katuka a twikire kuduka Sauru, makura ta ka sika kwahompa Akisi gomoGata.
11 Vakareli vaAkisi tava tanta asi: “Ogu nani kapisi Ndafita hompa gosirongo? Nani kapisi yige va dimbilire apa va dene oku tava tanta asi:‘Sauru kwa dipaga vantu mayovi,ano Ndafita kwa dipaga vantu mayovi nomurongo’?”
12 Makura Ndafita ta yi mu gumu komutjima yininke eyi va uyungire, ta tjira unene hompa Akisi gomoGata.
13 Makura ta lininkisa asi ana zaruka komeho zawo.* Age ta tjaragura komavero gawo, ta ninki mazeze gendi ga ndjororokere kononzwedu dendi.
14 Konyima Akisi ta tantere vakareli vendi asi: “Kapi muna mono asi ogu mugara ga zaruka! Morwasinke nye muna mu retere kwange?
15 Yizaruke yinzi na kara nayo, kapi nina hepa hena sizaruke simwe. Morwasinke muna pulisilire mugara ogu a hwilire membo lyange?”
Nonkango dokonhi
^ MoRuhebeli asi “apa va mu kwete.”
