Samwere gokuhova 27:1-12
-
Vafilisiti tava pe Ndafita sitata saSikiragi (1-12)
27 Nye Ndafita ta litantere mwene asi: “Ezuva limwe, Sauru nga dipaga nge. Hansa ni dukire kosirongo soVafilisiti, yipo nga hageke Sauru kupapara nge mosirongo soVaisraeli ntani nga dire kudipaga nge.”
2 Makura Ndafita ta zi kumwe novakwayita 600 ava va kere nage kwaAkisi munaMawoko, hompa gwaGata.
3 Ndafita ta kara naAkisi moGata kumwe novakwayita vendi nomapata gawo. Age kwa kere hena namukadendi Ahinoamu gomoJesireli ntani Abigayili gomoKarumeli, mukadanakufa Nabali.
4 Apa ga zuvhire Sauru asi Ndafita ga dukira koGata, ta hageke kumupapara.
5 Ndafita ta tantere Akisi asi: “Nsene ono hafere nge, pulisira nge ni tunge mositata simwe sosinunu mosirongo seni. Kapi na yi wapa mukareli goge a tunge kumwe nove mositata esi wa kara.”
6 Makura Akisi ta pe Ndafita sitata saSikiragi ezuva olyo. Eyi yiyo sitata saSikiragi sa karera sovahompa womorudi rwaJuda dogoro naina.
7 Ndafita kwa tungire mositata sosinunu soVafilisiti mvhura zimwe nomakwedi gane.
8 Ndafita novakwayita vendi ngava zi va ka rwise Vagesure, Vagiresi ntani Vaamareki, yeeyi awo kwa tungire kutundilira koTeramu dogoro koSuru ntani dogoro kosirongo saEgipite.
9 Ndafita apa ngava rwisa, age nga dipaga vagara novakadi. Nye age nga gusa yikombo, nonzwi, nongombe, yindongi, nongameru noyikoverero, makura konyima nga tengura kwaAkisi.
10 Apa nga mu pura Akisi asi: “Kupi ono ka homona naina?” Ndafita nga limburura asi: “KoMbindakano* zorudi rwaJuda” ndi “koMbindakano zoVajerahimeli” ndi “koMbindakano zoVakeni.”
11 Ndafita kapi nga zi novantu koGata. Age nga dipaga vagara novakadi navenye, yeeyi age nga tanta asi: “Awo kuvhura va ka tu tante pokuuyunga asi: ‘Eyi yiyo ana rugana Ndafita.’” (Eyi yiyo nga rugana Ndafita siruwo nasinye esi ga tungire mositata sosinunu soVafilisiti.)
12 Akisi nga pura eyi nga mu tantere Ndafita. Age nga litantere mwene asi: ‘Ngesi Ndafita vana mu nyenge Vaisraeli vakwawo, yipo nye, age nga twikira kukara mukareli gwange.’
Nonkango dokonhi
^ Ndi “koNegebu.”
