Vakolinte wokuhova 5:1-13
5 Ame kuna kuzuvha asi pweli mugara mokatji keni ogu a rara nozina wositumbwena. Ruhonda* rokufana ngoso runa didi kupitakana eyi adi rugana nomuhoko dapeke.
2 One ngoso kuyihafera ndi? Nani ngano kapisi kuna guwu, yipo mugara ogu ga rugana yirugana yangoso va mu guse mo mokatji keni?
3 Nampili ngomu nina dili kukara po, ame none nina kara mompepo ntani nina pangura nare mugara ogu ga rugana yininke oyo ngwendi asi kumwe none nina kara.
4 Apa omu pongo kumwe medina lyaHompa gwetu Jesus, diveni asi ame none nina kara mompepo kumwe nononkondo daHompa gwetu Jesus,
5 gaveni mugara ogo kwaSatana mokuzonagura po yirugana yendi yononzo yipo mbungakriste ngazi kare zina kuhuka kosipara saKarunga mezuva lyaHompa.
6 Elikangango lyeni kapi lina wapa. Kapi mwa yi diva asi yihahesogona kuhahesa yiduva nayinye?
7 Zugumeni yiduva eyi ya kara noyihaheso yipo mu kare yiduva yoyipe yokudira yihaheso. Yeeyi Kristusa nzwigona zetu zoPaska va zi zamba.
8 Yipo nye, sipito esi ngasi kwama ko, kapisi ngatu ruganeseni yiduva yoyikurukuru eyi ya kara noyihaheso ndi yihaheso yononzo noudona. Nye ngatu ruganeseni mboroto zokudira yihaheso, ezi za fanekesa uwa nousili.
9 Mombilive zange, ame kwa mu tjangerere asi mu hageke kulikwatakana* novantu woruhonda,*
10 kapi nina tamba asi vantu woruhonda* womouzuni ou ndi vantu vedowo ndi vakorokotji ndi vakareli woyikarunga. Ngano asi yimo ngoso, ntudi ngano mwa hepa kutundilira mo mouzuni.
11 Nye ame kuna kumutjangera asi nsene mupuli mukweni kuhondera* ndi mudovaukili ndi mukareli goyikarunga ndi muswauli ndi nkorwe ndi muwidi, hagekeni kulikwatakana nage,* nampili kulya noku lya si nage.
12 Ame kapisi nyame gokupangura womouzuni. One kupangura womombungakriste tupu
13 ano Karunga yige nga pangura womouzuni. “Guseni mo muntu gomudona mokatji keni.”
