Vakolinte wokuhova 12:1-31
12 Vakwetu, nina hara mu dive kuhamena mauhwi gopampepo.
2 Mwa yi diva asi apa mwa hamenene konomuhoko,* one kwa mu pukisire yikarunga yokudira kuuyunga mononkedi dokulisiga-siga.
3 Ngesi nina hara mu dive asi kwato ogu azi pitisire mpepo zaKarunga a fingilire Jesus. Ntani kwato ogu a uyunga asi Jesus Hompa za hana kumupitisira mpepo zokupongoka.
4 Pwa kara mauhwi gokulisiga-siga nye mpepo zimwe tupu azi ga gava,
5 yirugana yinzi ya kara po nye nayinye kuyiruganena Hompa gumwe tupu,
6 ntani pwa kara yirugana yokulisiga-siga nye nayinye Karunga a yi rugana mwankenye ogu.
7 Eyi azi va ninkisa mpepo zokupongoka va rugane kuyimonenena ntani Karunga kuzivapera yipo navenye va gwanene mo uwa.
8 Kupitira mompepo zokupongoka gumwe kuuyunga nounongo ntani kupitira simpe mompepo ozo, gumwe kuuyunga nediwo,
9 kupitira mompepo ozo, gumwe kukara nepuro ano gumwe kuverura vaveli,
10 kupitira mononkondo odo, vamwe kurugana yitetu ano vamwe kuzuvhisa nonkango daKarunga. Ano vamwe kudimburura asi eyi ana kuronga muntu kwa tunda kwaKarunga ndi hawe. Ntani vamwe kuuyunga maraka gokulisiga-siga ano vamwe kutoroka maraka.
11 Yirugana nayinye eyi mpepo zimwe tupu azi yi rugana ntani azo kugava mauhwi gokulisiga-siga kwankenye ogu moomu zina yi harere.
12 Rutu rumwe tupu rwa kara po, nampili ngomu rwa kara nomaruha gomanzi, ayo ya lifana naKristusa.
13 Kupitira mompepo zimwe, natuvenye kwa tu kuhwira morutu rumwe, yi kare asi Vajuda ndi Vagereka ndi vapika ndi wokumanguruka, natuvenye kwa gwana mpepo zimwe tupu.
14 Yeeyi rutu kapi rwa kara tupu noruha rumwe nye nomaruha gomanzi.
15 Nsene mpadi zi tanta asi: “Morwa ame kapisi kuwoko, kapi na hamena korutu,” oyo kapi yina kutanta asi kapi za hamena korutu.
16 Ntani nsene kutwi kutanta asi: “Morwa ame kapisi eho, kapi na hamena korutu,” oyo kapi yina kutanta asi kapi kwa hamena korutu.
17 Ngano asi rutu narunye kwa kere eho, ngano kuzuvhisa kupi? Ngano asi rutu narunye kwa kere kutwi, ngano kufumbwilisa kupi?
18 Nye Karunga kwa tura nkenye ruha rorutu ngamoomu ga yi harera.
19 Ngano asi rutu kwa kara nomaruha gokulifana, kuvhura ru kare rutu ndi?
20 Nye apo kwa kara po maruha gomanzi nye rutu rumwe tupu.
21 Eho nokuvhura si kutantera kuwoko asi “kapi nina kuhepa” ndi asi mutwe gu tantere mpadi asi “kapi nina kuhepa.”
22 Nye maruha gorutu aga aga moneka asi kwato nonkondo yigo twa hepa po unene,
23 ano maruha gorutu aga atu gazara asi kapisi mawa, kugakudumika nawa. Ntani maruha gorutu aga atu lifu nomuga, kugawapeka nawa.
24 Nye maruha getu gomawa, kapi ga hepa yuma. Karunga kwa rugana rutu monkedi zokuninka asi a fumadeke maruha aga aga moneka ngwendi asi kapisi mawa komakwawo,
25 yipo pa dire kukara maligaunuko morutu nye maruha nagenye ga lifira-fire sinka.
26 Nsene ruha rumwe ruhepa, maruha makwawo nago taga ru hepesa ko ndi nsene ruha rumwe va ru fumadeka, makwawo nago taga ru hafesa ko.
27 One rutu rwaKristusa ntani nkenye gumwe gweni ruha rorutu oro.
28 Karunga kwa tura vantu ava mombungakriste: Pomuhowo, vapositoli; kukwama mo vaporofete ntani varongi nava ava rugana yitetu nava ava verura nava ava vatere wopeke nava ava pitisire nava ava uyunga maraka gokulisiga-siga.
29 Nani navenye vapositoli? Nani navenye vaporofete? Nani navenye varongi? Nani navenye kurugana yitetu?
30 Nani navenye va kara nouhwi wokuverura? Nani navenye kuuyunga momaraka? Nani navenye vatoroki?
31 Nye kondjereni po mauhwi gomanene. Ngani ya mu likida eyi ya pitakana po yikwawo.
Nonkango dokonhi
^ Kwa tamba apa va dilire kupura mwaKarunga.
