Samwere gokuhova 4:1-22
4 Makura Samwere ta tumu mbudi koVaisraeli navenye.
Vaisraeli kwa zire va ka rwise Vafilisiti, awo kwa dikire kamba zawo moEbenesere, ano Vafilisiti kwa dikire kamba zawo moAfeki.
2 Vafilisiti kwa liwapaikilire va rwise Vaisraeli, makura Vafilisiti tava fundu Vaisraeli. Awo kwa dipagere vakwayita woVaisraeli wokusika koyiha 4 000.
3 Apa va tengwire Vaisraeli kokamba, masimbi goVaisraeli taga tanta asi: “Morwasinke Jehova ana pulisilire Vafilisiti va tu funde?* Tu zeni tu ka simbe sikesa saJehova segwanekero koSiro, yipo ngasi ya kare nose, si tu popere kononkore detu.”
4 Makura tava tumu vagara koSiro va ka simbe sikesa segwanekero saJehova Mupitisili govakwayita vemeguru, ogu ga hingira keguru* lyovakerubi posipundi sendi souhompa. Apa va ka simbire sikesa segwanekero saKarunga gousili, vana vavali vaEli, Hofini naPinehasa kwa kere kumwe nawo.
5 Tupu sa ya sikire sikesa saJehova segwanekero mokamba, Vaisraeli navenye tava zigire unene dogoro evhu tali kankama.
6 Apa va zuvhire Vafilisiti vantu kuna kuzigira, tava tanta asi: “Morwasinke muna karere ezogerero mokamba zoVahebeli?” Makura konyima tava zuvhu asi sikesa saJehova vana reta mokamba.
7 Vafilisiti tava tukuka, yeeyi awo kwa tente asi: “Karunga ana wiza mokamba!” Makura tava tanta hena asi: “Moudigu tuna kara. Kapi ya horoka rumwe yininke yokufana ngesi!
8 Moudigu tuna kara! Yilye ogu natu popera mokuwoko kwaKarunga ogu gononkondo? Karunga ogu yige ga dipagere Vaegipite momburundu nomahepeko gokulisiga-siga.
9 One Vafilisiti, kareni nouradi ntani rweni ngwendi moomu ava ru vagara, yipo ngomu dire kuruganena Vahebeli ngwendi moomu va mu ruganena. Rweni ngwendi moomu ava ru vagara!”
10 Makura Vafilisiti tava ru, tava fundu Vaisraeli. Ano nkenye Muisraeli ta dukire kotende zendi. Ezuva olyo vantu wovanzi kwa fire; vakwayita woVaisraeli ava va dipagere kwa kere 30 000.
11 Awo kwa kwete hena sikesa saKarunga, ano vana vaEli vavali Hofini naPinehasa, tava fu.
12 Mugara gumwe gomorudi rwaMbenyameni kwa dukire a tunde oku va rwililire yita, ta ka sika koSiro ezuva lyoolyo, age ana taura yikoverero yendi ntani ana litura evhu momutwe.
13 Apa ga ka sikire mugara ogo, Eli kwa hingilire kositaura a ndindire mbudi, morwa kwa kere nosinka kuhamena sikesa saKarunga gousili. Mugara ogo ta zi mositata, ta ka tantera vantu mbudi, makura vantu navenye womositata tava tameke kulira.
14 Apa ga zuvhire Eli vantu kuna kulira, ta pura asi: “Morwasinke vana kulilira vantu?” Mugara ogo ta duka, ta ka tantera Eli mbudi.
15 (Posiruwo oso Eli age nomvhura dendi 98 ntani kapi nga mono.)
16 Makura mugara ogo ta tantere Eli asi: “Ame kuna kutunda oku vana kurwira yita! Naina nina tundu ko.” Eli ta pura asi: “Yisinke yina horoka munange?”
17 Mugara ogu ga retere mbudi ta tanta asi: “Vaisraeli vana duka Vafilisiti morwa vana va fundu ntani vanzi vana dipaga. Vana woge vavali, Hofini naPinehasa vana fu ntani sikesa saKarunga gousili vana si kwata Vafilisiti.”
18 Apa ga zuvhire kuhamena sikesa saKarunga gousili, Eli ta gu kagali posipundi, pepi nevero. Makura nsingo zendi tazi teka ta fu, yeeyi age kwa kurupire ntani munene ga kere. Eli kwa kere mupanguli moIsraeli nomvhura 40.
19 Ngumweyi zendi, mukadaPinehasa kwa kere nomarutu gavali ntani kwa kere pepi nokuhampuruka. Apa ga zuvhire mbudi asi sikesa saKarunga gousili vana si kwata ntani asi tamweyi zendi namugara gwendi vana dogoroka, poopo ngoso ta linyongamene morwa kwa humisire, makura ta hampuruka.
20 Apa ga kere pepi nokufa, vakadi ava va sikeme pepi nage tava mu tantere asi: “Wa ha tjira, yeeyi ove ono hampuruka munona gomumati.” Nye age kapi ga limbwilire ntani kapi ga yi pakerere mbili.
21 Makura age ta ruku munendi asi Ikabodi,* ta tanta asi: “Efumano lina tundu moIsraeli lize mosirongo sapeke.” Age kwa tembe kweyi ya horokerere sikesa saKarunga gousili natamweyi zendi ntani namugara gwendi.
22 Age kwa tente hena asi: “Efumano lina tundu moIsraeli lize mosirongo sapeke morwa sikesa saKarunga gousili vana si kwata.”
Nonkango dokonhi
^ MoRuhebeli asi “Morwasinke ana tu fundire Jehova?”
^ Ndi nampo asi “pokatji.”
^ Kutanta asi “Kupi lina kara efumano?”
