Mbilive zokuhova koVatesaronika 1:1-10
1 Nyame Paurusa naSilivanusa* ntani naTimoteusa tuna kutuma mbilive ezi kombungakriste zomoTesaronika, ezi za kara mouumwe naKarunga Guhya ntani naHompa Jesus Kristusa:
Ngano nkenda zaKarunga zonene nombili zi kare none.
2 Ose nkenye apa kupandura Karunga apa atu mu tumbura momakanderero getu
3 ntani ose nkenye apa kudiworoka kosipara saKarunga yirugana eyi mwa rugana morwa mwa kara neharo nepuro ntani nomu mwa lididimikira maudigu morwa mwa huguvara mwaHompa gwetu, Jesus Kristusa.
4 Vakwetu, ose twa yi diva asi Karunga kwa mu hara yiyo ga mu horowora,
5 yeeyi one kwa zuvha mbudi zongwa kapisi panonkango tupu nye nevatero lyompepo zokupongoka. Ose kwa yi pulire nawa-nawa asi eyi twa mu zuvhisilire usili, none mwa yi diva asi ose vantu musinke twa kere mokatji keni.
6 One kwa tu honenene ntani kwa honena hena Hompa pokutambura nonkango daKarunga noruhafo oru aru tundu mompepo zokupongoka nampili ngomu mwa ligwanekerere nomaudigu gomanene,
7 yiyo mwa kara sihonena kovapuli navenye womoMakedoniya nava womoAkaya.
8 Nonkango daJehova kapisi womoMakedoniya nava womoAkaya velike tupu va di zuvha, nye nakunye vantu kwa zuvha kuhamena epuro lyeni mwaKarunga, kapi twa hepa hena kuuyunga yuma.
9 Yeeyi awo kututantera omu twa gwanekerere none sikando sokuhova ntani nomu mwa siga yikarunga yoyimpempa, mu karere Karunga gosili gomunamwenyo,
10 mu ndindire Munendi ogu nga tunda meguru, ogu va pindura koufe. Age kuna kara Jesus ogu nga tu zowora kehandu lyaKarunga eli lina kuwiza.
Nonkango dokonhi
^ Ogu ava tumbura hena asi Sirasa.
