Samwere gokuhova 30:1-31
30 Mezuva lyautatu, Ndafita novakwayita vendi tava ya siki moSikiragi, tava ya gwana sitata oso vana si homona ntani vana si hwike, yeeyi Vaamareki kwa homwene Negebu* ntani sitata saSikiragi.
2 Awo kwa kwete vakadi ntani novantu navenye ava va kere mositata oso. Awo kapi va dipagere vantu, nye awo kwa va simbire va ze kumwe nawo.
3 Apa ga ya sikire Ndafita novakwayita vendi mositata, tava si gwana vana si hwike ntani vakadi vawo novana vawo wovagara nava wovakadi vana va twara.
4 Makura Ndafita novakwayita vendi tava lili unene dogoro nonkondo tadi va pu.
5 Vaamareki kwa kwete hena vakadi vaNdafita vavali. Awo kwa kere Ahinoamu gomoJesireli ntani naAbigayili mukadanakufa Nabali gomoKarumeli.
6 Ndafita kwa kere nosinka sosinene, morwa vakwayita vendi kwa here kumutoona nomamanya. Awo kwa handukire unene, morwa yeeyi va kwete vana vawo wovagara nava wovakadi. Nye Ndafita kwa gwene nonkondo pokuhuguvara Karunga gwendi Jehova.
7 Makura Ndafita ta tantere mupristeli Abiyatara munaAhimereki asi: “Retera nge sikoverero sopomapepe.” Makura Abiyatara ta twarere Ndafita sikoverero sopomapepe.
8 Ndafita ta pura Jehova asi: “Ni sikure vantu ava vana rwisa sitata ndi? Nani ka va gwana ndi?” Makura Karunga ta mu limburura asi: “Zende o va sikure, yeeyi ove no ka va gwana ntani no ka popera vantu woge.”
9 Ndafita ta katuka usimbu kumwe novakwayita 600 ava ga kere nawo, tava zi dogoro koMuramba gwaBesoro. Nye tava sigi vakwayita vamwe pevango olyo.
10 Ndafita kwa twikilire kusikura Vaamareki kumwe novakwayita 400, nye vakwayita 200 wokuhupa ko kwa rorokere unene. Awo kapi va vhulire kupitakana Muramba gwaBesoro, makura tava kara.
11 Awo tava gwana mugara goMuegipite mowiza, tava mu twara kwaNdafita makura tava mu pe nondya a lye ntani mema a nwe.
12 Awo kwa mu pere hena sikuki sekuzu ntani yikuki yivali yomandjembere. Apa ga mene kulya, ta gwana nonkondo, yeeyi age kapi ga lire ndi a nwe mema mazuva gatatu nomasiku gatatu.
13 Ndafita makura ta mu pura asi: “Yilye hekuroge ntani kupi wa tunda?” Age ta limburura asi: “Ame Muegipite ntani hekurwange Muamareki nye age kwa siga nge, yeeyi ame kwa verere mazuva gatatu gana ka pita.
14 Ose kwa ka homwene nomukunda dokoMbindakano* zoVakereti ntani koMbindakano* zosirongo saKarebu. Ose kwa ka homwene hena sirongo sorudi rwaJuda ntani kwa ka hwikire sitata saSikiragi.”
15 Makura Ndafita ta mu pura asi: “Kuvhura o tware nge kovantu ava ka va homwene sitata?” Age ta limburura asi: “Nsene no gana medina lyaKarunga asi kapi ngo dipaga nge ntani kapi ngo gava nge kwahekurwange, ame nani ku twara kovantu owo.”
16 Makura ta twara Ndafita kevango oku va lihanenene. Awo kwa lire oku tava nu ntani kwa bondjanene, morwa awo kwa ka simbire yininke yoyinzi kosirongo soVafilisiti ntani kosirongo sorudi rwaJuda.
17 Makura Ndafita ta va dipaga kutundilira ngurangura zonene dogoro kongurova. Age kwa dipagere vantu navenye kugusa ko vagara 400 ava va rondere ponongameru va duke.
18 Ndafita ta gusa yininke nayinye eyi va ka gusire Vaamareki ntani novakadi vendi vavali ava va kwete.
19 Kwato yininke yawo eyi ya zumbanene, yi kare asi yoyinunu ndi yoyinene. Ndafita kwa ka gusire yininke yawo nayinye eyi va ka kwete Vaamareki, kukwatera mo vana vawo wovagara nava wovakadi ntani nemona lyawo.
20 Ndafita kwa ka simbire hena nonzwi noyikombo ntani nonongombe doVaamareki. Ano vakwayita vendi tava yi singi komeho zoyimuna yawo. Awo kwa tente asi: “Eli kuna kara emona lyaNdafita eli ga ka kwata.”
21 Makura Ndafita ta zi kovakwayita 200 ava va dilire kuza nage morwa kwa rorokere, makura tava kara moMuramba gwaBesoro. Vagara owo tava zi va ka gwanekere naNdafita ntani novantu ava ga kere nawo. Apa ga sikire Ndafita pepi novagara owo, tava pura omu vana karere.
22 Nye vakwayita vamwe wonkareso zondona ava va zire kumwe naNdafita, tava tanta asi: “Mokumona asi awo kapi va za kumwe nose, ose kapi natu va pa emona eli twa ka simba. Va guse tupu vana vawo novakadi vawo va ze ko.”
23 Nye Ndafita ta tanta asi: “One vakwetu mwa ha rugana yininke oyo, yeeyi Jehova yige ana tu pe yininke eyi. Age kwa tu popera ntani kwa gava momawoko getu vantu ava va tu homona.
24 Kwato ogu na yi kwatesa ko eyi muna hara kurugana. Vantu ava va za va ka rwe yita nava va kere va takamese nomurongero, navenye tava gwana yininke yokuhetakana.”
25 Ano kutunda ezuva olyo, eyi ga uyungire Ndafita kwa kere veta moIsraeli dogoro naina.
26 Apa ga tengwire Ndafita koSikiragi, age kwa tumine emona limwe komasimbi gomorudi rwaJuda ava va kere vakaume vendi, tava tantere asi: “Guseni uhwi* ou twa ka hakana kononkore daJehova.”
27 Age kwa tumine uhwi kovakaume vendi ava va tungire moBeteli, moRamoto zokoNegebu,* moJatire,
28 moAroere, moSifimoti, moEsitemoa,
29 moRakali, moyitata yoVajerahimeli, moyitata yoVakeni,
30 moHoroma, moBorasani, moAtaki,
31 moHeburoni ntani komavango nagenye aga nga zi Ndafita novakwayita vendi.
Nonkango dokonhi
^ Ndi “koMbindakano.”
^ Ndi “dokoNegebu.”
^ Ndi “koNegebu.”
^ MoRuhebeli asi “etungiko.”
^ Ndi “koMbindakano.”
