Vakolinte wokuhova 15:1-58
15 Vakwetu, tani mu diworokesa kuhamena mbudi zongwa ezi na mu udisira, ezi mwa tambura ntani muna kukwama.
2 Kupitira mombudi zongwa ezi na mu zuvhisira, yimo vana kumuparwira nsene mu kwaterera kwazo nye nsene kapisi ngoso, epuro lyeni tali kara lyomawoko-woko.
3 Yeeyi na mu tantera yininke yomulyo po eyi name na gwana asi Kristusa kwa fire yipo a tu zowore mononzo, ngamoomu ga tanta Matjangwa
4 asi kwa mu horekere, ano mezuva lyautatu tava mu pindura koufe ngamoomu ga tanta Matjangwa
5 ntani asi kwa monekerere Kefasa* makura ta monekere hena ava murongo navavali.
6 Konyima zeyi ta ya monekere vakwetu wokupitakana 500 posikando simwe tupu, sinzi sawo simpe poveli nampili ngomu vamwe va fa.*
7 Konyima zoyo ta ya monekere Jakopo ntani nye ga ya monekerere vapositoli navenye.
8 Moruhura ta ya monekere nge ame ogu na fana ngwendi mukeke ogu va hampuruka ago mazuva ga hana kusika mo.
9 Yeeyi nyame gekuto lyenunu po kovapositoli navenye ntani kapi na fira kutumbura nge asi mupositoli, morwa ngani hepeke mbungakriste zaKarunga.
10 Nye konkenda zaKarunga zonene na ya gwana situmbukira esi. Ntani nkenda zendi zonene kapi za kere zomawoko-woko kwange, yeeyi ame kwa rugana unene kupitakana vapositoli navenye, kapisi mononkondo danyamwange nye konkenda zaKarunga zonene ezi ga likida nge.
11 Yipo nye, yi kare asi nyame ndi yiwo vana kuzuvhisa, natuvenye kuzuvhisa mbudi zimwe tupu ntani one kwa pura mombudi ozo.
12 Nsene kuna kuzuvhisa asi Kristusa kwa mu pindura koufe, ngapi nye vamwe veni omu tanta asi vafe kapi ngava va vhumbura?
13 Nsene yosili asi vafe kapi ngava va vhumbura, naKristusa nage si kapi va mu pindura koufe.
14 Nye nsene asi Kristusa kapi va mu pindura koufe, ezuvhiso lyetu lyomawoko-woko ntani epuro lyeni nalyo lyomawoko-woko.
15 Ntani hena, nsene asi vafe kapi sili ava va pindura koufe, ntudi Karunga kapi ga pindura Kristusa koufe. Ano ose tatu kara nombangi doyimpempa, morwa ose kutanta asi Karunga kwa pindura Kristusa koufe.
16 Yeeyi nsene asi vafe kapi ava va pindura koufe naKristusa nage si kapi va mu pindura koufe.
17 Ano nsene asi Kristusa kapi va mu pindura koufe, epuro lyeni lyomawoko-woko, ha mwa karera simpe mononzo deni.
18 Ntani hena ava va fa* mwaKristusa, va zonaukilira po.
19 Nsene asi ose kwa huguvara mwaKristusa morwa eparu eli lyantaantani tupu, ngatu kara moukaro woudigu kupitakana navenye.
20 Nye ose twa yi diva asi Kristusa yige va hova* kupindura koufe mwanavenye ava va fa.*
21 Mokumona asi nomfa kwa wiza po morwa muntu gumwe, nevhumbuko nalyo kwa wiza po morwa muntu gumwe.
22 Moomu tupu navenye ava fu morwa Adamu, yimo hena navenye ngava kara nomwenyo morwa Kristusa.
23 Nye nkenye ogu ngava mu pindura koufe posiruwo sendi: Kristusa yige va hova* kupindura ntani nye ngaku kwama ava va hamena kwaKristusa, awo ngava va pindura koufe pekaropo* lyendi.
24 Moruhura, nga ka gava Uhompa kwaKarunga Guhwe. Eyi ngayi horoka konyima zapa nga zonagura po mapangero nagenye novapangeli.
25 Yeeyi age yige tupu kupangera ngahompa dogoro Karunga nga ture nonkore nadinye konhi zonompadi daKristusa.
26 Ano nkore zokuhulilira ngava zonagura po, nomfa.
27 Yeeyi Matjangwa kwa tanta asi Karunga “kwa tura yininke nayinye konhi zonompadi dendi.” Nye apa aga tanta asi ‘kwa tura yininke nayinye,’ kapi ayi tanta asi naKarunga nage kweli konhi zaKristusa, hawe, nye Karunga kwa tura yininke nayinye konhi zonompadi daKristusa.
28 Apa yininke nayinye ngava yi gava kwendi makura Muna nage nga ligava mwene kogu ga mu pa yininke nayinye, Karunga makura nga kare Mupangeli gwanayinye.
29 Nsene asi vafe kapi ngava va pindura koufe, ngapi nye kuhamena ava ava kuhwire monomfa? Nsene asi vafe kapi ngava va pindura, morwasinke nye ava gwanene ekuho olyo?
