Vakolinte wokuhova 6:1-20
6 Apa omu dili kulizuvha novakweni, morwasinke omu zire kompanguro mu ka gave maudigu geni kovantu ava ava dili kukwama nompango daKarunga, mwa hana kuza kovapongoki?
2 Ndi kapi mwa diva asi vapongoki yiwo ngava pangura uzuni? Nsene asi nyone ngomu pangura uzuni, eyi yoyinunu yiyo nye nayi mu vhura kupangura ndi?
3 Kapi mwa yi diva asi nyose ngatu pangura vaengeli ndi? Eyi yinka yankenye ezuva yiyo nye nayi tu vhura?
4 Nsene asi one kuvhura kupangura yinka yankenye ezuva, morwasinke nye omu ninkire ava za dira kuhuguvara mbungakriste va mu pangwire po?
5 Ame kuna kuyiuyungira eyi ni mu fise nomuga. Mokatji keni nani mutupu mugara gonondunge gokuvhura kupangura maudigu govapuli vakwawo?
6 Nye vapuli kutwara vapuli vakwawo kompanguro yipo ava va dira kupura va ka pangure udigu wawo.
7 Apa omu twara vapuli vakweni kompanguro, one kulifisa nyamweni nomuga. Yisinke omu dilire kusiga va mu rugane momudona? Yisinke omu dilire kusiga va mu hakane yininke yeni?
8 Nye one yiyo omu rugana udona oku tomu hakana vapuli vakweni.
9 Ndi kapi mwa diva asi ava va dira kuhungama kapi ngava pinga Uhompa waKarunga? Va ha mu pukisa.* Ava ava hondere,* novakareli woyikarunga, novagara wokukwara ava ava hondere, novagara ava ava pulisire va va rare, novagara ava ava rara vagara vakwawo,
10 novawidi novadovaukili nononkorwe novaswauli ntani vakorokotji, kapi ngava pinga Uhompa waKarunga.
11 One vamwe yimo mwa kere ngoso. Nye va mu kuhwa mu zere, yiyo va mu lipongwera noku mu hungameka medina lyaHompa gwetu Jesus Kristusa nompempo zaKarunga gwetu.
12 Yininke nayinye va yi pulisira nge nye kapisi nayinye yiwa. Yininke nayinye va yi pulisira nge nye kapi ngani pulisira nkenye eyi yi pangere nge.
13 Nondya kwa karera po ezimo, ano ezimo kwa karera po nondya, nye Karunga nga yi zonagura po nayinye oyo. Rutu kapi rwa karera po ruhonda* nye kwa karera po Hompa, ano Hompa kwa karera po rutu.
14 Nye Karunga kwa pindura Hompa ntani nose nga tu pindura mo monomfa kupitira mononkondo dendi.
15 Kapi mwa yi diva asi marutu geni maruha gaKristusa? Ngoso ni guse nye maruha gaKristusa ni ga gave kohondedi ndi? Nokanunu si!
16 Kapi mwa yi diva asi nkenye ogu a hondere nohondedi kukara rutu rumwe tupu nage ndi? Yeeyi Karunga kwa tanta asi: “Mouvali wawo tava kara rutu rumwe tupu.”
17 Nye nkenye ogu ana kulikwatakana naHompa, ta kara nage mompepo.
18 Tjwayukeni ruhonda!* Nkenye nzo ezi a zono muntu kwa linapa norutu rwendi nye nkenye ogu a hondere, kuzonena rutu rwendi.
19 Ngoso kapi mwa yi diva asi rutu rweni ntembeli omu za kara mpepo zokupongoka, ezi mwa gwana kwaKarunga ndi? Ntani hena, one kapi mwa liweka nyamweni,
20 yeeyi kwa mu randa ndiro. Yipo nye, ruganeseni marutu geni mokuyererepeka Karunga.
Nonkango dokonhi
^ Ndi “kumbagera.”
