Vakolinte wokuhova 2:1-16
2 Vakwetu, apa na wizire kweni, kapi na ya mu tetukisire nononkango ndi nounongo pokumuzuvhisira sihoramo saKarunga.
2 Yeeyi ame kwa demenene tupu kwaJesus Kristusa ogu va pamparere.
3 Ame kwa wizire kweni moupirankondo nowoma oku tani kankama,
4 apa ngani mu uyungisa noku mu ronga kapi ngani ruganesa nonkango dokutetura edi ava ruganesa vanongo nye nonkango dange kwa horwere nonkondo dompepo zokupongoka
5 yipo mu dire kupura mounongo wovantu nye mononkondo daKarunga.
6 Ose hena kuuyunga kuhamena unongo wava va kura mepuro, nye kapisi unongo wovantu womouzuni* ou ndi unongo wovapangeli wouzuni ou ava ngava zonauka po.
7 Ose kuuyunga kuhamena unongo waKarunga ou wa horama, ou ga tokwere komeho uzuni ou u kare po yipo ngava tu yererepekere po.
8 Awo kuna kara unongo ou va dilire kudiva vapangeli wouzuni* ou, yeeyi ngano va u divire, ngano kapi va dipagere* Hompa gouyerere.
9 Nye ngomu va yi tjanga asi: “Eyi lya dira kumona eho neyi kwa dira kuzuvha kutwi ndi eyi va dira kugazara rumwe vantu, yiyo ga wapaikira Karunga ava va mu hara.”
10 Nyose ga yi horwera Karunga kupitira mompepo zendi, yeeyi mpepo zokupongoka kuhorora yininke nayinye, azo hena kuhorora nampili magazaro gaKarunga gokonhiinhi.
11 Kweli gokuvhura kudiva magazaro gomuntu ndi? Hawe. Oyo yokudiva tupu mutjima gwendi gwelike. Mokulifana, kwato gokuvhura kudiva magazaro gaKarunga ntudi mpepo zaKarunga.
12 Ose kapi twa gwana mpepo zouzuni nye mpepo zaKarunga yipo tu dive yininke eyi ga tu pa Karunga.
13 Ose kuuyunga hena yininke eyi nye kapisi nononkango edi ava rongo vantu wovanongo nye nononkango edi za tu ronga mpepo zaKarunga tu faturure yininke eyi ya hamena kwaKarunga.
14 Nye muntu ogu a kwama madowo gopanyama, kapi a tambura* yininke yompepo zaKarunga morwa ayo kwendi ugova ntani kapi ta yi kwata egano, yeeyi ayo kuyikonakona nevatero lyompepo zokupongoka.
15 Nye muntu ogu azi pitisire mpepo zaKarunga, kukonakona nayinye ntani kwato ogu a mu pangura.
16 Yeeyi “yilye gokuvhura kudiva magazaro gaJehova asi a mu pukurure?” Nye ose kwa kara nomagazaro gaKristusa.
