Vakolinte wokuhova 7:1-40
7 Kuhamena yininke eyi mwa tjangera nge, tani mu limburura asi hansa komugara mokudira kukundama* mukadi
2 nye morwa kuvhuka koruhonda,* nkenye mugara a kare namukadendi ano mukadi nage a kare namugara gwendi.
3 Nkenye mugara a pe mukadendi eyi ya mu tumbukira* ano mukadi nage a pe mugara gwendi eyi ya mu tumbukira.
4 Mukadi kapi ga kara nononkondo dokupangera rutu rwendi nye mugara gwendi yige gokuvhura kurupangera, mokulifana, mugara kapi ga kara nononkondo dokupangera rutu rwendi nye mukadendi yige gokuvhura kurupangera.
5 Walye omu linyoka-nyoka ntudi kuna yi lizuvhu nye nsene kuna kuyiruganena morwa muna hara kuruganesa siruwo oso mokukanderera, yi kare tupu pokaruwogona. Konyima zeyi, kareni hena kumwe yipo Satana a dire kumuheteka morwa kudira kuvhura kulipangera kweni.
6 Eyi nina tanta kuvhura mu yi rugane nye kapisi veta.
7 Ame kwa hara asi ngano vantu navenye va kare vadike ngwendi nyame. Nye nkenye ogu kwa kara nouhwi wendi ou ga mu pa Karunga, gumwe monkedi ezi ano mukwawo monkedi zapeke.
8 Tani tantere ava va dira kukwara novafisavaya vawo asi hansa va kare ngorooro vadike ngwendi nyame.
9 Nye nsene kapi vana kuvhura kulipangera, va kware tupu yeeyi hansa kukwara kupitakana kuhepa komadowo gokuligwanekera panyama.
10 Kwava va kwara tani va tantere asi kapisi nyame nye Hompa, asi mukadi kapisi a ligaunuke namugara gwendi.
11 Nye nsene a ligaunuka namugara gwendi, ga ha ka kwara ndi ntudi a tengure kwamugara gwendi ano mugara nage ga ha ligaunuka namukadendi.
12 Nye kwavamwe tani tanta asi, nyame, nye kapisi Hompa, asi nsene pweli mupuli ogu ga kwara mukadi ogu ga dira kupura mwaHompa gwetu nye age ga mu hara, ga ha mu siga,
13 ano nsene pweli mukadi ogu ga kwara mugara ogu ga dira kupura mwaHompa gwetu nye age ga mu hara, ga ha mu siga.
14 Yeeyi nonkwara domugara ogu ga dira kupura, kwa pongokera mwamukadendi ano nonkwara domukadi ogu ga dira kupura, kwa pongokera mwamugara gwendi, nsene asi kapisi ngoso, ngano vana vawo kwa nyata kosipara saKarunga nye awo opo kwa pongoka.
15 Nye nsene mulikwali ogu ga dira kupura a tokora asi va lisige,* moukaro wangoso, a mu sige a ze, kapi ga hepa kumusininika va tunge kumwe yeeyi Karunga kwa mu zigidira mbili.
16 Ove mukadi omu wa yi diva asi ngo parura mugara goge? Ndi ove mugara omu wa yi diva asi ngo parura mukadoge?
17 Nye ayo ya wapa asi nkenye ogu a paruke kuliza neyi ga mu pa Jehova ntani a kare moukaro ou ga kere komeho Karunga a mu zigide a ya kare mupuli. Ame kuna kugava mpangera ezi konombungakriste nadinye.
18 Kweli mugara ogu va zigida age va mu rugana yovamba ndi? A kare moomo moukaro owo. Kweli ogu va zigida age kapi va mu rugana yovamba ndi? Ga ha ninka asi va mu rugane yovamba.
19 Kukurugana yovamba kwato mulyo ano va dire kukurugana yovamba nayo kwato mulyo, yomulyo po yokulimburukwa nompangera daKarunga.
20 Yi kare asi moukaro musinke mwa kere apa va mu zigidire, kareni moomo.
21 Mupika wa kere apa va kuzigidire ndi? Wa ha yi lipakera sinka nye nsene o gwana mpito zokumanguruka, zi ruganesa.
22 Yeeyi nkenye ogu va zigida mwaHompa age opo mupika, kwa manguruka ntani kwa hamena kwaHompa; ano ogu va zigida age opo ga manguruka, kwa ya kara mupika gwaKristusa.
