Samwere gokuhova 25:1-44
25 Konyima, Samwere ta dogoroka ntani Vaisraeli navenye tava pongo va mu lire, tava ka mu horeka pepi nembo lyendi moRama. Makura Ndafita ta katuka a ze momburundu zaParani.
2 Pwa kere mugara ogu ga tungire moMawono ogu ga kere noyimuna moKarumeli.* Age kwa kere ngawo zonene. Age kwa wekere nonzwi 3 000 noyikombo 1 000 ntani kwa zire koKarumeli a ka kurure nozwi dendi.
3 Mugara ogo edina lyendi Nabali, ano mukadendi Abigayili. Abigayili kwa kere nonondunge ntani muwa mosipa, nye mugara gwendi ogu ga tundililire moruvharo rwaKarebu kwa kere nonkareso zondona ntani nyanya.
4 Apa ga kere Ndafita momburundu, ta zuvhu asi Nabali kuna kukurura nonzwi dendi.
5 Makura Ndafita ta tumu vamati murongo kwaNabali, ta va tantere asi: “Zendeni koKarumeli. Apa nomu ka sika kwaNabali, ka mu tantereni asi nina hara kudiva omu ana karere.
6 Makura ka mu tantereni asi: ‘Ngano o kare nomwenyo gomure ntani ngano nove nepata lyoge mu kare mombili, ano yininke yoge nayinye yi ku gende po nawa.
7 Ame na zuvha asi ove kuna kukurura nonzwi doge. Vasita woge apa va kere nose, ose kapi twa va tekwire momudona ntani awo kapi va zumbanesa yuma siruwo nasinye esi va kere moKarumeli.
8 Pura vakareli woge va ku tantere. Ngano o hafere vantu vange, yeeyi awo kuna wiza posiruwo sosiwa.* Pa munoge Ndafita novakareli woge nkenye eyi ono kara nayo.’”
9 Makura vantu vaNdafita tava zi kwaNabali, tava ka mu tantera nayinye eyi ga va tanterere Ndafita. Apa va mene kuuyunga,
10 Nabali tava limburura asi: “Yilye nye Ndafita munalsayi yipo ni mu limburukwe? Mazuva aga, vakareli vanzi vana kutjwayuka va sige vahekuru vawo.
11 Ngoso kuna hara ni guse nomboroto dange nomema gange ntani nonyama ezi nina dipagere vantu vange ava vana kukurura nonzwi dange, ni yi gave kovantu ava na dira kudiva oku va tunda ndi?”
12 Makura vantu vaNdafita tava tengura, tava ka tantera Ndafita nayinye eyi ga tente Nabali.
13 Ndafita ta tantere vantu vendi asi: “Dwareni namuvenye nomfuro deni!” Makura navenye tava dwara nomfuro dawo ntani Ndafita nage ta dwara rufuro rwendi. Ndafita kwa zire kumwe novantu 400, ano vantu 200 wokuhupa ko kwa kere va takamese nomurongero.
14 Posiruwo oso, mukareli gumwe ta zi kwaAbigayili mukadaNabali, ta ka mu tantera asi: “Ndafita ka tumine vantu va tunde momburundu va ya pulide omu ana karere hekurwetu, nye age yiyo ana va swaura.
15 Vagara owo kwa tu tekwire nawa, awo kapi va tu rugene yoyidona ntani ose kapi twa zumbanesere yuma siruwo nasinye esi twa kere kumwe nawo momburundu.
16 Apa twa lisire nonzwi detu, awo kwa tu poperere ngwendi ekuma mutenya nomasiku, siruwo nasinye esi twa kere kumwe nawo.
17 Yipo nye, tokora asi yisinke eyi no rugana, yeeyi eyi tayi retere udigu hekurwetu nembo lyendi nalinye. Age mugara gokudira nondunge ogu a dili kupurakena.”
18 Makura Abigayili ta gusa usimbu nomuhwi donomboroto 200, tuvaza tuvali totunene tovhinyu, nonzwi ntano edi va dipagere, nonsako ntano* dombuto zokukanga, yikuki yomandjembere 100 ntani yikuki yekuzu 200, makura ta yi tura poyindongi.
19 Abigayili ta tantere vakareli vendi asi: “Piteni komeho; ame nani mu kwama monyima.” Nye age kapi ga tanterere ko mugara gwendi Nabali.
20 Apa ga kunkumukire Abigayili age ana rondo posindongi, Ndafita novantu vendi ava va vyukire koyiha yendi kapi va mu mwene morwa ndundu kwa va vivire, makura Abigayili ta gwanekere nawo.
21 Ndafita kwa litanterere mwene asi: “Ame kwa lihepekere kutakamesa yininke nayinye yomugara ogu momburundu. Kwato nampili sininke sendi simwe esi sa zumbana, nye age kuna tekura nge momudona.
22 Nsene kapi ngani dipaga Nabali novagara navenye* ava va kara membo lyendi mungura ngurangura, Karunga ngano a tengeke nonkore dange.”*
23 Abigayili apa ga mwene Ndafita, ta humburuka usimbu posindongi, ta twire Ndafita nongoro ntani ta linyongamene.
24 Ta ligandere konompadi daNdafita, ta tanta asi: “Hompa gwange, unzoni u kare wange. Pulisira nge ni uyunge nove ntani purakena kweyi nani uyunga.
