Samwere gokuhova 9:1-27
-
Samwere ta ligwana naSauru (1-27)
9 Pwa kere mugara gomorudi rwaMbenyameni gedina Kisi, age kwa kere munaAbiyeli mutekurwaSeroro zaBekorata zaAfiya. Mugara ogu kwa kere ngawo zonene.
2 Kisi kwa kere namunendi gomugara gedina Sauru gomuwa mosipa. MoIsraeli kapi mwa kere mumati gomuwa kumupitakana ntani mure ga kere kupitakana vantu navenye. Vantu navenye kwa hulire tupu pomapepe gendi.
3 Ezuva limwe apa ya zumbanene yindongi* yoguhwe Kisi, Kisi kwa tanterere munendi Sauru asi: “Zende kumwe nomukareli mu ka papare yindongi.”
4 Awo kwa paparere momukunda nagunye gonondundu gwaEfurayimi ntani momukunda gwaSalisa, nye kapi va ka yi gwene. Makura tava zi momukunda gwaSalimi, nye namo kapi va ka yi gwene mo. Tava gendi momukunda nagunye gorudi rwaMbenyameni, nye kapi va ka yi gwene.
5 Tava ya siki momukunda gwaSufu, makura Sauru ta tantere mukareli gwendi asi: “Tu tengure kembo yipo tu dire kuretera otate sinka.”
6 Nye mukareli gwendi ta mu tantere asi: “Mositata esi kwa kara mo muporofete gwaKarunga ogu va fumadeka unene. Nayinye eyi a uyunga, kusika mo. Tu ze kwendi, nampo na ka tu tantera oku natu za.”
7 Makura Sauru ta tantere mukareli gwendi asi: “Yisinke natu ka mu pa mugara ogo nsene natu za? Ose kapi tuna kara nomboroto monondjato detu. Kwato uhwi ou natu ka gava komuporofete gwaKarunga gousili. Yisinke tuna kara nayo?”
8 Mukareli ta limburura Sauru asi: “Ame nina kara nosisiliveli.* Tani ka si gava komuporofete gwaKarunga gousili, yipo a ka tu tantere oku natu za.”
9 (Mosiruwo sanare moIsraeli, nsene muntu ana hara kuza a ka pure yuma kwaKarunga, age nga tanta asi: “Tu ze komuntu ogu a pumbu.” Yeeyi vaporofete nare ngava va tumbura asi vapumbi.)
10 Makura Sauru ta tantere mukareli gwendi asi: “Egano lyoge ewa. Ninka tu ze.” Makura tava zi mositata esi ga kere muporofete gwaKarunga gousili.
11 Apa va zire mositata, tava gwanekere novakadi ava va zire va ka vhete mema, tava va pura asi: “Mositata esi mwa kara muntu ogu a pumbu ndi?”
12 Awo tava limburura asi: “Nhi, mweli. Komeho zeni ana kara. Genderereni, yeeyi age kuna wiza naina mositata morwa vantu kuna kugava nzambo kondundu.*
13 Nomu ka mu gwana apa tupu nomu ka hwilira mositata. Zendeni usimbu komeho a ze kondundu a ka lye. Vantu kapi nava lya dogoro a ka sike, yeeyi yige a tungike nonzambo. Apa na mana ntani nava lya ava ana zigida. Zendeni usimbu nomu ka mu gwana.”
14 Makura awo tava zi mositata. Apa va gendere va ze pokatji kositata, tava mono Samwere kuna kuwiza a gwanekere nawo komeho a ze kondundu.
15 Komeho a wize Sauru, Jehova kwa tanterere Samwere asi:
16 “Mungura posiruwo esi, ngani kutumina mugara gomorudi rwaMbenyameni. Ngo mu gwaveke yipo a kare hompa goVaisraeli. Age nga popera vantu vange koVafilisiti. Yeeyi ame na mona omu vana kuhepa vantu vange ntani na zuvha omu vana kusivana.”
17 Samwere apa ga mwene Sauru, Jehova ta mu tantere asi: “Ogu yige mugara ogu kani ku tanterere nga pangera vantu vange.”
18 Makura Sauru ta hedere Samwere pevero lyositata, ta pura asi: “Kupi lya hamena embo lyomuntu ogu a pumbu?”
19 Samwere ta tantere Sauru asi: “Nyame ogu ono kupapara. Pita komeho tu ze kondundu, tu ka lye kumwe. Ngurangura ntani ngo za, ame ngani kutantera nayinye eyi ono hara kudiva.*
20 Wa ha kara nosinka kuhamena yindongi eyi ya zumbana mazuva gatatu gana ka pita, yeeyi ayo vana yi gwana. Emona nalinye lyomoIsraeli nani kapisi lyoge nepata lyoguho?”
21 Makura Sauru ta limburura asi: “Ame gomorudi rwaMbenyameni, rudi rorununu po mokatji koVaisraeli ntani epata lyetu yilyo po lyokudira mulyo morudi rwaMbenyameni. Morwasinke nye ono kutanterera nge yininke eyi?”
22 Makura Samwere ta zi kumwe naSauru nomukareli gwendi mevango eli ava lire. Samwere ta va ninki va hingire poyipundi eyi ava hingire vantu womulyo. Awo kwa hingilire kumwe novantu ava va zigidire ntani mevango olyo kwa kere mo vagara 30.
23 Samwere ta tantere mutereki asi: “Retera nge ruha oru nina ku tantere o tulikire nge.”
24 Makura mutereki ta damuna sirama neyi ya kere ko, ta si twarere Sauru. Samwere ta tanta asi: “Vana ku retere eyi nina ku tulikire. Lya, yeeyi kuna yi tulikire silika esi morwa ame kuna va tantere asi: ‘Nina kara novagenda.’” Makura Sauru ta li kumwe naSamwere ezuva olyo.
25 Makura tava tundu kondundu va ze kositata, ano Samwere ta ka twikira kuuyunga naSauru peguru lyonzugo.
26 Ezuva eli lya kweme ko, tava pinduka ngurangura zonene. Ano apa lya pumine ezuva, Samwere ta zigida Sauru ogu ga kere peguru lyonzugo, ta mu tantere asi: “Liwapaikira yipo ni ku rekere o ze.” Makura Sauru ta liwapaikire, tava pwaga kumwe ponze naSamwere.
27 Apa va pwege ponze zositata, Samwere ta tantere Sauru asi: “Tantera mukareli goge a pite komeho, nye ove sikama paapa ni ku tantere mbudi zokutunda kwaKarunga.” Makura mukareli ta piti komeho.
Nonkango dokonhi
^ MoRuhebeli asi “yindongi yoyikadi.”
^ MoRuhebeli asi “siune (1/4) soshekel.” Shekel zimwe kwa hura ponograma 11,4. Tara App. B14.
^ Kwa tamba evango eli ava karere Karunga.
^ MoRuhebeli asi “nayinye eyi yina kara momutjima goge.”
