Samwere gokuhova 26:1-25
26 Konyima, vagara womoSifu tava zi kwaSauru koGibeya, tava ka mu tantera asi: “Ndafita kuna vanda kondundu zaHakira ezi za livyuka naJesimoni.”*
2 Makura Sauru ta katuka a ze momburundu zaSifu kumwe novakwayita woVaisraeli 3 000 yipo va ka papare Ndafita.
3 Sauru kwa dikire kamba zendi pepi nositaura pondundu zaHakira ezi za livyuka naJesimoni. Ndafita kwa kere momburundu ntani age kwa zuvhire asi Sauru ana wiza momburundu a ya mu papare.
4 Makura Ndafita ta tumu vantu va ka tare nsene asi Sauru mweli momburundu.
5 Konyima, Ndafita ta zi kevango oku ga dikilire Sauru kamba zendi, ta ka mona oku ga rere Sauru nomukurona gwendi govakwayita, Abineli munaNere. Sauru kwa rere pokatji kokamba ntani kwa mu kundurukidire notende dovakwayita vendi.
6 Makura Ndafita ta pura Ahimereki goMuheti naAbisayi munaSeruya mukurwaJowabu asi: “Yilye ogu na za name mokamba zaSauru?” Abisayi ta mu limburura asi: “Nani za nove.”
7 Makura Ndafita naAbisayi tava zi masiku mokamba zovakwayita, tava ka gwana Sauru ana rara pokatji kokamba ntani age kwa sinsikire egonga lyendi komutwe gwendi. Ano Abineli novakwayita vendi kwa mu kundurukidire awo vana rara.
8 Makura Abisayi ta tantere Ndafita asi: “Neina Karunga ana gava nkore zoge momawoko goge. Na kanderere pulisira nge ni mu twe egonga rumwe tupu, kapisi hepero ni mu twe yikando yivali.”
9 Nye Ndafita ta tantere Abisayi asi: “Wa ha mu rugana yoyidona, yeeyi nkenye ogu a rugana yoyidona muntu ogu ga gwaveka Jehova nga kara nounzoni.”
10 Ndafita ta tanta hena asi: “Tani gana kwaJehova Karunga goMunamwenyo asi Jehova mwene nga mu dipaga ndi ezuva ngali wiza apa nga fa ndi age ngava ka mu dipaga apa nga za koyita.
11 Ayo kapi ta yi wapa kosipara saJehova nsene ni rugana yininke yoyidona muntu ogu ga gwaveka Jehova. Yipo nye, gusa egonga eli lina kara komutwe gwendi nokavaza komema, makura tu ze ko.”
12 Makura Ndafita ta gusa egonga nokavaza komema a ka ka kere komutwe gwaSauru, tava ka za ko. Kwato ogu ga va mwene ndi a pinduke, yeeyi navenye kwa rere. Jehova kwa va ninkire va rare nompofu dokufa nokutara.
13 Ndafita ta zi mesinya mwina lyomuramba, ta ka sikamena koure keguru lyondundu ntani age kwa likere ure nawo.
14 Ndafita ta zigire vakwayita naAbineli munaNere asi: “Abineli, to zuvhu nge ndi?” Abineli ta limburura asi: “Nyove yilye ogu ono kuzogerera hompa?”
15 Makura Ndafita ta zigire Abineli asi: “Nani ove kapisi mugara gokuvangarara? Kwato gumwe ogu ga kufana moIsraeli. Morwasinke nye ono dilire kukunga hompa goge? Yeeyi mukwayita gumwe kuna wiza a ya dipage hompa goge.
16 Eyi ono rugana kapisi yiwa. Tani gana kwaJehova Karunga goMunamwenyo asi ove ono wapere kufa, yeeyi ove kapi ono kungu hompa goge ogu ga gwaveka Jehova. Papara nsene no gwana oku lina kara egonga ntani kavaza komema eyi ka yi kara komutwe gwendi.”
17 Makura Sauru ta dimburura ezwi lyaNdafita, ta mu pura asi: “Nyove ogu nina kuzuvha munange?” Ndafita ta limburura asi: “Nhi, nyame hompa gwange.”
18 Ta tanta hena asi: “Morwasinke hompa gwange ana kutjida-tjidira mukareli gwendi? Yisinke na zona ntani yisinke na rugana?
19 Hompa gwange, na kanderere purakena mukareli goge. Nsene Jehova yige ana kuninki o vyuke nge, a tambure* nzambo zange zombuto. Nye nsene vantu yiwo vana ku ninki o vyuke nge, ngano ava tengeke Jehova. Yeeyi awo kwa ninkisa nge ni dire kukara kumwe noupingwa waJehova pokutanta asi: ‘Zende o ka karere yikarunga yapeke!’
20 Wa ha pulisira nge ni fire mosirongo esi sa kara ure naJehova, yeeyi hompa gwaIsraeli kuna wiza a ya papare simbumburugona* ngwendi googu ana kupapara sidira somowiza* konondundu.”
21 Makura Sauru ta tanta asi: “Ame na zona. Tengura kwange munange, yeeyi ame kapi nani kurugana hena yininke yoyidona. Ove ono yi likida neina asi eparu* lyange mulyo. Ame kwa rugana yininke yougova ntani kwa tura epuko lyenene.”
22 Ndafita ta limburura asi: “Egonga lyahompa lyeli. Tantereni mumati gumwe a wize a ya li simbe.
23 Jehova yige a futu vantu wovahungami ntani wovalimburukwi, naina Jehova kuna ku gava momawoko gange, nye ame kapi kani hara kurugana yoyidona muntu ogu ga gwaveka Jehova.
24 Mokumona asi ame kapi nina kudipaga naina, Jehova ngano a popere nge komaudigu nagenye.”
25 Sauru ta limburura Ndafita asi: “Karunga a ku tungike munange. Ove ngo rugana yininke yoyinene ntani nga yi kutompoka.” Makura Ndafita ta ka za, ano Sauru ta tengura kembo lyendi.
Nonkango dokonhi
^ Ndi nampo asi “nomburundu.”
^ MoRuhebeli asi “a fumbwire.”
^ MoRuhebeli asi “ndi.”
^ Ndi “simbote.”
^ Ndi “mwenyo.”
