Samwere gokuhova 24:1-22
24 Sauru apa ga hagekere kutjida Vafilisiti, vantu kwa mu tanterere asi: “Ndafita mweli momburundu zaEni-gedi.”
2 Makura Sauru ta horowora vagara 3 000 mokatji koVaisraeli, ta zi kumwe nawo va ka papare Ndafita novakwayita vendi komamanya oku ya kara yikombo yokonondundu.
3 Apa ga ka sikire Sauru poyinyongo yomamanya yononzwi eyi ya karera konzira oku lya kere ekombombo, ta zi mekombombo a ka livatere ko. Ano Ndafita novakwayita vendi kwa hingilire konyima mekombombo.
4 Vakwayita vaNdafita tava mu tantere asi: “Jehova kuna kukutantera naina asi: ‘Ame tani gava nkore zoge momawoko goge o mu rugane nkenye eyi ono hara.’” Makura Ndafita ta mu hondjavere, ta tete kakehe kerwakani lyaSauru lyomawoko gomasupi.
5 Nye konyima ezwi lyendi lyokomutjima tali mu zogerere morwa yeeyi ga tetere kakehe kerwakani lyaSauru lyomawoko gomasupi.
6 Ndafita ta tantere vakwayita vendi asi: “Ayo nokuwapa si ni rugane yininke yokufana ngesi kwahompa gwange ogu ga gwaveka Jehova. Jehova kapi na yi hafera nsene ni rwisa muntu ogu ga gwaveka Jehova.”
7 Ndafita kwa keve vakwayita vendi* apa ga uyungire nonkango edi ntani kapi ga va pulisilire va rwise Sauru. Ano Sauru ta tundu mo mekombombo, ta ka za ko.
8 Makura Ndafita nage ta tundu mo mekombombo, ta zigire Sauru asi: “Hompa gwange!” Sauru apa ga setukire konyima, Ndafita ta tongamene ntani ta linyongamene.
9 Ndafita ta tantere Sauru asi: “Morwasinke o purakenene kovantu ava ava tanta asi: ‘Ndafita kuna kukupapara a ku dipage’?
10 Neina ono limonene omu ana kugava Jehova momawoko gange apa ono kara mekombombo. Nye apa ana tantere nge gumwe asi ni ku dipage, ame kuna ku fire nkenda yiyo nina tanta asi: ‘Ame kapi tani vhuru kurwisa hompa gwange, yeeyi age kwa mu gwaveka Jehova.’
11 Hompa gwange,* tara kakehe aka nina kwaterere. Ame kuna ka tete kerwakani lyoge lyomawoko gomasupi, nye kapi nina kudipaga. Ngesi ono yi mono ntani ono yi diva asi kapi nina hara kukudipaga ndi ni ku rwanese, yeeyi ame kwato eyi na kuzona nampili ngomu ono kupapara nge o dipage nge.
12 Ngano Jehova a tu pangure ntani ngano Jehova a ku tengwide kuwoko kweyi wa rugana nge, nye ame kapi tani kurwisa.
13 Sisewe sanare kutanta asi: ‘Vantu wovadona kurugana yininke yoyidona,’ nye ame kapi tani kurwisa.
14 Morwasinke ana kutjidira nge hompa gwaIsraeli? Ame kwa fana ngwendi mbwa zokufa ntani ngwendi simbumburugona.*
15 Jehova ngano a tu pangure ntani a konakone ukaro ou nokupopera nge. Age a pangure nge ntani a popere nge momawoko goge.”
16 Apa ga mene kuuyunga Ndafita yininke eyi, Sauru ta tanta asi: “Nyove ogu nina kuzuvha munange?” Makura Sauru ta lili unene.
17 Sauru ta tantere Ndafita asi: “Ove muhungami unene kupitakana nge, yeeyi ove kwa tekura nge nawa nye ame kwa kutekura momudona.
18 Naina ono tantere nge yininke yoyiwa eyi ono rugana pokudira kudipaga nge apa ana gava nge Jehova momawoko goge.
19 Yeeyi kwato muntu ogu a gwana nkore zendi a dire kumurugana yoyidona. Jehova nga ku ruganena uwa kweyi ono ruganene nge neina.
20 Ame na yi diva asi ove ngo kara hompa ntani ngo pangera Vaisraeli siruwo sosire.
21 Yipo nye, tumbwidira nge komeho zaJehova asi ove kapi ngo zonagura po ruvharo* rwange konyima zapa ngani fa ntani kapi ngo dongonona edina lyange mokatji kovantu vange.”
22 Ndafita ta tumbwidire Sauru, makura Sauru ta tengura kembo lyendi. Ano Ndafita novakwayita vendi tava zi kevango eli va ka vende.
Nonkango dokonhi
^ Ndi nampo asi “kwa ninkire vakwayita vendi va liharagane.”
^ MoRuhebeli asi “Tate.”
^ MoRuhebeli asi “ndi.”
^ MoRuhebeli asi “mbuto.”
