Vakolinte wokuhova 1:1-31
1 Mbilive ezi kuna kutunda kwange ame Paurusa ogu va horowora keharo lyaKarunga ni kare mupositoli gwaJesus Kristusa ntani kwamukwetu Sositenesi
2 zi ze kombungakriste zaKarunga moKolinte noku kwanavenye wokomavango gokulisiga-siga ava va tambura Jesus Kristusa Hompa gwetu, age Hompa gwetu naHompa gwawo. Karunga kwa mu lipongwera mouumwe naJesus Kristusa ntani kwa mu horowora mu kare vapongoki.
3 Karunga Guhyetu naHompa Jesus Kristusa ngano va mu fire nkenda unene nokumupa mbili.
4 Ame nkenye apa kupandura Karunga gwange konkenda zendi zonene ezi ga mu likida kupitira mwaJesus Kristusa,
5 one kwa kara mouumwe nage, eyi yiyo nye mwa divira nawa kudivisa mbudi zaKarunga ntani mwa diva nawa yousili.
6 Morwa mwa pura eyi va mu zuvhisira kuhamena Kristusa,
7 eyi yiyo mwa gwanena mauhwi nagenye ngomu muna kundindira Hompa gwetu Jesus Kristusa nga likide nonkondo dendi.
8 Karunga nga mu nkondopeka dogoro kouhura yipo ngava dire kumupa usima mezuva lyaHompa gwetu Jesus Kristusa.
9 Karunga ogu ga mu horowora mu kare mouumwe* naMunendi Jesus Kristusa Hompa gwetu, kusikisa mo nonkango dendi.
10 Vakwetu, tani mu korangeda medina lyaHompa gwetu Jesus Kristusa mu kare mouumwe mweyi omu uyunga. Mwa ha kara maligaunuko mokatji keni nye kareni mouumwe momagazaro nomositambo simwe.
11 Yeeyi vamwe vemembo lyaKorowe kwa tantera nge kumuhamena one vakwetu asi mokatji keni kuna kara mo maligaunuko.
12 Eyi nina tamba yeyi asi vamwe veni kuna kutanta asi: “Ame kwa hamena kwaPaurusa,” ogu asi “ame kwaAporo,” mukwawo asi “ame kwaKefasa,”* ano gumwe asi “ame kwaKristusa.”
13 Nani Kristusa kwa mu gaununa? Paurusa nani yige ga mu fira?* Ndi kwa mu kuhwira medina lyaPaurusa?
14 Tani pandura Karunga asi kwato gumwe gweni na kuhwa ntudi Kilisipusa naGaiyusi,
15 yipo ngomu dire kutanta asi kwa mu kuhwira medina lyange.
16 Ntani na kuhwa hena vembo lyaSitefanasi. Nye wokuhupa ko kapi nina kudiworoka nsene na va kuhwa.
17 Yeeyi Kristusa kapi ga tumina nge ni ya kuhwe nye ni ya divise mbudi zongwa nye kapisi nononkango dounongo,* yipo nomfa daKristusa dokositji* di dire kukara domawoko-woko.
18 Yeeyi mbudi zokuhamena nomfa daKristusa dokositji,* ugova kwava ngava ka zonauka, nye kwetu ose vana kuparura, mbudi ozo kulikida nonkondo daKarunga.
19 Yeeyi kwa tjanga asi: “Ngani zonagura po unongo wovanongo ntani kapi ngani tambura* ediwo lyovanandunge.”
20 Kupi vana kara vanongo novalirongi womatjangwa* novalitatani womouzuni* ou? Karunga nani kapi ga ninka unongo wouzuni ou u kare ugova?
21 Yeeyi vantu womouzuni ou kwa huguvara mounongo wavene, yiyo va dilira kudiva Karunga. Nye Karunga mounongo wendi kwa parura ava ava pura mombudi ezi atu zuvhisa ezi ava tara vantu womouzuni ou asi ugova.
22 Yeeyi Vajuda kupura yidiviso, ano Vagereka kupapara unongo
23 nye ose kuzuvhisa Kristusa ogu va pampara kositji, ano eyi kupundukisa Vajuda, ano nomuhoko dapeke kuyitara asi ugova.
24 Nye kowo va horowora, va kare asi Vajuda ndi Vagereka, Kristusa yige nonkondo nounongo waKarunga.
25 Yeeyi yininke eyi ya tunda kwaKarunga eyi ava tara vantu asi ugova, kwa kara nounongo kupitakana vantu, ano yininke eyi ya tunda kwaKarunga eyi ava tara vantu asi kwato nonkondo, kwa kara nononkondo kupitakana vantu.
26 Vakwetu, apa ga mu zigidire Karunga, kapisi namuvenye kwa kere vanandunge kuliza nomutaro gosintu ndi vanankondo ntani kapisi namuvenye kwa tunda momapata aga ga divikwa.
27 Nye Karunga kwa horowora yininke eyi ava tara mouzuni ou asi ugova a fise nomuga vanandunge, ntani Karunga kwa horowora yininke eyi ava tara mouzuni ou asi kwato nonkondo a fise nomuga yininke yononkondo.
28 Karunga kwa horowora eyi ava tara mouzuni ou asi kwato mulyo ntani neyi ava sense, eyi ava tara asi nayimwe si, a zonagure po eyi ava tara asi mulyo.
29 Yipo ngapa dire ogu nga likanganga kosipara saKarunga.
30 MwaKarunga yimo mwa karera mouumwe naJesus Kristusa. Age kwa horora unongo nouhungami waKarunga. Kupitira mwaJesus, vantu kuvhura kuvapongora ntani awo kuvhura kuvazowora kupitira mosizoweseso.
31 Yipo ngayi kare ngamoomu va yi tjanga asi: “Ogu ana kulikanganga, a likangangere mwaJehova.”
Nonkango dokonhi
^ Ndi “vakaume.”
^ Eli edina limwe hena lyomupositoli Peturusa.
^ Ndi “va pampara kositji.”
^ Ndi “dava va lironga.”
^ Ndi “ngani kandwira kwina.”
^ Kwa tamba ava va diva nawa Veta zaMosesa.
