Samwere gokuhova 28:1-25
-
Sauru ta zi komukadi ogu a uyunga novadimu moEni-doro (1-25)
28 Posiruwo oso, vakwayita woVafilisiti tava pongo kumwe va ka rwise Vaisraeli, makura Akisi ta tantere Ndafita asi: “Na si huguvara asi ono yi diva asi nove novakwayita woge tatu zi kumwe tu ka rwe yita.”
2 Makura Ndafita ta tantere Akisi asi: “Nove ono yi diva eyi nani rugana.” Akisi ta tantere Ndafita asi: “Eyi yiyo nina kukuninkira o kunge nge dogoro narunye.”*
3 Posiruwo oso, Samwere ga dogoroka, ano Vaisraeli navenye kwa mu lilire ntani kwa mu horekere mositata esi ga tungire moRama. Sauru kwa tjidire mosirongo vantu ava ngava uyunga novafe nava ngava pumbu.
4 Vafilisiti kwa pongere makura tava ka dika kamba zawo moSunemu. Sauru ta ninki vakwayita woVaisraeli navenye va ponge, tava ka dika kamba zawo moGiliboa.
5 Apa ga mwene Sauru kamba zoVafilisiti, ta tukuka, ta tameke kukankama.
6 Nampili ngomu Sauru nga pura ko Jehova eyi na rugana, Jehova kapi nga mu limburura yi kare asi kupitira monzodi, moUlimu ndi movaporofete.
7 Konyima, Sauru ta tantere vakareli vendi asi: “Paparereni nge ko mukadi ogu a uyunga novafe, yipo ni ze ni ka uyunge nage.” Makura vakareli vendi tava mu tantere asi: “Pweli mukadi ogu a uyunga novafe moEni-doro.”
8 Makura Sauru ta dwara yikoverero yapeke yipo va dire kumudimburura, ta zi komukadi ogo masiku kumwe novakareli vendi vavali wovagara. Sauru ta mu tantere asi: “Ruganesa umpure o zigidire nge muntu ogu nani ku tantera.”
9 Nye mukadi ogo ta mu tantere asi: “Ove wa diva eyi ga rugana Sauru. Age kwa tjida mosirongo vantu ava ava uyunga novafe ntani nava ava pumbu. Morwasinke ono harere kutura nge* moudigu va dipage nge?”
10 Makura Sauru ta gana medina lyaJehova, ta mu tantere asi: “Tani gana kwaJehova Karunga goMunamwenyo asi ove kapi ngo kara nounzoni!”
11 Makura mukadi ogo ta mu pura asi: “Yilye ogu ono hara nani kuzigidira?” Age ta mu limburura asi: “Zigidira nge Samwere.”
12 Mukadi ogo apa ga mwene “Samwere,”* ta zigire unene, ta tantere Sauru asi: “Morwasinke ono kumbagerere nge? Nani nyove Sauru!”
13 Hompa ta mu tantere asi: “Wa ha tjira, yisinke ono kumona?” Mukadi ta mu limburura asi: “Ame kuna kumona muntu gokufana ngwendi sikarunga, ogu ana kutunda mevhu.”
14 Ta mu pura hena asi: “Ngapi omu ga fana?” Mukadi ta mu limburura asi: “Age mukurupe ntani kuna dwara erwakani lyomawoko gomasupi.” Makura Sauru ta dimburura asi muntu ogo kuna kara “Samwere,” makura ta tongamene ntani ta linyongamene.
15 Makura Samwere ta pura Sauru asi: “Morwasinke ono donganesere nge pokuzigida nge?” Sauru ta mu limburura asi: “Ame kuna kara moudigu wounene. Vafilisiti kuna kurwisa nge, Karunga ga siga nge ntani kapi a limburura nge, yi kare asi kupitira movaporofete ndi mononzodi. Eyi yiyo nina ku zigidire, o tantere nge eyi nani rugana.”
16 “Samwere” ta tanta asi: “Mokumona asi Jehova ga ku siga ntani age nkore zoge, morwasinke ono wizire kwange o ya pure nge?
17 Jehova nga sikisa mo eyi ga pumbire eyi na ku tanterere: Jehova nga ku gusa uhompa makura nga u gave kwaNdafita.
18 Jehova kuna kurugana yininke eyi, morwa ove kapi wa limburukwa eyi ga ku tanterere Jehova ntani kapi wa dipagere Vaamareki navenye ava va mu handukisire.
19 Jehova hena nga ku gava noVaisraeli momawoko goVafilisiti, ano mungura nove novana woge wovagara ngava mu dipaga ntani ngomu ya lipakerera kumwe name. Jehova nga gava hena vakwayita woVaisraeli momawoko goVafilisiti.”
20 Makura Sauru ta ligandere pevhu ntani ta tukuka unene morwa yininke eyi ga mu tanterere “Samwere.” Age kapi ga kere nononkondo, morwa kapi ga lire ezuva nalinye nomasiku nagenye.
21 Mukadi ogo ta wiza kwaSauru, ta dimburura asi ana kara nosinka sosinene, makura ta mu tantere asi: “Ame kuna rugana nayinye eyi ono tantere nge ntani ame kuna tura eparu lyange mosiponga apa nina rugana eyi ono tantere nge.
22 Yipo nye, purakena eyi nina kukutantera. Ame tani ku pe mboroto o lye o gwane nonkondo dokuza morugendo roge.”
23 Sauru ta nyoka, ta tanta asi: “Ame kapi nani zi lya.” Nye vakareli vendi ntani nomukadi ogo tava mu sininike a lye. Konyima, Sauru tava purakene, ta katuka pevhu, makura ta hingire pombete.
24 Mukadi ogo kwa kere nontana zokuneta, tazi dipaga,* makura ta gusa usura ta u duwu, ta kanga mboroto zokudira yihaheso.
25 Age ta yi gava kwaSauru ntani kovakareli vendi, makura tava li. Konyima, tava katuka va ze masiku googo.
Nonkango dokonhi
^ MoRuhebeli asi “o takamese mutwe gwange mazuva nagenye.”
^ Ndi “mwenyo gwange.”
^ Ndi “muntu gokufana ngwendi Samwere.”
^ Ndi “tazi zamba.”
