Samwere gokuhova 23:1-29
23 Konyima zosiruwo, Ndafita tava mu tantere asi: “Vafilisiti kuna kurwisa sitata saKeira ntani awo kuna kugusa nombuto pomarupare.”
2 Makura Ndafita ta pura Jehova asi: “Ni ze ni ka dipage Vafilisiti owo ndi?” Makura Jehova ta tantere Ndafita asi: “Zende o ka dipage Vafilisiti, o ka popere sitata saKeira.”
3 Nye vakwayita vaNdafita tava mu tantere asi: “Nsene asi ose kuna kuzuvha woma ngesi mosirongo sorudi rwaJuda, ngapi nye omu natu ka lizuvha apa natu za koKeira tu ka rwise Vafilisiti?”
4 Ndafita ta pura hena Jehova, makura Jehova ta mu limburura asi: “Katuka o ze koKeira, yeeyi tani gava Vafilisiti momawoko goge.”
5 Makura Ndafita ta zi kumwe novakwayita vendi koKeira va ka rwise Vafilisiti. Age kwa dipagere Vafilisiti wovanzi ntani kwa ka gusire yimuna yoVafilisiti nokupopera vantu ava va tunga moKeira.
6 Abiyatara zaAhimereki kwa dukire a ze kwaNdafita koKeira, age kwa simbire sikoverero sopomapepe.
7 Sauru tava mu tantere asi: “Ndafita mweli moKeira.” Makura Sauru ta tanta asi: “Karunga ana mu gava momawoko gange, yeeyi ana litura mwene moudigu pokuhwilira mositata esi sa kara nomarungavero ntani noyininke yokupatesa ko.”
8 Makura Sauru ta zigida vakwayita vendi navenye va ze koKeira va ka rwe yita ntani va ka kundurukide Ndafita novakwayita vendi.
9 Apa ga yi dimbwilire Ndafita asi Sauru ana hara kumuhomokera, ta tantere mupristeli Abiyatara asi: “Retera nge sikoverero sopomapepe.”
10 Makura Ndafita ta tanta asi: “Jehova Karunga goVaisraeli, mukareli goge ana zuvhu asi Sauru ana hara kuwiza a ya zonagure po sitata saKeira morwa nyame.
11 Vapitisili womoKeira nava gava nge kwendi ndi? Sauru sili kuna kuwiza ngwendi moomu nina yi zuvhu ndi? Jehova Karunga goVaisraeli, na kanderere limburura nge.” Makura Jehova ta tanta asi: “Sauru kuna kuwiza.”
12 Ndafita ta pura asi: “Vapitisili womoKeira nava gava nge kwaSauru kumwe novakwayita vange ndi?” Jehova ta limburura asi: “Nava ku gava.”
13 Ndafita ta katuka kumwe novakwayita vendi wokusika koyiha 600, va tunde moKeira. Tava zi komavango oku kwa dilire kukara siponga. Apa va mu tanterere Sauru asi Ndafita ana tundu mo moKeira, ta hageke kumusikura.
14 Ndafita kwa kere momukunda gonondundu momburundu zaSifu komavango goudigu kuza. Sauru nga mu papara nkenye apa, nye Jehova kapi ga mu geve momawoko gendi.
15 Apa ga kere Ndafita moHoresi momburundu zaSifu, age ga yi divire asi* Sauru kuna kumupapara a mu dipage.
16 Makura Jonatana munaSauru ta zi kwaNdafita moHoresi. Age kwa mu korangedere nokumuvatera a gwane nonkondo kwaJehova.
17 Jonatana ta tantere Ndafita asi: “Wa ha tjira, yeeyi otate kapi ngava ku gwana. Ove ngo kara hompa goVaisraeli ntani ame ngani kukwatesa ko, ano otate nawo va yi diva eyi.”
18 Makura tava tura po egwanekero* komeho zaJehova. Ndafita ta kara moHoresi, ano Jonatana ta tengura kembo lyendi.
19 Konyima, vagara womoSifu tava zi kwaSauru koGibeya, tava ka mu tantera asi: “Ndafita kuna vanda pepi nose komavango goudigu kuza moHoresi kondundu zaHakira, ezi za kara koMbindakano* zaJesimoni.*
20 Ngo wize nkenye apa ono hara hompa. Ose ngatu mu gava momawoko goge.”
21 Sauru ta tanta asi: “Jehova ngano a mu tungike, yeeyi one muna likida nge eharo.
22 Zendeni mu ka tare asi kupi ana hamene ntani yilye ogu ga mu mona ko, yeeyi ame kwa tantera nge asi age ga kotoka unene.
23 Ka tareni nakunye oku a vanda mu ya tantere nge, konyima ntani nye ngani ya za none. Ano nsene mweli mosirongo, ame ngani mu papara nampili a kare mokatji kovagara mayovi womorudi rwaJuda.”
24 Makura tava piti komeho zaSauru va ze koSifu, siruwo oso Ndafita novakwayita vendi kwa kere momburundu zaMawono moAraba koMbindakano zaJesimoni.
25 Makura Sauru ta zi kumwe novakwayita vendi va ka papare Ndafita. Apa ga yi zuvhire Ndafita, ta zi kemanya eli lya kere momburundu zaMawono ta ka kara kooko. Apa ga yi zuvhire Sauru, ta mu sikura dogoro momburundu zaMawono.
26 Apa ga ka sikire Sauru kondundu, Ndafita novakwayita vendi kwa kere kesinya kwina lyondundu. Ndafita kwa genderere a henduke Sauru, nye Sauru novakwayita vendi tava hedere pepi naNdafita novakwayita vendi. Awo kwa here va va kwate.
27 Nye mugara gumwe ta wiza kwaSauru, ta tanta asi: “Wiza usimbu, Vafilisiti vana homona sirongo setu!”
28 Makura Sauru ta hageke kutjida Ndafita, ta zi a ka rwise Vafilisiti. Eyi yiyo va rukilire evango olyo asi Emanya lyomaligaunuko.
29 Kutunda opo, Ndafita ta zi ta ka kara komavango goudigu kuza, koEni-gedi.
Nonkango dokonhi
^ Ndi nampo asi “age kwa kere nowoma morwa.”
^ Ndi “elizuvhasano.”
^ MoRuhebeli asi “korulyo.”
^ Ndi nampo asi “momburundu.”
