Vakolinte wokuhova 11:1-34
11 Omu honene nge ngwendi moomu name ani honene Kristusa.
2 Vakwetu, tani mu pandura unene kweyi omu diworoka nge mwanayinye ntani kweyi muna kurugana yininke nayinye ngamoomu tupu na mu ronga.
3 Nye ame kuna hara mu dive asi mutwe* gwankenye mugara, Kristusa, ano mutwe gomukadi, mugara, ano mutwe gwaKristusa, Karunga.
4 Nkenye mugara ogu a kanderere ndi a divisa mbudi zaKarunga nye age komutwe gwendi yuma ko, kuswaukisa mutwe gwendi,
5 ano mukadi ogu a kanderere ndi a divisa mbudi zaKarunga nye age mutweetwe, kuswaukisa mutwe gwendi, yeeyi ayo kwa lifana nomukadi ogu vana kurura.
6 Yeeyi mukadi nsene kapi ana kutura ko yuma komutwe gwendi, hansa va mu kurure nye nsene asi kuretera mukadi eswau yokuteta ndi yokukurura nohuki dendi, a ture ko yuma komutwe gwendi.
7 Mugara ga ha tura yuma komutwe gwendi, yeeyi age sihwi nouyerere waKarunga, nye mukadi efumano lyomugara.
8 Yeeyi Karunga kapi ga sitire mugara a tunde korutu romukadi nye mukadi yige va sitire a tunde korutu romugara.
9 Ntani hena, mugara kapi va mu sitira mukadi nye mukadi yige va sitira mugara.
10 Eyi yiyo ga hepera mukadi kutura yuma komutwe gwendi ngosidiviso soulimburukwi wendi kwamugara gwendi morwa vaengeli.
11 Mombungakriste zaHompa, mugara ga hepa mukadi ntani mukadi nage ga hepa mugara.
12 Ngamoomu tupu mukadi va mu sita a tunde korutu romugara, mugara nage mukadi a mu hampuruka nye nayinye Karunga ga yi sita.
13 Tokoreni nyamweni, ayo ya wapa komukadi a kanderere kwaKarunga age mutweetwe ndi?
14 Kapi omu lirongere ko kwene kounsitwe asi ayo eswau komugara mokukara nonohuki dononde ndi?
15 Nye mukadi nsene a kara nonohuki dononde, kwendi efumano. Yeeyi nohuki dendi kwa di mu pera di mu kudumike.
16 Nye nkenye ogu ana kuyipatanesa eyi, ose kapi twa paka nkedi zangoso, nomonombungakriste si daKarunga moomu.
17 Nye pokumupa mapukururo aga, ame kapi nina kumupandadeka morwa kapi ayi mu retere uwa apa omu pongo kumwe nye kumuretera udona.
18 Sokuhova, ame kuzuvha asi mokatji keni kukara mo maligaunuko apa omu pongo mombungakriste, ano koruha rumwe ame nina yi pura.
19 Yeeyi mokatji keni ngamu kara tumbunga yipo ngayi lihorore asi wolye ga hafera Karunga.
20 Apa omu pongo kumwe kapi omu pongo nositambo sokulya Murarero gwaHompa.
21 Yeeyi apa omu gu li, nkenye ogu kuhova kulya murarero gwamwene makura ogu gumwe po nzara ano ogu mukwawo ana korwa.
22 Kapi mwa kara nomambo gokulira nokunwina ndi? Ndi one kwa nyenga mbungakriste zaKarunga nokuninka ava va dira kukara noyuma va life nomuga? Yisinke nani uyunga? Ni yi mu pandadekere nye ndi? Apa kapi nani mu pandadeka.
23 Yeeyi eyi na gwana kwaHompa yiyo na mu ronga asi momasiku aga va mu horwere Hompa Jesus, age kwa gusire mboroto,
24 ano konyima zokupandura oGuhwe, ta zi bamagura nokutanta asi: “Azo kwa fanekesa rutu rwange oru ngava mu pa. Omu yi rugane eyi mokudiworokera nge po.”
25 Mokulifana, konyima zokulya, ta gusa hena nkinda nokutanta asi: “Nkinda ezi kufanekesa egwanekero lyepe kupitira mohonde zange. Nkenye apa muna kunwa mo, yi ruganeni mokudiworokera nge po.”
26 Yeeyi nkenye apa muna kulya mboroto ezi nokunwa monkinda ezi, nomfa daHompa muna kudivisa dogoro nga wize.
27 Yeeyi nkenye ogu a li komboroto ndi a nwe monkinda zaHompa, age ya hana kumufira, nga kara nousima wohonde norutu rwaHompa.
28 Pomuhowo muntu ga hepa kulikonakona mwene yipo a dive nsene sili yina mu fire yokulya komboroto nokunwa monkinda.
29 Yeeyi muntu nsene a dira kudimburura asi eyi kwa karera po rutu rwaHompa gwetu makura a lye nokunwa, age ngoso kuna kulipangura mwene.
30 Eyi yiyo sinzi seni muna dilire nonkondo nokuvera, ano vamwe veni va fa.*
31 Nye nsene tu likonakona nyamwetu, kapi ngava tu pangura.
32 Nye apa Jehova a tu pangura, age kutupukurura yipo ngava dire kutupangura kumwe nouzuni.
33 Vakwetu, yipo nye asi apa omu pongo mu gu lye, omu lindindire.
34 Nsene pweli ogu ana kuzuvha nzara, a lye kembo, yipo asi apa omu pongo kumwe ngava dire kumupangura. Nye yokuhupa ko ngani ya yi kohonona po apa ngani wiza oko.
Nonkango dokonhi
^ Kwa tamba asi mupangeli.
^ Eyi kapi ya tamba nomfa nye kwa tamba kwava va zumbanesa elikwatakano lyawo naKarunga.
