Mbilive zokuhova koVatesaronika 3:1-13
3 Apa twa dilire kuvhura kuyilididimikira, yipo twa tokwere kukara moAtena,
2 makura yipo twa tumine Timoteusa mukwetu ntani mukareli gwaKarunga* ogu a zuvhisa mbudi zongwa kuhamena Kristusa a ya mu nkondopeke nokumuhengagwida yipo epuro lyeni li ya pame,
3 ntani yipo maudigu ga dire kumugusa nonkondo. Yeeyi none nyamweni mwa yi diva asi maudigu gangoso kapi tatu vhuru kugahenduka.*
4 Yeeyi apa twa kere none ngatu mu tantere komeho zosiruwo asi ngatu pita momaudigu, ano oyo yiyo ya horoka ngwendi moomu mwa yi diva.
5 Apa na dilire kuvhura kuyilididimikira, yipo na tumine Timoteusa kweni, yipo ngani ya zuvhe kuhamena ulimburukwi weni, kuninkira asi nampo Muheteki ga mu heteka makura yirugana yetu ngayi kare yomawoko-woko.
6 Timoteusa ntani tupu ka tundire kweni, age ka ya tu tanterere mbudi zongwa kuhamena ulimburukwi neharo lyeni. Age ka ya tu tanterere asi one nkenye apa kuhafa apa omu tu diworoka ntani asi muna hara kutumona ngwendi moomu nose tuna hara kumumona.
7 Vakwetu, yipo nye, apa twa zuvhire kumuhamena noulimburukwi weni, ayo kwa tu hengagwidire moruguwo nomomaudigu getu nagenye.
8 Ano ngesi tuna pama* morwa twa zuvha asi one muna koro mwaHompa.
9 Ose kupandura Karunga mwarweni morwa one kutuhafesa unene.
10 Ose kukanderera unene, masiku nomutenya, asi tu mu mone* ntani yipo tu mu vatere neyi muna hepa, yipo mu nkondopeke epuro lyeni.
11 Karunga Guhyetu ntani Hompa gwetu Jesus ngano va tu vatere yipo tu wize kweni.
12 Ntani hena, Hompa ngano a mu vatere yipo eharo lyeni lyokulihara-hara neli lyokuhara navenye li kure nokuligwederera ngwendi moomu twa mu hara,
13 yipo nomutjima deni di pame, mu dire usima ntani mu pongoke kosipara saKarunga Guhyetu, pekaropo* lyaHompa gwetu Jesus kumwe novapongoki vendi navenye.
Nonkango dokonhi
^ Ndi nampo asi “murugani kumwe naKarunga.”
^ Ndi “nyose tupu kupita mo.”
^ MoRugereka asi “tuna kara nomwenyo.”
^ MoRugereka asi “tu mone yipara yeni.”
