Vakolinte wokuhova 16:1-24
16 Ano kuhamena yimaliwa eyi mwa pongaikira vapongoki, kuvhura mu kwame mavyukiso aga na geve konombungakriste domoGarata.
2 Mezuva lyokuhova lyankenye sivike, nkenye gumwe gweni a pungure ko yuma kuliza noukaro wendi yipo asi apa ngani ya sika, ayo vana yi pongaike nare.
3 Nye apa ngani ya sika oko, ngani ya tuma vagara ava mwa tjenge monombilive deni asi mwa va huguvara, ngava ya tware yigava eyi mwa geve nomutjima nagunye koJerusarema.
4 Nsene ngayi ya kara hepero asi name ngani ze, ngani ya za kumwe nawo.
5 Nye apa ngani ka pita zaMakedoniya ntani ngani ya mu pita yeeyi ame kuna hara kukapita zaMakedoniya,
6 ntani nampo ngani ya kara kumwe none karuwogona, ano nsene ngani ya kara none, ngani ya kara dogoro nga ku pite kufu yipo ngomu ya sindikire nge oku ngani za.
7 Yeeyi kapi nina hara kuyamupita tupu nye nina hara kuyakara none siruwo songandi nsene Jehova ana yi panga.
8 Nye tani kara simpe moomu moEfeso dogoro posipito soPentekoste,
9 yeeyi nina gwana mpito zongwa* yipo ni sikise mo sirugana sange nye varwanesi vanzi.
10 Nsene nga ya sika Timoteusa, ngomu ruganene kumwe nage yipo nga ya dire kukara nosinka yeeyi age kuna kurugana sirugana saJehova ngwendi nyame.
11 Yipo nye asi mwa ha mu sensa. Ngomu mu rekere mombili yipo nga wize kwange yeeyi ame kuna kumundindira kumwe novapuli vakwetu.
12 Kuhamena mukwetu Aporo, ame kwa mu korangedere a wize kweni novapuli vakwetu. Kapi na wiza ngesi nye nga wiza apa nga gwana mpito.
13 Vangarareni, koreni mepuro, kareni nouradi,* nkondopareni.
14 Nkenye eyi muna kurugana, omu yi rugane neharo.
15 Vakwetu, mwa yi diva asi vemembo lyaSitefanasi yiwo va hovere kukara varongwa moAkaya ntani awo kwa litulire mo unene mokukwafa vapongoki.
16 Twikireni kulimburukwa vantu vangoso ntani vakwetu navenye ava vana kurugana unene.
17 Ame nina hafa kweyi ga wiza Sitefanasi naForotunatusi naAkayikusi, awo kwa vaterere nge unene apa mwa dilire po.
18 Yeeyi awo kwa tendeka mutjima* gwange nogu gweni. Yipo nye, vagara vangoso mwa fira kuvafumadeka.
19 Mbungakriste zomoAsiya zina mu kundisire po. Akura naPilisikira ntani nombungakriste ezi azi pongere membo lyawo zina mu tumine makundo goSikriste.
20 Vapuli navenye vana mu kundisire po. Likunda-kundisireni po nencumito lyokupongoka.
21 Makundo aga nyamwange Paurusa nina ga tjanga nokuwoko kwange.
22 Nkenye ogu ga dira kuhara Hompa va mu finge. Hompa gwetu, wiza!
23 Ngano nkenda zonene zaHompa Jesus zi kare none.
24 Eharo lyange ngano likare none namuvenye mwaJesus Kristusa.
Nonkango dokonhi
^ MoRugereka asi “evero lyenene kuna lizegwilire nge.”
^ Ndi “kareni sigara.”
^ MoRugereka asi “mpepo.”
