Vakolinte wokuhova 3:1-23
3 Vakwetu, kapi na vhulire kuuyunga none ngwendi moomu ava uyungisa vantu ava azi pitisire mpepo nye ngovantu ava ava kwama madowo gopasintu, ngovanonagona mwaKristusa.
2 Ame kwa mu pere masini nye kapisi nondyaandya yeeyi kapi mwa peme. Ntani nampili ngesi kapi muna pama,
3 yeeyi one simpe kuna kukwama madowo gopasintu. Mokatji keni kuna kara mo simpe mfudu nonomutangu, one nani simpe kumupangera magazaro gopasintu ndi?
4 Apa omu tanta asi: “Ame kwa hamena kwaPaurusa,” ano gumwe asi “ame kwaAporo,” ngoso kapi muna kara ngwendi vantu womouzuni ou?
5 Aporo yisinke nye? Ano a kare Paurusa yisinke nye? Awo vakareli tupu ava va mu vatera mu kare vapuli, ngamoomu ga yi va pa Hompa.
6 Ame kwa tapeka, Aporo kwa tekera nye Karunga yige a yi kulisa,
7 yipo va fumadeke Karunga ogu a yi kulisa nye kapisi ogu a tapeke ndi a tekere.
8 Ogu a tapeke nogu a tekere, navenye vamwe tupu,* nye nkenye ogu nga ka gwana mfeto zendi kuliza noyirugana yendi.
9 Yeeyi natuvenye varugani kumwe naKarunga. One epya eli a limi Karunga, etungo eli a tungu Karunga.
10 Kuliza nonkenda zonene ezi ga likida nge Karunga, ame kwa tunga etateko ngwendi mutungi gomunene* nye muntu gwapeke yige ana kutungira po. Nye nkenye gumwe ga hepa kutakamesa omu ana kutungira po.
11 Yeeyi kwato ogu na vhura kutungira po etateko lyapeke lya hana asi lyeeli va tungira po, kutanta asi Jesus Kristusa.
12 Nsene asi gumwe a tungira petateko olyo ngorodo ndi sisiliveli ndi tumanya tondiro ndi yitji ndi wayi ndi rwenge,
13 apa ngasi wiza siruwo seheteko, yirugana yankenye ogu ngayi lihorora,* yeeyi mundiro ngagu horora nayinye noku likida asi yirugana musinke ga rugana nkenye muntu.
14 Yirugana yogu ngayi kara po, nga gwana mfeto;
15 ano yirugana yogu ngayi pya, nga zumbanesa yoyinzi nye age mwene nga paruka, ngayi kara ngwendi gogu vana parura momundiro.
16 Kapi mwa yi diva asi one ntembeli zaKarunga ntani asi mpepo zaKarunga kwa kara mweni?
17 Nkenye ogu a zonagura ntembeli zaKarunga, Karunga nga mu zonagura po yeeyi ntembeli zaKarunga kwa pongoka ano one nyone ntembeli ozo.
18 Pwa ha kara ogu ana kulikumbagera mwene. Nkenye ogu a gazara asi age munandunge mouzuni* ou, a kare mugova yipo a kare munandunge.
19 Yeeyi unongo wouzuni ou ugova kwaKarunga, yeeyi kwa tjanga asi: “Karunga kuninka munandunge a fe mosiraha samwene.”
20 Ntani hena asi: “Jehova ga diva asi magazaro govanandunge kutupu sikwafo.”
21 Yipo nye asi mwa ha likangangera eyi ava rugana vantu, yeeyi Karunga kwa gava yininke nayinye yi kare yeni,
22 yi kare asi Paurusa ndi Aporo ndi Kefasa* ndi uzuni ndi eparu ndi nomfa ndi yininke eyi yina kara po ndi eyi ngayi wiza, yininke nayinye kwa hamena kweni,
23 ano one kwa hamena kwaKristusa, ano Kristusa kwa hamena kwaKarunga.
Nonkango dokonhi
^ Ndi “sitambo sawo simwe tupu.”
^ Ndi “mugendesi gosirugana gonondunge.”
^ MoRugereka asi “kara poruzera.”
^ Eli edina limwe hena lyomupositoli Peturusa.
