Samwere gokuhova 5:1-12
5 Apa va gusire Vafilisiti sikesa saKarunga gousili moEbenesere, tava si twara koAsidodo.
2 Vafilisiti kwa twere sikesa saKarunga gousili montembeli zaDagoni, makura tava ka si tura pepi naDagoni.
3 Ezuva eli lya kweme ko apa va pindukire ngurangura zonene Vaasidodo, tava gwana Dagoni ana gwire pevhu komeho zosikesa saJehova. Makura tava mu damuna va mu tengwidire pevega eli ga kere.
4 Ezuva eli lya kweme ko apa va pindukire hena ngurangura zonene, tava gwana Dagoni ana gwire pevhu komeho zosikesa saJehova. Mutwe gwendi noyikandeko yendi kwa bomokere ko ntani kwa kere pevero lyontembeli. Ruha rwendi rokufana ngwendi mfi,* yiro rwelike rwa dilire kubomoka.
5 Eyi yiyo vapristeli vaDagoni ntani nava ava hwilire montembeli zaDagoni ava dilire kulyata pevero lyontembeli zaDagoni moAsidodo, pevega eli ga gwililire.
6 Jehova kwa tengekere Vaasidodo ntani kwa va hepekere kumwe novantu ava va tunga monomukunda dawo pokuvaninka va kare nonomusira.*
7 Vaasidodo apa va mwene eyi ya horokere, tava tanta asi: “Guseni mo sikesa saKarunga goVaisraeli mokatji ketu, yeeyi age ana tu tengeke kumwe nakarunga gwetu Dagoni.”
8 Makura tava tumu mbudi kovahompa navenye woVafilisiti va ya ponge. Awo tava va pura asi: “Yisinke natu si rugana sikesa saKarunga goVaisraeli?” Vahompa tava limburura asi: “Twareni sikesa saKarunga goVaisraeli koGata.” Makura tava si twara koGata.
9 Konyima zapa va si twere koGata, Jehova ta tengeke vantu womositata oso ntani ta va piyaganeke. Age kwa tengekere vantu navenye pokuvaninka va kare nonomusira.
10 Makura tava twara sikesa saKarunga gousili koEkironi, nye apa sa ka sikire, vantu womoEkironi tava zigire asi: “Vana tu retere sikesa saKarunga goVaisraeli va ya tu dipage!”
11 Makura tava tumu mbudi kovahompa navenye woVafilisiti va ya ponge. Awo tava va tantere asi: “Guseni mo sikesa saKarunga goVaisraeli mu si tware oku mwa ka si simba, yipo ngava dire kutudipaga.” Vantu navenye womositata kwa kere nosinka asi tava fu, yeeyi Karunga gousili kwa va tengekere unene.
12 Ano vantu ava va dilire kufa, kwa va ninkire va kare nonomusira ntani vantu kwa zigilire unene dogoro nkugo zawo tazi zuvhika meguru.
