Mbilive zokuhova koVatesaronika 5:1-28
5 Vakwetu, kapi twa hepa kumutjangera kuhamena siruwo esi ngayi horoka yininke eyi.
2 Yeeyi none nyamweni mwa yi diva nawa-nawa asi ezuva lyaJehova ngali wiza ngwendi moomu a wiza muwidi masiku.
3 Apa ngava tanta asi: “Mbili nompora!” yipo ngali va gwanena ezonauko poopo ngwendi moomu tupu kukora aku gwana mukadi ogu ana hara kuhampuruka, kapi ngava vhura kuhenduka.
4 Nye vakwetu one kapi mwa kara momundema asi ezuva olyo ngali mu kondekede ngwendi muwidi,
5 yeeyi one vana wouzera ntani vana womutenya. Kapi twa hamena komasiku ndi komundema.
6 Yipo nye, twa ha rareni ngwendi vamwe, nye tu vangarareni nokukara nonondunge.
7 Yeeyi ava ava rara, masiku ava rara ano ava ava korwa, masiku ava korwa.
8 Nye ose ava twa hamena komutenya, tu kareni nonondunge, tu dwareni sikoverero sosivera, esi sa fanekesa epuro neharo ntani tu dwareni ekoli eli lya fanekesa ehuguvaro lyezoworo.
9 Yeeyi Karunga kapi ga tu horowera asi nga tu zonagure, nye kwa tu horowera nga tu zowore kupitira mwaHompa gwetu, Jesus Kristusa.
10 Age kwa tu fira yipo tu kare nage yi kare asi nomwenyo tuna kara ndi tu fe.*
11 Yipo nye, twikireni kulikorangeda-korangeda* noku linkondopeka-nkondopeka ngwendi moomu muna kuyirugana.
12 Vakwetu, tatu mu hundire mu fumadeke ava ava rugana unene mokatji keni oku tava mu pitisire mwaHompa ntani nokumupukurura.
13 Va likideni eharo lyenene noku va fumadeka morwa yirugana yawo. Namuvenye kareni nombili.
14 Vakwetu, tatu mu korangeda asi mu rondore* ava ava dili kulimburukwa, nokuhengagwida ava vana guwu nokuvatera ava vana dili nonkondo ntani lididimikireni navenye.
15 Takameseni asi pwa ha kara ogu ana kutengwida mukwawo kuwoko nye kondjereni kuliruganena uwa ntani nokuruganena uwa wopeke.
16 Omu hafe nkenye apa.
17 Omu kanderere nkenye apa.
18 Omu pandure kwanayinye. Eyi yiyo ga mu harera Karunga mwaJesus Kristusa.
19 Mwa ha kondera yirugana* yompepo zaKarunga mweni.
20 Walye omu sense mauporofete.
21 Konakoneni nayinye, makura mu kwaterere kweyi yoyiwa po.
22 Nyokeni yininke nayinye yoyidona.
23 Ngano Karunga ogu a gava mbili, a mu pongwere mosirugana sendi. Vakwetu, mpepo zeni neparu* lyeni ntani nomarutu geni ngano ga kuhuke mwankenye ukaro ntani ngano ga dire usima dogoro pekaropo* lyaHompa gwetu Jesus Kristusa.
24 Karunga ogu ga mu zigida nga yi sikisa mo oyo morwa age kumuhuguvara tupu.
25 Vakwetu, twikireni kutukanderera po.
26 Kundisireni po vakwetu navenye nencumito lyokupongoka.
27 Tani mu likwambere medina lyaHompa asi mu resere mbilive ezi vapuli vakwetu navenye.
28 Ngano nkenda zonene zaHompa gwetu Jesus Kristusa zi kare none.
Nonkango dokonhi
^ MoRugereka asi “tuna rara.”
^ Ndi “kulihengagwida-hengagwida.”
^ Ndi “mu pukurure.”
^ MoRugereka asi “mwa ha dimisa mundiro gompepo.”
