Samwere gokuhova 8:1-22
8 Apa ga kurupire Samwere, ta tura vana vendi va kare vapanguli moIsraeli.
2 Munendi gombeli kwa kere Jowera, ano sikwamambeli Abiya. Awo kwa kere vapanguli moBere-seba.
3 Nye vana vendi kapi va kweme sihonena sendi; awo ngava pura mfuto ntani ngava tambura mauhwi yipo va dire kupangura pauhunga.
4 Konyima zosiruwo, masimbi nagenye goVaisraeli taga pongo kumwe, taga zi kwaSamwere koRama.
5 Tava mu tantere asi: “Ove ono kurupa ntani vana woge kapi vana kukwama sihonena soge. Yipo nye, tu horowera hompa ogu nga tu pangera* ngwendi nomuhoko dapeke.”
6 Nye ayo kwa guvisire Samwere* apa va tente asi: “Tu horowera hompa nga tu pangere.”* Makura Samwere ta kanderere kwaJehova.
7 Ano Jehova ta tantere Samwere asi: “Purakena nayinye eyi vana kukutantera vantu, yeeyi awo kapisi nyove vana nyoka, nye nyame vana nyoka ngahompa gwawo.
8 Awo kuna kurugana yininke eyi ngava rugana kutunda apa nava gusa moEgipite dogoro naina. Awo kusiga nge va ka karere yikarunga yapeke, eyi yiyo vana kukurugana nove.
9 Yipo nye, va purakena nye wa hepa kuvarondora. Va tantera asi hompa ogu ngava pangera ngava pura va rugane nkenye eyi ana hara.”
10 Makura Samwere ta tantere vantu ava va mu pulire ava horowere hompa, nonkango nadinye edi ga mu tanterere Jehova.
11 Age kwa tente asi: “Eyi yiyo nga rugana hompa ogu nga mu pangera: Age nga ninka vana veni wovagara va ronde momatemba gendi, va ronde nonkambe dendi ntani vamwe ngava duka komeho zomatemba gendi.
12 Age nga horowora vamwe va pitisire vantu mayovi, vamwe vantu nomurongo ntano, vamwe ngava purura, ngava pongaika muzangu gwendi ntani ngava rugana yirwiso yendi yomoyita noyiruganeso yokomatemba gendi.
13 Age nga ninka vana veni wovakadi va rugane yikwedumba, va kare vatereki ntani vakangi.
14 Age nga gusa mapya geni, yikunino yeni yomandjembere ntani yitji yeni yomauzwe yoyiwa po a yi pe vakareli vendi.
15 Age nga gusa yiumurongo yomomapya geni ntani yomoyikunino yeni, a yi gave komarenga gendi ntani kovakareli vendi.
16 Age nga gusa vakareli veni wovagara nava wovakadi nonongombe deni donongwa po ntani yindongi yeni yipo a yi ruganese.
17 Age nga gusa yiumurongo yononzwi noyikombo yeni ntani one ngomu kara vakareli vendi.
18 Ezuva ngali wiza apa ngomu likwambera kwaJehova morwa hompa ogu mwa horowora, nye age kapi nga mu limburura.”
19 Nampili ngoso, vantu kapi va purakenene eyi ga va tanterere Samwere. Awo kwa tente asi: “Ose tuna hara kukara nahompa a tu pangere,
20 ngatu kare ngwendi nomuhoko dapeke. Hompa gwetu nga tu pangera,* nga tu pitisira ntani nga tu rwira po yita.”
21 Konyima, Samwere ta ka tantera Jehova eyi va uyungire vantu.
22 Makura Jehova ta tantere Samwere asi: “Va purakena ntani horowora hompa ogu nava pangera.” Makura Samwere ta tantere Vaisraeli va tengure koyitata yawo.
Nonkango dokonhi
^ MoRuhebeli asi “pangura.”
^ MoRuhebeli asi “kwa kere yininke yoyidona kwaSamwere.”
^ MoRuhebeli asi “pangure.”
^ MoRuhebeli asi “pangura.”