30 Morwasinke nye nose atu lizumbilire nyamwetu moyimpagwa nkenye siruwo?
31 Ame kuligwanekera nosimpagwa sonomfa nkenye ezuva morwa elikangango lyange mweni eli na kara nalyo mwaJesus Kristusa, Hompa gwetu.
32 Nsene asi ame kwa rwa noyikasama moEfeso ngamoomu va yi rugana vamwe, uwa musinke nye ngani gwanena mo? Nsene asi vafe kapi ngava va pindura koufe, “tu lyeni nokunwa, yeeyi mungura tatu fu.”
33 Va ha mu pukisa. Kulikwata ukwawo novantu wovadona, kuzonagura nkareso zongwa.
34 Kareni nonondunge mu rugane yoyiwa, yeeyi vamwe veni kapi va kara nediwo lyousili kuhamena Karunga. Ame eyi kuna kuyiuyungira yipo ni mu fise nomuga.
35 Nye gumwe kuvhura a pure asi: “Vafe ngapi omu ngava va pindura? Nomarutu musinke ngava va pindura?”
36 Egova ove! Mbuto ezi o kunu mevhu, kuhova kufa ntani zina kumena.
37 Kapi o kunu simeno esi sa kura nare nye ove kukuna mbuto, zi kare asi zorukokotwa ndi nkenye mbuto
38 nye Karunga kuzikulisa ngamoomu ana yi harere ntani nkenye mbuto za lisiga omu azi kuru.
39 Marutu kapi ga lifana, pwa kara marutu govantu naga gonongombe naga goyidira ntani naga gonomfi.
40 Ntani pwa kara marutu gemeguru naga gepevhu nye ufuuli womarutu gemeguru nou womarutu gepevhu kwa lisiga.
41 Site sezuva sa lisiga nesi sokwedi ntani site sombungururu zimwe naso sa lisiga nesi sonombungururu nonkwawo.
42 Nevhumbuko lyovafe nalyo ngorooro. Rutu oru aru fu kuzonauka nye rutu oru ava pindura koufe kapi ngaru zonauka.
43 Kukuna yokudira efumano, kukayivhumbura yefumano. Kukuna yokudira nonkondo, kukayivhumbura yononkondo.
44 Kukuna rutu ropanyama, kukaruvhumbura rutu ropampepo. Nsene asi pwa kara rutu ropanyama, pwa kara hena rutu ropampepo.
45 Eyi yiyo va tjangera asi: “Muntu gokuhova Adamu, kwa ya kere munamwenyo.” Nye Adamu gomoruhura, kwa ya kere muntu gopampepo ogu a gava mwenyo.
46 Eyi ya hovere kapisi rutu ropampepo nye rutu ropanyama. Rutu ropampepo kwa wizire po konyima.
47 Muntu gokuhova kwa tunda pevhu ntani kwa mu sita kombundu zevhu, ano muntu gwauvali kwa tunda meguru.
48 Ava va sita kombundu zevhu, kwa fana ngwendi ogu va sita kombundu zevhu; ava vemeguru, kwa fana ngwendi ogu ga tunda meguru.
49 Ngamoomu tupu twa fana ogu va sita kombundu zevhu, yimo hena ngatu ka fana ogu ga tunda meguru.
50 Vakwetu, tani mu tantere asi marutu gepevhu kapi taga vhuru kupinga Uhompa waKarunga ndi asi rutu rokuzonauka ru pinge rutu rokudira kuzonauka.
51 Tani mu tantere sihoramo saKarunga: Kapisi natuvenye ngatu fa,* nye natuvenye ngava tu situnukisa
52 usimbu-simbu kupitakana omu a kapwida muntu. Eyi ngayi horoka apa ngaru hagara rumbendo rokuhulilira. Apa ngaru hagara, vafe ngava va pindura nomarutu gokudira kuzonauka ntani ngava va situnukisa.
53 Oru rokuzonauka ngaru lisitunuke rokudira kuzonauka, ano oru rokufa ngaru lisitunuke rokudira kufa.
54 Nye apa rokuzonauka ngaru lisitunuka rokudira kuzonauka ntani apa oru rokufa ngaru lisitunuka rokudira kufa ntani nye ngayi sika mo eyi va tjanga asi: “Nomfa vana di mini po dogoro narunye.”
55 “Nomfa, efundo lyoge kupi? Nomfa, nonkondo doge kupi?”
56 Nonkondo donomfa nzo, ano nonkondo donzo, Veta.*
57 Nye Karunga va mu pandure kweyi ga tu pa efundo kupitira mwaHompa gwetu Jesus Kristusa.
58 Yipo nye vakwetu wokuhara, likorerereni, mwa ha linyunganga, litureni mo mosirugana saHompa, yeeyi mwa yi diva asi yirugana eyi omu ruganene Hompa, kapisi yomawoko-woko.
Nonkango dokonhi
^ Eli edina limwe hena lyomupositoli Peturusa.
^ MoRugereka asi “va rara.”
^ MoRugereka asi “va rara.”
^ MoRugereka asi “muzangu gokuhova.”
^ MoRugereka asi “va rara.”
^ MoRugereka asi “muzangu gokuhova.”
^ MoRugereka asi “ngatu rara.”
^ Ndi “Veta kupa nzo nonkondo.”
