Mbilive zauvali zaPeturusa 1:1-21
1 Mbilive ezi kuna kutunda kwaSimoni Peturusa, mukareli nomupositoli gwaJesus Kristusa, zi ze kweni one mwa gwana marongo gousili gomulyo aga nose twa gwana, ose kwa ga gwana morwa Karunga naJesus Kristusa Muzowoli gwetu kwa hungama:
2 Ngano nkenda zaKarunga zonene nombili zi mu vhukire kupitira mediwo lyousili kuhamena Karunga naJesus, Hompa gwetu.
3 Ose kwa gwana nayinye eyi twa hepa yipo tu karere Karunga kupitira mononkondo dendi. Ose kwa kara nediwo lyousili kumuhamena. Age kwa tu zigida morwa munene ntani nkenda.
4 Kupitira moyininke eyi, Karunga kwa tu pa matumbwidiro gomawa ntani gomulyo, yipo none ngomu gwane ko kouyerere waKarunga, age kwa tu pa yininke eyi, morwa twa nyokera po eparu lyedona lyouzuni ou eli ali tundu momadowo gomadona.
5 Eyi yiyo nomu kondjera unene, mu gwederere kepuro lyeni uwa, kouwa weni gwederereni ko ediwo,
6 kediwo lyeni gwederereni ko elipangero, kelipangero lyeni gwederereni ko edidimiko, kedidimiko lyeni gwederereni ko etjirokarunga,
7 ketjirokarunga lyeni gwederereni ko eharo lyosiumbya, ano keharo lyeni lyosiumbya gwederereni ko eharo.
8 Yikara eyi nsene mu kara nayo nye yi zulilire, ngomu ruganesa ediwo lyeni lyousili kuhamena Hompa gwetu Jesus Kristusa, yipo mu dire kutengura monyima, nye mu rugane yirugana nayinye yoyiwa.
9 Nsene kweli ogu ga dira kukara noyikara eyi, ga twika, age kwa ferera yipo a dire kumona uzera,* age kudivara asi nonzo dendi nare va di mu dongwenena po.
10 Vakwetu, mokumona asi Karunga ga mu zigida nokumuhorowora, kondjeni unene mu twikire kuwapera ezigido eli, nsene mu twikira kurugana yininke eyi, kwato eyi ngayi mu ganda.
11 Monkedi zangesi ngava mu tungika unene ntani ngomu hwilira moUhompa wanarunye waHompa Jesus Kristusa, Muzowoli gwetu.
12 Eyi yiyo ani mu diworokesere nkenye apa kuhamena yininke eyi, nampili ngomu mwa yi diva ntani mwa pama mousili ou mwa lironga.
13 Nye aso situmbukira sange mokumudiworokesa siruwo esi nina kara monkongoronzugo* ezi,
14 yeeyi na yi diva asi nkongoronzugo zange ntaantani ngava zi guse po, ngamoomu tupu ga yi zeresera nge Hompa gwetu Jesus Kristusa.
15 Ngani kondja nkenye apa mokumudiworokesa, yipo asi apa ngani tunda po, ngomu vhure kudiworoka yininke eyi nyamweni.
16 Apa twa mu divisire kuhamena nonkondo nekaropo* lyaHompa gwetu Jesus Kristusa, kapi twa kweme nongano doyimpempa edi va tota po vantu, nye ose kwa limonenene uyerere wendi.
17 Yeeyi age kwa gwene efumano nouyerere kwaKarunga Guhya apa ga mu tanterere nonkango edi da tundire mouyerere wounene asi: “Ogu yige Munange ogu na hara, ga za nge komutjima.”
18 Yosili, nonkango edi yido twa zuvhire tadi tundu meguru, ose opo kumwe nendi pondundu zokupongoka.
19 Eyi yiyo twa karera nehuguvaro asi, mauporofete ngaga sika mo. Nawa kweyi mwa kara nosinka komauporofete aga ga kara ngwendi ramba zina kuminikira momundema, kutanta asi monomutjima deni, dogoro ntunguru zi moneke monongura.
20 Yeeyi mwayi diva nawa-nawa asi kwato uporofete womoMatjangwa wa wiza po komagano govantu.
21 Yeeyi kwato uporofete ou wa wiza po keharo lyomuntu, nye mpepo zokupongoka yizo za gendesere vantu va uyunge mbudi zokutunda kwaKarunga.
Nonkango dokonhi
^ Ndi nampo asi “ga twika, kumona siwiwili.”
^ Ndi “tenta,” kwa tamba rutu rwendi ropanyama.
