Samwere gokuhova 31:1-13
-
Sauru novana vendi vatatu tava va dipaga (1-13)
31 Vafilisiti kwa rwire yita noVaisraeli, makura Vaisraeli tava duka ntani sinzi sawo kwa va dipagere koNdundu zaGiliboa.
2 Vafilisiti tava sikura Sauru novana vendi, makura tava dipaga Jonatana naAbinadaba ntani naMalikisuwa vana vaSauru.
3 Awo kwa rwisire unene Sauru, ano vaponyi tava mu mono, tava mu ponyo, ta remana unene.
4 Makura Sauru ta tantere ogu ga mu simbilire yirwiso yendi asi: “Gusa mo rufuro roge oru twe nge, yipo vagara ava va dira kurugana yovamba va dire kuyatwa nge nokuhepeka nge.” Nye ogu ga mu simbilire yirwiso yendi kapi ga here kuyirugana morwa kwa tjilire. Makura Sauru ta gusa rufuro ta ligandere ko.
5 Mugara ogu ga mu simbilire yirwiso apa ga mwene asi Sauru ana fu, makura nage ta ligandere korufuro rwendi, ta fu.
6 Yipo nye, Sauru novana vendi vatatu nomugara ogu ga mu simbilire yirwiso yendi ntani novakwayita vendi, navenye kwa fire mezuva olyo.
7 Vaisraeli ava va kere momuramba nomomukunda gwaJorodana apa va mwene asi vakwayita woVaisraeli vana duka ntani Sauru novana vendi vana fu, tava tundu moyitata va duke, makura Vafilisiti tava wiza va ya tunge moyitata oyo.
8 Ezuva lyokukwama ko apa va wizire Vafilisiti va ya guse yininke yovakwayita ava va dipagere, tava gwana koNdundu zaGiliboa Sauru novana vendi vatatu vana fu.
9 Makura tava tete ko mutwe gwendi ntani tava gusa yirwiso yendi, makura tava tumu mbudi mosirongo nasinye soVafilisiti yipo va yi divise monontembeli doyikarunga yawo ntani kovantu vawo.
10 Awo kwa tulire yirwiso yendi montembeli zaAsitarete ntani tava pamparere simpu sendi kekuma lyomoBete-sani.
11 Apa va yi zuvhire vantu ava va tunga moJabesi-giliyata eyi va rugene Vafilisiti Sauru,
12 vakwayita navenye tava zi masiku tava ka gusa simpu saSauru noyimpu yovana vendi kekuma lyomoBete-sani, makura tava tengura koJabesi, tava ka yi hwika.
13 Tava gusa yisupa yawo tava yi vhumbike mositji sotamalisiki moJabesi, tava dilire mazuva ntambali.
