Samwere gokuhova 6:1-21
-
Vafilisiti tava tengwida sikesa saKarunga koVaisraeli (1-21)
6 Sikesa saJehova kwa kere momukunda goVafilisiti makwedi ntambali.
2 Makura Vafilisiti tava zigida vapristeli nonompure, tava va pura asi: “Yisinke natu si rugana sikesa saJehova? Tu tantereni omu natu si tengwida oku sa tunda.”
3 Makura awo tava limburura asi: “Nsene muna hara kutengwida sikesa segwanekero saJehova Karunga goVaisraeli, mwa ha si tengwida mawoko-woko. Mwa hepa kusitengwida kwaKarunga kumwe nonzambo zokugusisa po nonzo. Nsene ngomu yi rugana, one ngomu veruka ntani ngomu diva asi morwasinke ana kumutengekera.”
4 Makura Vafilisiti tava pura asi: “Yininke musinke natu gava ngonzambo zokugusisa po nonzo?” Awo tava limburura asi: “Gaveni nomusira dongorodo ntano nonompuku ntano dongorodo kuliza nosivaro sovahompa woVafilisiti, yeeyi one kwa ligwanekera noudigu ngwendi wou va ligwanekera nawo vahompa veni.
5 Mwa hepa kurugana mafano gonomusira deni nomafano gonompuku edi dina kuzonagura sirongo ntani mwa hepa kufumadeka Karunga goVaisraeli, nampo na hageka kumutengeka kumwe nakarunga gweni nosirongo seni.
6 Mwa ha kukutika nomutjima deni ngwendi Vaegipite naFarawo. Apa ga va tengekere Karunga, awo kwa sigire Vaisraeli va ze.
7 Wapaikeni karukara kokape nonongombe mbali dononkadi edi va dira kukutira rumwe edi da kara noyitana. Kutireni nongombe odo kokarukara, nye yitana yado yi tengwideni kembo.
8 Guseni sikesa saJehova mu si ture mokarukara ntani mu ture yininke yongorodo eyi muna kugava kwaKarunga ngonzambo zokugusisa po nonzo mosikesa esi nomu tura pepi nosikesa saKarunga, makura mu sige nongombe odo di ze
9 ntani mu di tarere: Nsene nadi pita monzira ezi za kanduka zi ze koBete-semesi sitata soVaisraeli, ayo nayi likida asi Karunga goVaisraeli yige ga tu rugana yininke eyi yoyidona. Nye nsene nadi pita monzira zapeke, ayo nayi likida asi alyo ehudi tupu lya tu gwana.”
10 Makura vagara owo tava rugana moomu va va tanterere. Awo tava gusa nongombe mbali edi da kara noyitana, tava di kutire kokarukara, ano yitana yado tava yi zedilire mosinyongo.
11 Makura tava tura sikesa saJehova mokarukara kumwe nosikesa esi va tulire mafano gonompuku gongorodo nomafano gonomusira dawo.
12 Nongombe odo kwa zire dogoro konzira zokoBete-semesi. Ado kwa twikilire kugenda monzira ozo oku tadi kumbu ntani kapi da zire korulyo ndi korumoho. Ano vahompa woVafilisiti kwa di kweme monyima dogoro komururani gwaBete-semesi.
13 Vantu womoBete-semesi kwa tezere rukokotwa momuramba. Apa va kankukire, tava mono sikesa makura tava hafa.
14 Makura nongombe edi da kokere karukara tadi ka sika mepya lyaJosuwa ogu ga tungire moBete-semesi, tadi ka sikama pepi nemanya lyenene. Awo tava tavagura karukara oko ntani tava gava nongombe ngonzambo zeswakerero kwaJehova.
15 Varevhi kwa gusire mokarukara sikesa saJehova nosikesa esi va tulire yininke yongorodo, makura tava yi tura pemanya lyenene. Mezuva olyo, vagara womoBete-semesi kwa geve nonzambo deswakerero kwaJehova.
16 Apa va yi mwene vahompa vatano woVafilisiti, tava tengura koEkironi ezuva lyoolyo.
17 Nomusira dongorodo donzambo zokugusisa po nonzo kwaJehova edi va tumine Vafilisiti kwa karerere po sitata saAsidodo, saGasa, saAsikeroni, saGata ntani saEkironi.
18 Awo kwa tumine nompuku dongorodo dokuliza nosivaro soyitata yoVafilisiti eyi ngava pangere vahompa vatano. Yitata eyi kwa yi kundurukidire makuma nonomukunda dayo.
Ano emanya lyenene eli lya kara mepya lyaJosuwa ogu ga tunga moBete-semesi eli va tulire sikesa saJehova kuna kara umbangi dogoro naina.
19 Nye Karunga kwa dipagere vagara womoBete-semesi, morwa awo kwa tere kosikesa saJehova. Age kwa dipagere vantu 50 070,* ano vantu ava va hupire po kwa lilire unene morwa Jehova kwa dipagere vantu wovanzi.
20 Makura vagara womoBete-semesi tava pura asi: “Yilye gokuvhura kuhedera Jehova Karunga gokupongoka ntani kwalye nga za Karunga konyima zapa nga tu siga?”
21 Makura tava tumu vantu koKiliyata-jeyalimu va ka tante asi: “Vafilisiti va tengwida sikesa saJehova. Wizeni mu ya si simbe.”
Nonkango dokonhi
^ MoRuhebeli asi “vagara 70, vagara 50 000.”
