Samwere gokuhova 3:1-21
-
Samwere tava mu horowora a kare muporofete (1-21)
3 Posiruwo oso, mumati Samwere nga ruganene Jehova kumwe naEli. Nye momazuva ogo, vantu wovasesu tupu ngava gwana mbudi zokutunda kwaJehova ntani vasesu ngava mono mamoneko.
2 Ezuva limwe, Eli kwa rere monzugo zendi ntani kapi nga mono nawa.
3 Samwere kwa rere montembeli* zaJehova, omu sa kere sikesa saKarunga, azo ramba zaKarunga simpe kapi vana zi dimisa.
4 Makura Jehova ta zigida Samwere, ano Samwere ta limburura asi: “Nyame ogu.”
5 Age ta dukire kwaEli, ta mu pura asi: “Nyone muna zigida nge? Nyame ogu.” Nye Eli ta mu tantere asi: “Kapi nina kuzigida. Zende o ka rare.” Makura Samwere ta zi, ta ka rara.
6 Jehova ta mu zigida hena asi: “Samwere!” Makura Samwere ta pinduka, ta zi kwaEli, ta ka pura asi: “Nyone muna zigida nge? Nyame ogu.” Nye Eli ta mu tantere asi: “Kapi nina kuzigida munange. Zende o ka rare.”
7 (Samwere kapi ga divire Jehova momunene ntani kapi ga gwene rumwe mbudi zokutunda kwaJehova.)
8 Makura Jehova ta zigida hena Samwere asi: “Samwere!” Ano Samwere ta pinduka, ta zi kwaEli, ta ka pura asi: “Nyone muna zigida nge? Nyame ogu.”
Eli ta dimburura asi Jehova yige ana zigida mumati.
9 Eli ta tantere Samwere asi: “Zende o ka rare. Nsene na ka ku zigida hena, ka tante asi: ‘Jehova uyunga, mukareli goge kuna kupurakena.’” Makura Samwere ta tengura, ta ka rara.
10 Makura Jehova ta mu zigida hena asi: “Samwere! Samwere!” Ano Samwere ta tanta asi: “Uyunga, mukareli goge kuna kupurakena.”
11 Jehova ta tantere Samwere asi: “Ame ngani rugana yuma moIsraeli eyi ngayi tukukisa nkenye ogu ngayi zuvha.
12 Ano mezuva olyo, ngani rugana nayinye eyi na tente kuhamena Eli nepata lyendi.
13 Wa hepa kutantera Eli asi ame ngani tengeka epata lyendi dogoro narunye morwa nzo ezi. Age ga diva asi vana vendi kuna kuswaura Karunga, nye kapi a va handukire.
14 Eyi yiyo na ganena asi, kwato nonzambo ngadi gusa po unzoni wepata lyaEli.”
15 Samwere ta rara dogoro ngurangura, makura ta zegurura mavero gokonzugo zaJehova. Samwere kwa tjilire kutantera Eli eyi ga mu tanterere Karunga.
16 Nye Eli ta zigida Samwere asi: “Samwere munange!” Makura Samwere ta tanta asi: “Nyame ogu.”
17 Eli ta mu pura asi: “Mbudi musinke ka ku tanterere? Na kanderere wa ha zi horekera nge. Nsene no dira kutantera nge nayinye eyi ka ku tanterere Karunga, age ngano a ku tengeke.”
18 Makura Samwere ta mu tantere nayinye, kapi ga hupisire ko yuma. Eli ta tanta asi: “KwaJehova yina kutunda. A rugane nayinye eyi ana kumona asi uhunga.”
19 Samwere kwa twikilire kukura, ano Jehova Karunga kwa kere kumwe nage ntani kwa sikisire mo nayinye eyi ga tente.
20 Vaisraeli navenye, kutundilira koDana dogoro koBere-seba kwa divire asi Jehova ana horowora Samwere a kare muporofete gwendi.
21 Ano Jehova kwa twikilire kumonekera Samwere moSiro ntani Jehova kwa lidivisire kwaSamwere. Jehova kwa yi rugene eyi kupitira mweyi ga mu tanterere.
Nonkango dokonhi
^ Kwa tamba nkongoronzugo.
