Mbilive zokuhova kwaTimoteusa 2:1-15
2 Pomuhowo, tani ku tumangeda o pandure noku kanderera po vantu navenye pokulikwambera kwaKarunga a va vatere,
2 kukwatera mo vahompa novapangeli* navenye yipo tu kare mompora nomombili, tu karere Karunga nelituromo ntani nomutjima nagunye.
3 Eyi yiwa ntani ayo kuhafesa Karunga Muzowoli gwetu,
4 ogu ga hara asi vantu navenye va va parure ntani va kare nediwo lyousili.
5 Yeeyi Karunga gumwe tupu ga kara po ntani ogu a gwanekedesa vantu naKarunga gumwe tupu, Jesus Kristusa. Mugara ogu
6 kwa ligava mwene a kare sizoweseso* sanavenye.* Eyi ngava yi gavera umbangi apa ngasi sika mo siruwo.
7 Umbangi owo yiwo ga horowera nge Karunga ni kare muzuvhisi nomupositoli. Yipo ni ronge wokonomuhoko dapeke kuhamena epuro nousili. Usili nina kuuyunga, kapi nina kukumbagera.
8 Yipo nye, ame kwa hara asi nkenye oku muna kuponga, vagara navenye ava pongoke ntani ava zerure mawoko gawo pokukanderera, va hana ehandu nonompata.
9 Ntani hena, ame kwa hara asi vakadi ava gazadare ko nawa yipo va liwapeke monkedi zefumadeko* nokudwara yidwara yokuwapera. Walye ava litakere yininke yokudira kuzira mo nokulitjapera ngorodo ndi kudwara yikoverero yondiro unene,
10 nye ava liwapeke monkedi ezi za wapera vakadi ava ava karere Karunga. Ava rugane yirugana yoyiwa, eyi yiyo ayi va wapeke.
11 Mukadi a mwene* nokulinunupika ngomu vana kumuronga.
12 Mukadi ga ha ronga ndi a pangere mugara, nye a mwene.*
13 Yeeyi Adamu yige va hovere kusita, ntani nye kwa kweme Eva.
14 Ntani hena, Adamu kapisi yige va kumbagerere, nye mukadi yige va kumbagerere makura ta zono.
15 Nye nampili ngoso, age nga ka parukira mokukara zinya, nsene tupu a* twikira kukara nepuro neharo ntani nsene a pongoka nokukara nonondunge.
Nonkango dokonhi
^ Ndi “nava va kara nononkondo dokupangera.”
^ Kwa tamba komfeto ezi za liza neyi ya zumbana.
^ Ndi “vantu womarudi nagenye.”
^ Ndi “zokuzira mo.”
^ Ndi “liture.”
^ Ndi “liture.”
^ MoRuhebeli asi “va.”
