Vakolinte wokuhova 10:1-33
10 Vakwetu, nina hara mu dive asi ozinyakurwetu navenye kwa gendere momundwire geremo ntani navenye kwa pitire mefuta
2 ntani navenye kwa va kuhwilire mwaMosesa kupitira meremo nemefuta,
3 navenye kwa lire nondya edi ga va pere Karunga
4 ntani navenye kwa nwine mema aga ga va pere Karunga. Rorunzi awo ngava nu mema aga ngaga tundu memanya lyenene eli ngali va kwama. Emanya olyo kwa fanekesere Kristusa.
5 Nampili ngoso, Karunga kapi ga haferere sinzi sawo yiyo va va dipagerere momburundu.
6 Yininke eyi kwa kara ngosihonena kwetu, yipo tu dire kudowokera yininke yoyidona ngwendi moomu va yi dowokerere awo.
7 Walye omu karere yikarunga yoyimpempa ngwendi moomu va yi rugene vamwe ngamoomu va yi tjanga asi: “Vantu kwa hingilire va lye noku nwa. Makura tava katuka va hafere.”
8 Walye atu hondereni* ngwendi moomu va honderere* vamwe makura pa fe vantu 23 000 mezuva limwe tupu.
9 Walye atu heteke Jehova ngwendi moomu va mu hetekere vamwe makura va fe komazoka.
10 Walye omu vhunguta ngwendi moomu va vhungutire vamwe makura a va dipage mudipagi.
11 Yininke eyi ya va horokerere kwa yi tjangera tu lirongere ko yipo ose ava tuna kuparuka pomazuva gopouhura tu dire kuvahonena.
12 Yipo nye, ogu ana kugazara asi ana sikama a takamese asi ga ha liganda.
13 Kutupu maheteko aga aga mu gwana ga hana asi gaaga aga gwana vantu navenye. Nye Karunga mulimburukwi ntani age kapi nga mu tarerera mu pite momaheteko aga ngomu dira kuvhura kulididimikira, nye age nga mu vatera mu pite momaheteko yipo mu vhure kugalididimikira.
14 Yipo nye vakwetu wokuhara, tjwayukeni yikarunga yoyimpempa.
15 One vantu wonondunge, tokoreni nsene asi eyi nina kuuyunga usili ndi hawe.
16 Nkinda zorupandu ezi atu gavere rupandu, nani kapisi kwa fanekesa honde zaKristusa? Mboroto ezi atu bamuna, nani kapisi kwa fanekesa rutu rwaKristusa?
17 Yeeyi mboroto zimwe tupu za kara po, nampili ngomu twa kara tuvanzi, ose rutu rumwe tupu yeeyi natuvenye kulya komboroto ozo.
18 Gazareni kuhamena Vaisraeli. Apa ngava li nonzambo edi ngava zamba posizambero, nani kapi ya kere ngwendi kuna kulya kumwe naKarunga?
19 Yisinke nye nani tanta? Ni tante nye asi eyi ava zambere sikarunga soyimpempa mulyo, ndi asi sikarunga soyimpempa mulyo?
20 Hawe, ame kuna tamba asi yininke eyi adi zamba nomuhoko kuyizambera konompepo donondona nye kapisi kwaKarunga ntani ame kapi nina mu harere mu likwatakane nonompepo donondona.
21 Kapi tomu vhuru kunwa monkinda zaJehova ntani mu nwe hena monkinda zonompepo donondona, kapi tomu vhuru kulya “kositafura saJehova” ntani mu lye hena kositafura sonompepo donondona.
22 Ndi ‘kuna hara kuninkisa Jehova a kare nesupa’? Ose ngoso nonkondo nye kumupita age?
23 Yininke nayinye va yi pulisira, nye kapisi nayinye yiwa. Yininke nayinye va yi pulisira nye kapisi nayinye kunkondopeka.
24 Nkenye ogu a kondjere uwa wamukwawo nye kapisi wamwene.
25 Lya nkenye nyama ezi ava randesa pomarandesero wa hana kulipura morwa ezwi lyoge lyokomutjima,
26 yeeyi “uzuni nanayinye ya kara mo kwa tunda kwaJehova.”
27 Nsene ogu ga dira kupura a kuzigida, ka lye nkenye eyi na ka kupa wa hana kulipura morwa ezwi lyoge lyomutjima.
28 Nye nsene gumwe a kutantera asi: “Eyi kuna yi zamba,” wa ha yi lya morwa googu ana yi kutantere ntani morwa ezwi lyokomutjima.
29 Kapi nina tamba ezwi lyoge lyokomutjima, nye lyomuntu gwapeke. Yeeyi umanguruki wange kapi nina hara va u pangure kuliza nezwi lyokomutjima lyomuntu gwapeke.
30 Nsene asi ame kuna kulya oku tani pandura Karunga, morwasinke nava uyungira nge wopeke momudona kweyi ani gavere rupandu?
31 Yipo nye asi nkenye eyi muna kulya ndi muna kunwa ndi nkenye eyi tupu muna kurugana, nayinye omu yi rugane mokufumadekesa ko Karunga.
32 Takameseni asi mwa ha pundukisa Vajuda noVagereka ntani mbungakriste zaKarunga,
33 ngwendi moomu tupu nina kuhetekera ko kuhafesa vantu navenye mwanayinye na hana kukondjera uwa wanyamwange nye wovantu wovanzi yipo ngava va parure.