23 One kwa mu randa ndiro, hagekeni kukara vapika wovantu.
24 Vakwetu, yi kare asi moukaro musinke mwa kere apa va mu zigida, kareni moomo kosipara saKarunga.
25 Kuhamena ava va dira kukwara, kapi nina kara nompangera zokutunda kwaHompa, nye tani gava egano lyange, yeeyi Hompa kwa fira nge nkenda ntani kuvhura mu huguvare eyi nina kumutantera.
26 Morwa ose kuna kara moyiruwo yoyidigu, ame kuna kugazara asi hansa muntu a twikire kukara moomu ga kara.
27 Nsene wa kwara, wa ha gazara kusiga mukadoge ano nsene kapi wa kara nomukadi, wa ha papara mukadi o kware.
28 Nye nsene o kwara kapi ono kuzona. Ano mukadi ogu ga dira kukwara, nsene a kwara kapi ana kuzona. Nye ava vana kukwara ngava ligwanekera nomaudigu gomanzi. Nye ame kuna hara kumupopera.
29 Ntani hena, vakwetu ame kuna kuyiuyungira eyi morwa siruwo sina hupu ko sisupi. Kutunda apa, ava va kara novakadi va kare ngwendi kapi va va paka,
30 ano ava vana kulira ngwendi vava vana kudira kulira, ava vana hafa ngwendi vava vana dili kuhafa ntani ava vana kuranda ngwendi vava va dira kuweka,
31 ano ava ava gwanene mo uwa mouzuni ou ngwendi vava ava dili kugwanena mo yoyinzi, yeeyi yihorokwa yomouzuni ou kuna kurunduruka.
32 Ame kuna hara mu dire kukara nosinka. Mugara gomudike kwa kara nosinka sokuruganena Hompa morwa ana hara kuhafesa Hompa.
33 Nye mugara ogu ga kwara, kwa kara nosinka seyi yeparu mouzuni ou morwa ana hara kuhafesa mukadendi,
34 ano age kwa kara pavali. Ntani hena mukadi gomudike ndi mukadona* kwa kara nosinka seyi yaHompa asi ngapi na vhura kupongoka parutu nopomagazaro. Nye mukadi ogu ga kwara, kwa kara nosinka seyi yeparu mouzuni ou morwa ana hara kuhafesa mugara gwendi.
35 Ame kuna kuyiuyungira eyi morwa uwa wanyamweni, kapisi asi ni mu silike* nye yipo ni mu tumangede mu rugane youhunga ntani yipo mu karere Hompa nomutjima nagunye nkenye ezuva pwa hana madonganeso.
36 Nsene gumwe kapi ana kuvhura kulididimikira ngorooro ga hana kukwara nye age ana piti posiruwo somadowo gosiudinkantu, hansa a kware, kapi ana kuzona.
37 Ano nsene gumwe a tokora momutjima gwendi asi kapi nga kwara ntani a kwaterere ketokoro lyendi morwa kapi ana kulizuvha asi a kware ntani kuvhura kupangera madowo gendi, alyo tali kara etokoro lyewa.
38 Yipo nye asi ogu a kwara kutura po etokoro lyewa nye ogu a dili kukwara etokoro lyendi lya pitakana lyogu a kwara.
39 Mukadi kwa mu kwatakana veta namugara gwendi nsene asi mugara gwendi simpe muzuni. Nye nsene mugara gwendi a fa,* age ta manguruka mokukakwara nkenye ogu ana hara nye ga hepa tupu kukwara mwaHompa.
40 Nye ame omu nina kugazara, hansa nsene a dira kukwara hena ntani ame na yi diva asi ame kwa kara nompepo zaKarunga.
Nonkango dokonhi
^ Kwa tamba asi kuligwanekera panyama.
^ Eyi kwa tamba keligwanekero panyama mononkwara.
^ Ndi “ligaunuke.”
^ Nkango ezi va ruganesa moRugereka kwa tamba komukadona ogu ga dira kuligwanekera rumwe panyama nomugara.
^ MoRugereka asi “ni mu mange.”
^ MoRugereka asi “a rara.”
