Samwere gokuhova 29:1-11
-
Vafilisiti kapi va huguvarere Ndafita (1-11)
29 Vafilisiti tava ninki vakwayita vawo va ponge moAfeki, ano Vaisraeli tava dike kamba zawo pepi norunone oru rwa kara moJesireli.
2 Vahompa woVafilisiti kwa gendere kumwe novakwayita vawo ava va kere monombunga mafere ntani mayovi. Ano Ndafita novakwayita vendi kwa va kweme monyima kumwe naAkisi.
3 Nye vapitisili woVafilisiti tava pura asi: “Yisinke vana kuyahara ko oku ava Vahebeli?” Akisi ta va limburura asi: “Ogu kuna kara Ndafita mukareli gwaSauru hompa goVaisraeli. Age kwa kara name kupitakana mvhura zimwe. Ame kapi na mu monena yininke yoyidona kutunda apa ga tjwayuka a wize kwange dogoro naina.”
4 Nye vapitisili woVafilisiti tava mu handukire, tava mu tantere asi: “Mu tantera a tengure kevango eli wa mu pa. Wa ha mu pulisira a ze kumwe nose koyita, yipo nga dire kutupiruka nga hafese hompa gwendi pokudipaga vakwayita vetu.
5 Ogu nani kapisi yige Ndafita ogu va dimbilire apa va dene oku tava tanta asi:
‘Sauru kwa dipaga vantu mayovi,ano Ndafita kwa dipaga vantu mayovi nomurongo’?”
6 Makura Akisi ta zigida Ndafita, ta mu tantere asi: “Tani gana kwaJehova Karunga goMunamwenyo asi ove muhungami ntani nina hafa kweyi ono kuza novakwayita vange koyita, yeeyi ame kapi na kumonena yininke yoyidona kutunda apa wa wiza kwange dogoro naina. Nye vahompa woVafilisiti kapi va ku huguvara.
7 Yipo nye, zende nombili ntani wa ha rugana yuma eyi nayi handukisa vahompa woVafilisiti.”
8 Nye Ndafita ta pura Akisi asi: “Yisinke na rugana? Yininke musinke yoyidona eyi wa monena nge kutunda apa na wiza koge dogoro naina? Hompa gwange, morwasinke ono kudilira kupulisira nge ni ze nove tu ka rwise nonkore doge?”
9 Akisi ta tantere Ndafita asi: “Ame na yi diva asi ove muntu gomuwa ngwendi muengeli gwaKarunga, nye vapitisili woVafilisiti kuna tantere nge asi: ‘Wa ha mu pulisira a ze kumwe nose moyita.’
10 Yipo nye, ngo pinduke ngurangura zonene kumwe novagara ava va wiza kumwe nove, makura apa ngali sa ezuva ngomu katuke mu ze.”
11 Makura Ndafita novantu vendi tava katuka ngurangura zonene, tava tengura kosirongo soVafilisiti. Ano Vafilisiti tava zi koJesireli.