25 Hompa gwange, wa ha pakera mbili eyi ka uyungire Nabali,* yeeyi nkareso zendi kwa liza neyi ali tanta edina lyendi. Edina lyendi Nabali ntani age kwato nondunge. Ame mukareli goge kapi kani mwene vantu ava kotumine.
26 Yipo nye hompa gwange, tani gana kwaJehova Karunga goMunamwenyo ntani koge asi Jehova yige ana kuninkisa o dire kukara nousima wedipago ntani o dire kutengwida kuwoko. Ngano nonkore doge ntani nava vana hara kukurugana udona, va kare ngwendi Nabali.
27 Gusa uhwi* ou nina ku retere ame mukareli goge yipo ou gave kovantu ava vana kukukwama.
28 Na kanderere gusira nge po unzoni wange ame mukareli goge, yeeyi Jehova nga ninka ruvharo roge ngaru pangere siruwo sosire, morwa ove hompa gwange kuna kurwira po Jehova yita ntani ove kapi wa rugana yininke yoyidona eparu lyoge mudima.
29 Nsene gumwe a kurwanesa ntani a hara kukudipaga, Karunga goge Jehova nga kupopera ngwendi moomu muntu a popere emona lyendi pokulitura mondjato. Nye age nga zugumina nonkore doge koure ngwendi mamanya aga ava zuguma nosizugumiso.
30 Ano apa nga rugana Jehova yininke nayinye yoyiwa eyi ga kutumbwidira ntani apa nga ku tura o kare mupitisili goVaisraeli,
31 ove kapi ngo livera morwa kapi wa dipaga muntu ga hana unzoni ntani kapi wa tengwida kuwoko. Apa nga kutungika Jehova, ngo diworoke mukareli goge.”
32 Makura Ndafita ta tantere Abigayili asi: “Va mu hamberere Jehova Karunga goVaisraeli ogu ana ku tumu o ya gwanekere name naina!
33 Karunga ngano a ku tungike, morwa ove mukadi gonondunge ntani ngano a ku tungike kweyi ono kondere nge ni dire kukara nousima wedipago ntani ni dire kutengwida kuwoko.
34 Yeeyi tani gana asi ngano Jehova Karunga goMunamwenyo kapi ana kondere nge mokurugana udona ntani ngano kapi ono genderere kuwiza o ya gwanekere name, ngano apa ngali sa mungura, vagara navenye* vemembo lyaNabali ngava fa.”
35 Makura Ndafita ta tambura yininke eyi ga mu reterere Abigayili, ta mu tantere asi: “Tengura kembo lyoge mombili. Ame nina zuvhu eyi ono uyunga ntani tani rugana eyi ono hundire.”
36 Konyima, Abigayili ta tengura kwaNabali, ta ka mu gwana kuna kubodjana membo lyendi ngwendi hompa. Nabali* kwa hefe ntani kwa korwere unene. Abigayili kapi ga mu tanterere yuma dogoro ngurangura.
37 Apa ga kororokwere Nabali ngurangura, mukadendi ta mu tantere yininke nayinye eyi ya horokere. Makura ta fana ngwendi muntu gokufa,* age kapi ga ligumagwire ngwendi emanya.
38 Konyima zomazuva murongo, Jehova ta ninki Nabali a fe.
39 Apa ga zuvhire Ndafita asi Nabali ana dogoroka, ta tanta asi: “Va mu hamberere Jehova ogu ga poperere nge apa ga swawire nge Nabali ntani kweyi ga kondera nge ni dire kurugana yininke yoyidona. Jehova kwa tengeka Nabali, morwa udona ou ga rugana.” Makura Ndafita ta tumu vantu va ka mu hehere Abigayili a kare mukadendi.
40 Vakareli vaNdafita tava ka sika kwaAbigayili koKarumeli, tava ka mu tantera asi: “Ndafita kuna tu tumu tu ya ku simbe o ka kare mukadendi.”
41 Makura Abigayili ta katuka usimbu, ta linyongamene ntani ta tanta asi: “Ame nina liwapaikire kukara mukareli, yipo ni kuhwe nompadi dovakareli vahompa gwange.”
42 Abigayili ta katuka usimbu ta rondo posindongi, ano vakareli vendi wovakadi vatano tava mu kwama monyima porupadi. Age kwa zire kumwe novantu ava ga tumine Ndafita, makura Ndafita ta ka mu kwara.
43 Ndafita kwa kwere hena Ahinoamu gokoJesireli. Age kwa va kwere masupareko.
44 Sauru kwa geve munendi Mikali ogu ga kwere Ndafita kwaPaliti munaRaisi gomoGalimu.
Nonkango dokonhi
^ Kwa tamba kositata somoJuda nye kapisi koNdundu zaKarumeli.
^ MoRuhebeli asi “mezuva lyewa.”
^ MoRuhebeli asi “noseah ntano.” Seah zimwe kwa hura ponolita 7,33. Tara App. B14.
^ MoRuhebeli asi “nkenye ogu a sitamene kekuma.” Esi kuna kara sisewe soRuhebeli sokuswaura, aso kwa tamba kovagara.
^ Ndi nampo asi “a tengeke nge.”
^ Kutanta asi “Kwato nondunge; Egova.”
^ MoRuhebeli asi “etungiko.”
^ MoRuhebeli asi “nkenye ogu a sitamene kekuma.” Esi kuna kara sisewe soRuhebeli sokuswaura, aso kwa tamba kovagara.
^ MoRuhebeli asi “Mutjima gwaNabali.”
^ MoRuhebeli asi “mutjima gwendi tagu fu.”
