Vakolinte wokuhova 13:1-13
-
Eharo kwa pitakana nayinye (1-13)
13 Nsene ni uyunga momaraka govantu naga govaengeli nye ame kwato eharo, ame ngwendi sivera esi asi hagara ndi ngwendi ngenzo ezi azi ngwerengana.
2 Nampili ni kare nouhwi wokuuyunga mbudi zaKarunga nokukwata egano yihoramo nayinye yaKarunga nediwo nalinye nepuro lyenene yipo ni dirure nondundu nye ame kwato eharo, opo ame nayimwe si.
3 Nsene ni gava yininke yange nayinye mokupakera mbili wopeke ntani nsene ni gava rutu rwange ngonzambo yipo ni likangange nye ame kwato eharo, kwato eyi ngayi kwafa nge.
4 Eharo kulididimika ntani nkenda. Kapi lya kara nomfudu. Kapi ali likanganga, kapi ali linenepeke,
5 kapi lya kara nonkareso zondona, kapi ali kondjere uwa walyene, kapi ali handuka usimbu. Kapi lya kara nonkoko.
6 Kapi ali hafere udona nye kuhafera usili.
7 Alyo kwa kwata nayinye, alyo kupura nayinye, kuhuguvara nayinye ntani kulididimikira nayinye.
8 Eharo kapi ali haga. Nye uhwi wokuuyunga mbudi zaKarunga ngau haga, ano kuuyunga momaraka* nako ngaku haga nediwo nalyo ngali haga.
9 Yeeyi ose kwa kara nediwo lyesesu ntani ose kapi atu uyunga nayinye yombudi zaKarunga
10 nye apa ngatu kara nediwo nalinye, eyi yoyisesu ngayi haga po.
11 Apa na kere munona, ngani uyunga sinona nokugazara sinona nokuteda sinona, nye apa nina ya kuru, yininke yosinona nayinye na yi siga.
12 Yeeyi ngesi ose kapi tuna kumona nawa ngwendi googu ana kulitara montarero zosivera nye konyima ngatu mona nawa ngwendi googu ana kulimona nomuntu sipara nosipara. Ngesi ediwo lyange esesu nye komeho ngali vhuka ngamoomu ga diva nge Karunga.
13 Nye eyi ngayi karerera po: epuro nehuguvaro, neharo nye sosinene po pweyi kuna kara eharo.
Nonkango dokonhi
^ Kwa tamba asi kuuyunga momaraka gapeke pasitetu.
