Mbilive zokuhova koVatesaronika 4:1-18
4 Mokuhulisa vakwetu, moomu tupu twa mu pa mavyukiso asi ngapi omu nomu hafesa Karunga, tatu mu likwambere nokumuhundira medina lyaHompa Jesus asi, twikireni kuyirugana momunene ngwendi moomu tupu muna kuyirugana.
2 Yeeyi one mwa diva mavyukiso* aga twa mu pere kupitira mwaHompa Jesus.
3 Karunga kwa hara asi mu pongoke ntani mu lipore ko koruhonda.*
4 Namuvenye mwa hepa kudiva omu nomu pangera marutu* geni yipo ga pongoke nokugwana efumano.
5 Mwa ha kara ngwendi vantu ava va dira kudiva Karunga, ava ava dili kupangera edowo lyawo lyokuligwanekera panyama.
6 Pwa ha kara ogu ana kurugana yininke yoyidona a korese mupuli mukwawo* monkedi zangesi, morwa Jehova kutengeka ava ava rugana yininke eyi. Ose nare twa yi mu tantera nokumurondora kuhamena yininke eyi.
7 Yeeyi Karunga kwa tu zigidira upongoki nye kapisi eparu lyokunyata.
8 Yipo nye, nkenye ogu a nyoka marondoro aga, kapisi muntu a nyoka, nye Karunga ogu a mu pe mpepo zendi zokupongoka.
9 Ano yokuhamena eharo lyosiumbya, kapi twa hepa kuyimutjangera, yeeyi Karunga mwene ga mu ronga mu lihara-hare.
10 Ntani one yiyo muna kurugana kovapuli vakweni navenye womoMakedoniya. Nye tatu mu korangeda vakwetu asi mu twikire kuyirugana momunene.
11 Kareni vantu wokulitura ntani kapisi mu liture moyininke yovantu, ntani ruganeni nomawoko geni ngwendi moomu twa mu tantera,
12 yipo mu kare moukaro wouwa mokatji kovantu ava va dira kupura, ngomu dire kuhepa yuma.
13 Vakwetu, tuna hara mu dive kuhamena ava va fa* yipo mu dire kuguva ngwendi moomu ava guwu ava va dira kukara nehuguvaro.
14 Yeeyi nsene asi ose twa pura asi Jesus kwa fire yiyo va mu pindura, kuvhura tu yi pure asi Karunga nga ka pindura ava va fa mouumwe naJesus va ka kare nage.
15 Yeeyi eyi tuna kumutantera kuna kutunda kwaJehova asi ose ava ngatu paruka pekaropo* lyaHompa ngatu za meguru. Nye ava va hova kufa, yiwo ngava hova kupindura ntani nye ngatu kwama ko nose
16 morwa Hompa nga humburuka a tunde meguru oku ta zigire unene ngomuengeli gomunene age ana kwaterere rumbendo rwaKarunga, ano ava va fa mouumwe naKristusa yiwo ngava hova kupindura.
17 Konyima zoyo, ose ava ngatu paruka posiruwo oso, ngatu ka lipakerera nawo, ngatu ze momaremo tu ka gwanekere naHompa makura ngatu ka kare nkenye apa nage.
18 Yipo nye, twikireni kulihengagwida nononkango edi.
Nonkango dokonhi
^ Ndi “nompangera.”
^ MoRugereka asi “yipako.”
^ MoRugereka asi “mumbyendi ndi mukurwendi.”
^ MoRugereka asi “vana rara.”
