Samwere gokuhova 7:1-17
7 Makura vagara womoKiliyata-jeyalimu tava wiza, tava ya gusa sikesa saJehova, tava si twara kembo lyaAbinadaba eli lya kara pondundu ntani tava horowora* munendi Eliyasara a takamese sikesa saJehova.
2 Konyima zapa sa ya sikire sikesa moKiliyata-jeyalimu, tapa piti nomvhura 20 makura Vaisraeli navenye tava tameke kupapara Jehova.
3 Makura Samwere ta tantere Vaisraeli navenye asi: “Nsene muna hara kutengura kwaJehova nomutjima nagunye, guseni mo mokatji keni yikarunga yapeke nomafano gaAsitarete, mu karere Jehova gelike nomutjima nagunye, makura age nga mu popera koVafilisiti.”
4 Vaisraeli tava zuguma mafano gaBara naga gaAsitarete, makura tava karere Jehova gelike.
5 Samwere ta tanta asi: “Tantereni Vaisraeli va ponge moMisipa, ano ame nani va kanderera po kwaJehova.”
6 Makura tava pongo moMisipa, tava vheta mema metope, tava ga tjire komeho zaJehova ntani tava dilire ezuva olyo. Awo tava tanta asi: “Ose kwa zona kwaJehova.” Makura Samwere ta kara mupanguli goVaisraeli moMisipa.
7 Apa va zuvhire Vafilisiti asi Vaisraeli vana pongo moMisipa, vahompa woVafilisiti tava zi va ka va rwise. Vaisraeli tava kara nowoma apa va yi zuvhire.
8 Makura Vaisraeli tava tantere Samwere asi: “Twikira kukanderera kwaKarunga gwetu Jehova a tu vatere ntani a tu popere koVafilisiti.”
9 Makura Samwere ta gusa nzwigona, tazi gava ngonzambo zeswakerero kwaJehova ntani ta kanderere po Vaisraeli kwaJehova a va vatere, makura Jehova ta mu limburura.
10 Apa ga zembe Samwere nzambo zeswakerero, Vafilisiti tava wiza va ya rwise Vaisraeli. Makura Jehova ta ninki sindundumo sosinene si hagare ntani ta piyaganeke Vafilisiti, ano Vaisraeli tava fundu Vafilisiti.
11 Vaisraeli tava tundu moMisipa va tjide Vafilisiti, tava va dipaga dogoro koMbindakano zaBete-kare.
12 Konyima, Samwere ta gusa emanya, ta li tura pokatji kaMisipa naJesana, ta li ruku Ebenesere,* yeeyi age kwa tente asi: “Jehova kwa tu vatera dogoro ngesi.”
13 Yimo nye ngoso va va fundire Vafilisiti ntani kapi va zire hena mosirongo soVaisraeli. Jehova kwa twikilire kutengeka Vafilisiti siruwo nasinye esi ga parukire Samwere.
14 Ano nomukunda noyitata yoVaisraeli eyi va gusire Vafilisiti kutundilira koEkironi dogoro koGata kwa yi tengwidire koVaisraeli.
Ntani Vaisraeli kwa kere nombili kumwe noVaamoli.
15 Samwere kwa kere mupanguli moIsraeli eparu lyendi nalinye.
16 Nkenye mvhura, age nga zi koBeteli, koGiligali ntani koMisipa ntani age nga pangura Vaisraeli komavango nagenye ogo.
17 Nye konyima, age nga tengura koRama morwa yiko lya kere embo lyendi ntani nga pangura Vaisraeli kevango olyo. Age kwa tungilire Jehova sizambero moRama.
