Vakolinte wokuhova 4:1-21
4 Tuna hara vantu va tu tare asi ose vakareli* vaKristusa ntani marenga aga va pa yihoramo yaKarunga.
2 Ntani hena, marenga kugandindira asi ngano ga limburukwe.
3 Kwange ko ame kapisi mulyo yokupangura nge one ndi va pangure nge mompanguro. Nayene kapi ani lipangura nyamwange.
4 Yeeyi kwato yoyidona na diva eyi na rugana. Nye eyi kapi yina kutanta asi ame muhungami, Jehova yige a pangura nge.
5 Yipo nye, mwa ha pangura nkenye muntu komeho siruwo si sike mo nye ndindireni dogoro apa nga wiza Hompa, age nga horora nayinye eyi ya horama momundema neyi ya kara monomutjima dovantu. Makura Karunga nga pandadeke nkenye ogu koyirugana yendi.
6 Vakwetu, yininke eyi nina uyunga kuna yi hamesere kwange naAporo morwa uwa wanyamweni yipo mu lirongere ko kwetu eyi asi: “Walye omu pitakanesa pweyi va tjanga moMatjangwa,” yipo mu dire kulinenepeka mu fumadeke po vamwe kupitakana wopeke.
7 Yisinke ayi kuninkisa o pitakane wopeke? Yisinke wa kara nayo eyi va dira kukupa? Nsene nye asi kwa yi ku pa, morwasinke o likangangere ngwendi asi kwa yi gwana mononkondo danyamoge?
8 Muna kara nare nanayinye eyi mwa hepa ndi? Nare muna ngawopa ndi? Nare muna tameke kupangera ngovahompa pwa hana ose ndi? Ani ngano muna tameke kupangeree, nose ngano tatu ya pangere none!
9 Ayo kumoneka asi Karunga kwa tu reta ose vapositoli mosira ngwendi moomu ava reta mbunga zokuhulilira va ya zi dipage. Yeeyi uzuni naunye novaengeli novantu, kutunomena.
10 Ose kututara asi vagova morwa Kristusa, nye one vanandunge morwa Kristusa, ose kwato nonkondo nye one nonkondo, one kumufumadeka nye ose kutuswaura.
11 Dogoro ngesi, ose kwa kara nonzara nenota nonkagi,* kututoona* ntani kapi twa kara nomambo,
12 ose kurugana unene nomawoko getu. Apa ava tu swaura, ose kuvauyungisa momuwa, apa ava tu hepeke, ose kulididimikira;
13 apa ava tu uyunga momudona, ose kuvauyungisa mombili,* mouzuni ou, ose kututara ngwendi yihando ntani ndova zovantu navenye nanaina eli.
14 Kapi nina kumutjangera yininke eyi asi ni mu fise nomuga nye yipo ni mu pukurure ngovana vange ava na hara.
15 Yeeyi nampili mu kare novarongi 10 000 ava ava mu rongo omu nomu kwama Kristusa nye kapi mwa kara novaguhya wovanzi. Yeeyi pokukara mouumwe naJesus Kristusa, ame kwa ya kara guhyeni pokumuronga mbudi zongwa.
16 Yipo nye nina kumukorangeda asi mu honene nge.
17 Eyi yiyo nina kumutuminina Timoteusa morwa age munange gokuhara ntani gomulimburukwi mwaHompa. Age nga ya mu diworokesa nonkedi edi ani ruganesa mokuruganena Jesus Kristusa ngwendi moomu tupu ani rongo nkenye oku mwankenye mbungakriste.
18 Vamwe veni kugazara asi kapi nina kuwiza kweni makura yiyo nye ava linenepeke.
19 Jehova nsene ana yi panga, ntaantani ngani wize. Nina hara kuyamona owo valinenepeki, nye kapisi nositambo sokuyadiva nonkango dawo, nye sokuyadiva nsene va kara nononkondo daKarunga ndi hawe.
20 Eyi ayi likida asi ose kulimburukwa koUhompa waKarunga, kapisi nonkango detu nye yirugana yetu ntani ayo kulikida asi ose twa kara nononkondo daKarunga.
21 Yipi muna hara po? Yokuwiza ame kweni nongora ndi neharo nombili?
Nonkango dokonhi
^ Ndi “varugani.”
^ MoRugereka asi “muhere-here.”
^ Ndi “kututoona nononyongo.”
^ MoRugereka asi “kuvalikwambera.”
